କିଣା ଯାଉନାହିଁ ପଞ୍ଜୀକୃତ ଚାଷୀଙ୍କ ଧାନ, ଆନ୍ଦୋଳନକୁ ଓହ୍ଲାଇବାକୁ ସଜବାଜ ହେଲେଣି କୃଷକ

ବ୍ରହ୍ମପୁର (ରାଧେଶ୍ୟାମ ଆଚାର୍ଯ୍ୟ): ଚାଷୀଙ୍କୁ ତାହାର ଫସଲ ଉଚିତ ମୂଲ୍ୟ ଦେବାକୁ ସରକାର କୃଷକଙ୍କ ଠାରୁ ଧାନ କ୍ରୟ କରୁଛନ୍ତି । ସରକାରଙ୍କୁ ଧାନ ବିକ୍ରି କରିବାକୁ ଚାହୁଁଥିବା ଚାଷୀ ପ୍ରତିବର୍ଷ ପଞ୍ଜୀକରଣ କରୁଛି। ଗତ ବର୍ଷ ଧାନ କିଣାରେ ସ୍ୱଚ୍ଛତା ବଜାୟ ରଖିବା ଲାଗି ସରକାର କୁପନ ବ୍ୟବସ୍ଥା ମଧ୍ୟ କରିଛନ୍ତି । ହେଲେ ପଞ୍ଜୀକୃତ ସମସ୍ତ ଚାଷୀଙ୍କ ଧାନ ସରକାର କିଣୁନଥିବା ଜଣାପଡିଛି । ସରକାରଙ୍କୁ ଧାନ ବିକ୍ରି କରିବାକୁ ଆଶା ରଖିଥିବା ଚାଷୀ ଶେଷରେ ନିରାଶ ହେବା ସହ ଅଭାବୀ ବିକ୍ରିର ଶିକାର ହେଉଛନ୍ତି । 

ଯାହାକୁ ନେଇ ଋଷିକୂଲ୍ୟା ସମେତ ରହିତ ମହାସଂଘ ଉଚ୍ଚତମ ନ୍ୟାୟାଳୟର ଦ୍ୱାରସ୍ଥ ହୋଇଛନ୍ତି । ହେଲେ ଏନେଇ ସେଭଳି କୌଣସି ସୁଫଳ ମିଳିନଥିବା କାରଣରୁ ଆଗାମୀ ଦିନରେ ପ୍ରଶାସନକୁ ଘେରିବା ଲାଗି ଚାଷୀକୁଳ ସଜବାଜ ହେଉଥିବା ଜଣାପଡିଛି। ସମସ୍ୟାର ବୁଢିଆଣି ଜାଲରେ ଛନ୍ଦି ହୋଇପଡିଛି ଚାଷୀକୂଳ । ଚଷା ପୁଅ ସହ ଖେଳ ଖେଳୁଛନ୍ତି ରାଜ୍ୟ ସରକାର । ଗଞ୍ଜାମ ଜିଲ୍ଲାରେ ପ୍ରହସନ ପାଲଟିଛି ଚାଷୀ ପଞ୍ଜୀକରଣ ନୀତି । ପାଖରେ କୁପନ ଧରି ମାସ ମାସ ଧରି ଧାନ ବିକିବା ଲାଗି ଅପେକ୍ଷା କରିବା ସହ ଅଭାବୀ ବିକ୍ରିର ଶୀକାର ହେଉଛନ୍ତି ଚାଷୀ । 

ଯାହାର ଫାଇଦା ନେଉଛନ୍ତି ପଡୋଶୀ ଆନ୍ଧ୍ର ପ୍ରଦେଶର ଦଲାଲ । ମିଳିଥିବା ତଥ୍ୟ ମୁତାବକ ୨୦୧୫-୧୬ ବର୍ଷରେ ୯୩,୫୧୧ ଚାଷୀ ପଞ୍ଜିକରଣ କରିଥିବା ବେଳେ, ୭୮୭୮୬ ଜଣ ଚାଷୀଙ୍କ ଠାରୁ ୩୯ ଲକ୍ଷ ୩ ହଜାର ୬୬୦ କ୍ୱିଣ୍ଟାଲ ଧାନ ସଂଗ୍ରହ କରାଯାଇଥିଲା । ସେହିପରି ୨୦୧୬-୧୭ ବର୍ଷରେ ୧ ଲକ୍ଷ ୩ ହଜାର ୫୫୧ ଚାଷୀ ପଞ୍ଜିକରଣ କରିଥିବା ବେଳେ,  ୭୫ ହଜାର ୧୬ ଜଣ ଚାଷୀ ୩୫ ଲକ୍ଷ ୫୯ ହଜାର ୧୬୧ କ୍ୱିଣ୍ଟାଲ ଧାନ ସରକାରଙ୍କୁ  ବିକ୍ରୟ କରିଛନ୍ତି । ୨୦୧୭-୧୮ ବର୍ଷରେ ୧ ଲକ୍ଷ ୧୧ ହଜାର ୭୯୫ ଚାଷୀ ପଞ୍ଜୀକରଣ କରିଥିବା ବେଳେ ୫୭ ହଜାର ୫୮୦  ଜଣ ଚାଷୀଙ୍କ ଠାରୁ ୨୭ ଲକ୍ଷ ୩୪ ହଜାର ୮୩୪ କ୍ୱିଣ୍ଟାଲ ଧାନ ସଂଗ୍ରହ କରାଯାଇଥିଲା । 

୨୦୧୮-୧୯ ବର୍ଷରେ ୧ ଲକ୍ଷ ୨୮ ହଜାର ୭୦୦ ଚାଷୀ ପଞ୍ଜୀକରଣ କରିଥିବା ବେଳେ ୭୩ ହଜାର ୪୦୭ ଜଣ ଚାଷୀଙ୍କ ଠାରୁ ୩୭ ଲକ୍ଷ ୩ ହଜାର ୭୯୭ କ୍ୱିଣ୍ଟାଲ ଧାନ ସରକାର କିଣିଥିଲେ । ୨୦୧୯-୨୦ ବର୍ଷରେ ୧ ଲକ୍ଷ ୩୪ ହଜାର ୪୯୬ ଜଣ ଚାଷୀ ପଞ୍ଜିକରଣ କରିଥିଲେ ମଧ୍ୟ ମାତ୍ର ୭୯ ହଜାର ୭୫୩ ଜଣ ଚାଷୀଙ୍କ ଠାରୁ ୩୭ ଲକ୍ଷ ୪ ହଜାର ୨୩୧ କ୍ୱିଣ୍ଟାଲ ଧାନ ସରକାର କିଣିଛନ୍ତି । 

ପ୍ରତିବର୍ଷ ଜିଲ୍ଲାରେ ପଞ୍ଜୀକରଣ କରୁଥିବା ଚାଷୀଙ୍କ ମଧ୍ୟରୁ ୪୫ ପ୍ରତିଶତ ଚାଷୀଙ୍କ ଧାନ କିଣୁନାହାଁନ୍ତି ସରକାର । ପାଖାପାଖି ୨ ଲକ୍ଷରୁ ଉର୍ଦ୍ଧ୍ୱ ଚାଷୀ ଅଭାବୀ ବିକ୍ରିର ସମ୍ମୁଖିନ ହେଉଥିବାର ଅଭିଯୋଗ କରିଛି ଋଷିକୂଲ୍ୟା ରଇତ ମହାସଂଘ । ଯାହାକୁ ନେଇ ଉଚ୍ଚତମ ନ୍ୟାୟାଳୟର ଦ୍ୱାରସ୍ଥ ହୋଇଥିବା ବେଳେ ସମସ୍ୟାର ତୁରନ୍ତ ସମାଧାନ କରିବା ଲାଗି ଦାବି ହୋଇଛି । 

ଗଞ୍ଜାମ ଜିଲ୍ଲାରେ ୪ଲକ୍ଷ ୩୪ହଜାର ହେକ୍ଟର ଚାଷପଯୋଗୀ ଜମି ରହିଛି। ସେଥି ମଧ୍ୟରୁ ପ୍ରତିବର୍ଷ ଖରିଫ ଋତୁରେ ୪ ଲକ୍ଷ ୬ ହଜାର ଜମିରେ ଚାଷ ହେଉଛି। ଏହା ମଧ୍ୟରୁ ୨ ଲକ୍ଷ ୮୦ ହଜାର ୩୧୨ ହେକ୍ଟର ଜମି ଜଳସେଚିତ । ଏହି ଜିଲାରେ ୩ ଲକ୍ଷ ୨୨ ହଜାର ୬୬୦ ଚାଷୀ ପରିବାର ରହିଥିବା ବେଳେ ୫ ଲକ୍ଷ ୪ହଜାର ୮୦୬ କୃଷି ଉପରେ ନିର୍ଭରଶୀଳ ଶ୍ରମିକ ରହିଛନ୍ତି । ହେଲେ ଉପଯୁକ୍ତ ମଜୁରୀ ନମିଳିବାରୁ ଅଧିକ ଅର୍ଥ ଅନ୍ୱେଷଣରେ କୃଷି ଶ୍ରମିକ ଭିଟାମାଟି ଛାଢି ରାଜ୍ୟ ବାହାରକୁ କାମ ଧନ୍ଦା ଅନ୍ୱେଷଣରେ ଚାଲି ଯାଉଛନ୍ତି । ଚାଷୀଙ୍କ ସମସ୍ୟାକୁ ନେଇ ଅତି ଶୀଘ୍ର ଅନୁଧ୍ୟାନ କରିବା ସହ ସମସ୍ୟାର ସମାଧାନ କରାଯିବ ବୋଲି କହିଛନ୍ତି ଜିଲ୍ଲାପାଳ ।