close

खास खबरें सिर्फ आपके लिए...हम खासतौर से आपके लिए कुछ चुनिंदा खबरें लाए हैं. इन्हें सीधे अपने मेलबाक्स में प्राप्त करें.

ଲାଡ଼େନ, ବାଗଦାଦୀ ଆଉ ଏବେ...

ନିକଟରେ ଆଇଏସଆଇଏସ ମୁଖ୍ୟ ଅବୁ ବକର ଅଲ୍ ବାଗଦାଦୀର ମୃତ୍ୟୁ ପରେ ଆଜି ଆସିଛି ଆଉ ଏକ ଖୁସି ଖବର । ବାଗଦାଦୀର ଉତ୍ତରାଧିକାରୀ କୁହାଯାଉଥିବା ଅବଦୁଲ୍ଲାକୁ ବି ରାସ୍ତାରୁ ସଫା କରିଦେଇଛି ଆମେରିକା । ଆଜି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଟ୍ୱିଟ୍ ଆସିବା ପରେ ଏବେ ପ୍ରଶ୍ନ, କ'ଣ ବାଗଦାଦୀ, ଅବଦୁଲ୍ଲା ପରେ ଦୁନିଆ ହୋଇଯିବ ଆତଙ୍କମୁକ୍ତ ?

ଲାଡ଼େନ, ବାଗଦାଦୀ ଆଉ ଏବେ...
ଅବଦୁଲ୍ଲା ଓ ବାଗଦାଦୀଙ୍କୁ ନିପାତ କରିବାକୁ ସକ୍ଷମ ହୋଇଛି ଆମେରିକା

ହିତାଂଶୁ ଶେଖର ମହାନ୍ତ, ନୂଆଦିଲ୍ଲୀ: ଆମେରିକାର ସେନା କାର୍ଯ୍ୟାନୁଷ୍ଠାନରେ ଇସଲାମିକ ଷ୍ଟେଟ୍ ପ୍ରମୁଖ ଅବୁ ବକର ଅଲ୍ ବାଗଦାଦୀ ନିହତ ହେବାର ଦିନକ ମଧ୍ୟରେ ଆତଙ୍କବାଦୀ ସଂଗଠନର ଦ୍ୱିତୀୟ କ୍ଷମତାକେନ୍ଦ୍ର ତଥା ମୁଖପାତ୍ର ହସନ ଅଲ ମୁଜାହିର ବି ଶୋଇଯାଇଛି ମୃତ୍ୟୁର ନିଦ । ବାଗଦାଦୀର ନିଧନ ପରେ ମୁଜାହିରକୁ ହିଁ ତା'ର ଉତ୍ତରାଧିକାରୀ ବିବେଚନା କରାଯାଇଥିଲା । ମାତ୍ର ତା'ର ମୃତ୍ୟୁ ପରେ ଅବଦୁଲ୍ଲା କାର୍ଦ୍ଦଶକୁ ନୂଆ ମୁଖିଆ ଘୋଷଣା କରିଥିଲା ଇସଲାମିକ ଷ୍ଟେଟ୍ । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଟ୍ୱିଟ୍ କରି ଏହି ସୂଚନା ଦେଇଛନ୍ତି । ଆମେରିକା ପ୍ରତିରକ୍ଷା ମନ୍ତ୍ରୀ ମାର୍କ ଏସ୍ପରଙ୍କ କହିବା କଥା, ବାଗଦାଦୀର ନିଧନ ସାରା ଦୁନିଆରେ ଶାନ୍ତି କାଏମ ରଖିବା ପାଇଁ ଏକ ବଡ଼ ପଦକ୍ଷେପ । ଏସ୍ପର ହେଉଛନ୍ତି, ସେହି ବଛା ବଛା ବ୍ୟକ୍ତିଙ୍କ ମଧ୍ୟରୁ ଜଣେ, ଯିଏ ହ୍ୱାଇଟ ହାଉସରୁ ବାଗଦାଦୀ ବିରୋଧରେ ହୋଇଥିବା ଅପରେସନକୁ ଲାଇଭ୍ ଦେଖିଥିଲେ । ଗତ ୨୬ ତାରିଖ ବିଳମ୍ବିତ ରାତିରେ ରାଷ୍ଟ୍ରପତି ଟ୍ରମ୍ପଙ୍କ ନିର୍ଦ୍ଦେଶରେ ଆମେରିକାର ସ୍ପେଶାଲ ଡେଲଟା ଫୋର୍ସ ବାଗଦାଦୀକୁ ଜୀବନ୍ତ ଅବା ମୃତ ଧରିବାକୁ କରିଥିଲେ ଅପରେସନ । ଆଉ ସେମାନେ ସଫଳ ହୋଇଥିବା ଆମେରିକା ରାଷ୍ଟ୍ରପତି ଟ୍ରମ୍ପଙ୍କ ଟ୍ୱିଟ୍ କହୁଛି । କୁହାଯାଉଛି, ଇସଲାମିକ ଷ୍ଟେଟର ନୂଆ ମୁଖିଆ ଅବଦୁଲ୍ଲା କାର୍ଦ୍ଦଶ ସଦ୍ଦାମ ହୁସେନଙ୍କ ସେନାବାହିନୀରେ ଉଚ୍ଚ ପଦାଧିକାରୀ ଭାବରେ କାର୍ଯ୍ୟ କରୁଥିଲା ।  ସିଏ କୁଆଡ଼େ ଥିଲା ସଦ୍ଦାମଙ୍କ ଡାହାଣ ହାତ । ହାଜି ଅବଦୁଲ୍ଲା ଅଲ ଅଫାରୀ ବା ପ୍ରଫେସର ନାମରେ ବିଖ୍ୟାତ କାର୍ଦ୍ଦଶକୁ ବାଗଦାଦୀ ଆଇଏସଆଇଏସର ମୁସଲିମ ସମ୍ପର୍କିତ ମାମଲାର ପରିଚାଳନା ପାଇଁ ନିଜେ ବାଛିଥିଲା । ତେଣୁ ସ୍ୱାଭାବିକ ଭାବରେ ବାଗଦାଦିର ମୃତ୍ୟୁପରେ କାର୍ଦ୍ଦଶକୁ ମିଳିଥିଲା ଆଇଏସର କମାଣ । ତେବେ ଟ୍ରମ୍ପଙ୍କ ଟ୍ୱିଟକୁ ବିଶ୍ୱାସକୁ ନେଲେ ଏକଥଆ ମାନିବାକୁ ପଡ଼ିବ ଯେ, କାର୍ଦ୍ଦଶକୁ ମଧ୍ୟ ଆମେରିକା ସେନା ନିପାତ କରି ଦେଇଛି ।

ଦୀର୍ଘ ୫ ବର୍ଷ ଧରି ୬୦ରୁ ଅଧିକ ଦେଶର ମିଳିତ ସେନା ବାଗଦାଦୀକୁ କୁକୁର ପରି ଖୋଜୁଥିଲେ । କିନ୍ତୁ ଯେଉଁ ଇଲାକାରେ କେବେ ବାଗଦାଦିର ଏକଛତ୍ର ରାଜୁତି ଚାଲୁଥିଲା, ସେହି ବରିଶା ଇଲାକା ହିଁ ପାଲଟିଗଲା ତାର କବ୍ରିସ୍ତାନ । ଅପରେସନ ବାଗଦାଦିକୁ ସଫଳ କରିବାକୁ ବଛାବଛା କମାଣ୍ଡୋମାନେ ସିରିଆର ଇଦଲିବକୁ ଯାଇଥିଲେ । ଦୀର୍ଘ ୬ ହଜାର କିଲୋମିଟର ଯାଇ ସଫଳତା ପୂର୍ବକ ବାଗଦାଦିକୁ ମାରିଥିଲେ । ସେହି ଅପରେସନର ନାଁ ରଖାଯାଇଥିଲା 'କାୟଲା ମୁଲେର' । କାୟଲା ମୁଲେର ଥିଲେ ଆମେରିକାର ଜଣେ ମାନବାଧିକାର କର୍ମୀ । ତାଙ୍କୁ ଆଇଏସ ଆତଙ୍କବାଦୀମାନେ ଅପହରଣ କରିବା ପରେ ବାରମ୍ବାର ଗଣଧର୍ଷଣ କରିଥିଲେ । ଏହାପରେ ତାଙ୍କୁ ହତ୍ୟା କରିଥିଲେ । ତେଣୁ ବାଗଦାଦି ମୃତ୍ୟୁ ପାଇଁ କରାଯାଇଥିବା ଅପରେସନର ନାଁ କାୟଲା ମୁଲେର ରଖାଯାଇଥିଲା ।

୨ ମେ ୨୦୧୧ରେ ପାକିସ୍ତାନର ଅବୋଟାବାଦରେ ଆମେରିକା ସେନା ଓସାମା ବିନ୍ ଲାଡ଼େନକୁ ଅପରେସନ ଜରିଆରେ ନିପାତ କରିବା ପରେ ତତ୍କାଳୀନ ଆମେରିକୀୟ ରାଷ୍ଟ୍ରପତି ଜର୍ଜ ବୁଶ୍ କହିଥିଲେ, ଏଣିକି ବିଶ୍ୱରୁ ଆତଙ୍କବାଦ ଲୋପ ପାଇଲା । କିନ୍ତୁ ସେତେବେଳେ କେହି ବି ଜାଣି ନ ଥିଲେ ଯେ, ବାଗଦାଦୀ ରୂପରେ ଆତଙ୍କବାଦର ନବକଳେବର ହେବାକୁ ଯାଉଛି । ଏପରିକି ୨୦୦୪ ମସିହାରେ ଇରାକର ଫାଲୁଜାଠାରେ ଥରେ ଆମେରିକା ବାଗଦାଦୀକୁ ଗିରଫ ମଧ୍ୟ କରିଥିଲା । ସେତେବେଳେ ସେ ଥଇଲା ଆତଙ୍କବାଦୀ ସଂଗଠନ ଅଲ୍ କାଏଦାର ସ୍ଥାନୀୟ ଡିଭିଜନର ମୁଖ୍ୟ । କିନ୍ତୁ ସେହି ସମୟରେ ବାଗଦାଦୀ ବିରୋଧରେ ଆତଙ୍କରେ ଲିପ୍ତ ଥିବାର ଯଥେଷ୍ଟ ପ୍ରମାଣ ପାଇ ନ ଥିଲା ଆମେରିକା । ଫଳରେ ଗିରଫର ୯ ମାସ ପରେ ତା'କୁ ଛାଡ଼ି ଦେବାକୁ ବାଧ୍ୟ ହୋଇଥିଲା । ଆଉ ତା'ର କିଛି ବର୍ଷ ପରେ ଇସଲାମିକ ଷ୍ଟେଟ୍ ସଂଗଠନ ଗଠନ କରି ବାଗଦାଦୀ ବର୍ବରତାର ଯେଉଁ କାହାଣୀ ଲେଖିଲା, ତାହା ସମସ୍ତେ ଜାଣନ୍ତି । ୨୬ ଅକ୍ଟୋବର ୨୦୧୯ରେ ତା'କୁ ଆମେରିକାର ଡେଲଟା ଫୋର୍ସ ନିପାତ କଲାବେଳେ ମଧ୍ୟ ବର୍ତ୍ତମାନର ରାଷ୍ଟ୍ରପତି ଟ୍ରମ୍ପ କହିଛନ୍ତି, ଏଣିକି ବିଶ୍ୱରୁ ଆତଙ୍କବାଦ ଲୋପ ପାଇଲା । ପୃଥିବୀ ଏଣିକି ଶାନ୍ତିର ନିଃଶ୍ୱାସ ନେବ । ମାତ୍ର ସତରେ କ'ଣ ପୃଥିବୀରୁ ଆତଙ୍କବାଦର ବିଲୋପ ଘଟିଛି ?

ଟ୍ରମ୍ପ୍ ଆଉ ଏକ ନୂଆ ତଥ୍ୟ ଦୁନିଆକୁ ଦେଇଛନ୍ତି । ସେ ଟ୍ୱିଟ୍ କରି ଗୋଟିଏ କୁକୁରର ଫଟୋ ପୋଷ୍ଟ କରିଛନ୍ତି । ଆଉ ତାହା କୌଣସି ସାଧାରଣ କୁକୁର ନୁହେଁ । ଅପରେସନ ବାଗଦାଦିରେ ସାମିଲ ଏହି କୁକୁର ସବୁଠାରୁ ସାହସୀ ଓ ସଫଳ ଭୂମିକା ଗ୍ରହଣ କରିଥିଲା । ଆମେରିକା ସେନା କବଳରୁ ବର୍ତ୍ତିବାକୁ ଯାଇ ବାଗଦାଦି ଏକ ଗୁମ୍ଫା ଭିତରେ ପଶି ଯାଇଥିଲା । ସେହି ସମୟରେ ତାକୁ ଏହି କୁକୁର ଗୋଡ଼ାଇ ଥିଲା । କୁକୁରକୁ ଦେଖି ବାଗଦାଦି କାନ୍ଦି କାନ୍ଦି ଦୌଡ଼ିଥିଲା । ଆଉ କୁକୁରର ଭୟରେ ସେ ନିଜକୁ ବିସ୍ଫୋରଣ କରି ଉଡ଼ାଇ ଦେଇଥିଲା । ବିସ୍ଫୋରଣ ପ୍ରଭାବରେ ସାହସୀ କୁକୁରଟି ସାମାନ୍ୟ ଆହତ ବି ହୋଇଛି । ବେଲଜିଆନ୍ ମାଲିନୋଇଜ୍ ପ୍ରଜାତିର ଏ କୁକୁର ଆମେରିକାର ସ୍ପେଶାଲ ଫୋର୍ସ ସହ କାମ କରୁଛି ।

ସେପଟେ ଟ୍ରମ୍ପ କହୁଛନ୍ତି ଯେ, ଦୁନିଆ ପୂର୍ବାପେକ୍ଷା ସୁରକ୍ଷିତ ହୋଇଯାଇଛି । ତେବେ କ'ଣ ବାସ୍ତବରେ ଏହା ସତ ? କାରଣ ଦେଖିବାର କଥା, ଯେତେବେଳେ ୨୦୦୬ରେ ଅଲକାଏଦାର ମୁଖ୍ୟ ଆତଙ୍କବାଦୀ ଅବୁ ମସାବ ଅଲ୍ ଜର୍କାୱୀ ମରିଥିଲା, ସେତେବେଳେ ଆମେରିକାର ତତ୍କାଳୀନ ରାଷ୍ଟ୍ରପତି ଜର୍ଜ ଡବ୍ଲୁ ବୁଶ୍ ମଧ୍ୟ ଠିକ୍ ଏମିତି କିଛି କହିଥିଲେ । ଆଉ ଯେତେବେଳେ ୨୦୧୧ରେ ଅଲକାଏଦାର ସବୁଠୁ ବଡ଼ ମୁଖିଆ ଓସାମା ବିନ୍ ଲାଡେନ୍ ମରିଥିଲା, ସେତେବେଳେ ମଧ୍ୟ ତତ୍କାଳୀନ ରାଷ୍ଟ୍ରପତି ବାରାକ୍ ଓବାମା ଠିକ୍ ଏମିତି କହିଥିଲେ । ଯେତେବେଳେ ବୁଶ୍ ଜର୍କାୱୀର ମୃତ୍ୟୁକୁ ନେଇ ଖୁସି ମନାଉଥିଲେ, ସେତେବେଳେ ବାଗଦାଦି ଆମେରିକା ଜେଲରେ ଥିବାସତ୍ତ୍ୱେ ଦୁନିଆରେ ଆତଙ୍କ ଖେଳାଇବାକୁ ମନ ବଳାଇଥିଲା । ଆଉ ଯେତେବେଳେ ଓସାମା ବିନ୍ ଲାଡେନ୍ ମରିବା ନେଇ ବାରାକ୍ ଓବାମା ଘୋଷଣା କରୁଥିଲେ, ସେତେବେଳେ ବାଗଦାଦି ଜିହାଦୀଙ୍କର ଏମିତି ଏକ ସେନା ପ୍ରସ୍ତୁତ କରିସାରିଥିଲା, ଯାହାକୁ ଦେଖି ଭବିଷ୍ୟତର ଦୁନିଆ ଭୟଭୀତ ହେବା ବାକି ଥିଲା । ୨୦୧୧ରେ ଇରାକରୁ ଆମେରିକା ସେନା ଫେରିବା କ୍ଷଣି ବାଗଦାଦି ମଜବୁତ ହୋଇଥିଲା । ଆଉ ବର୍ତ୍ତମାନ ସିରିଆରୁ ଆମେରିକାର ପ୍ରତ୍ୟାବର୍ତ୍ତନ ପରେ, ଆଉ କେଉଁ ଆତଙ୍କବାଦୀ ନିଜକୁ ମୁସଲମାନଙ୍କ ରାଜା ବୋଲାଇବ, ତାହା କେହି ଜାଣନ୍ତି ନାହିଁ ।

ଆମେରିକା ଆତଙ୍କବାଦୀଙ୍କୁ ମାରୁଛି ସତ, କିନ୍ତୁ ତାଙ୍କ ଚିନ୍ତାଧାରା ଓ ତରିକାକୁ ସେ ଆଉ କେଉଁଠି ରି-ସାଇକ୍ଲ କରି ନିଜର ଫାଇଦା ପାଇଁ ବ୍ୟବହାର କରୁଛି । ପାକିସ୍ତାନରେ ଆତଙ୍କବାଦର କାରଖାନା ଚାଲିଥିବା ଜାଣି ବି ଆମେରିକା ତା' ଉପରେ ବର୍ଷ ବର୍ଷ ଧରି ଲକ୍ଷ ଲକ୍ଷ ଡଲାର ବର୍ଷା କରି ଆସିଛି । ଆଜି ଯଦି ପାକିସ୍ତାନରେ ହାଫିଜ ସୟିଦ ଓ ମାସୁଦ ଅଜହର ପରି ଆତଙ୍କବାଦୀଙ୍କ ଚେର ମଜବୁତ ହୋଇଛି, ତେବେ ତା' ପଛରେ ଆମେରିକାର ଆର୍ଥିକ ସାହାଯ୍ୟର କିଛି ଭୂମିକା ନାହିଁ କି ? ଭାରତ ପରି ବୃହତ୍ ବଜାରକୁ ହାତଛଡ଼ା ନ କରିବା ପାଇଁ ହିଁ ଭାରତର ଚାପ ଆଗରେ ମୁଣ୍ଡ ନୁଆଇଁ ଆମେରିକା ମାସୁଦ ଅଜହରକୁ ଅନ୍ତର୍ଜାତୀୟ ଆତଙ୍କବାଦୀ ଘୋଷଣା କିରଦେଲା ସତ, ହେଲେ ତା' ବିରୋଧରେ କୌଣସି ଆଖିଦୃଶିଆ କାର୍ଯ୍ୟାନୁଷ୍ଠାନ ଗ୍ରହଣ କରିନାହିଁ । ଆମେରିକାର ଏହି ଉପାୟ ହିଁ ସାରା ଦୁନିଆ ପାଇଁ ସବୁବେଳେ ଭୟଙ୍କର ସାବ୍ୟସ୍ତ ହୋଇଛି । ଆଉ ଯଦି ପୁଣିଥରେ ଏମିତି ହୁଏ, ତେବେ ଦୁନିଆ କହିବ, ବାଗଦାଦି ମରିସାରିଛି, କିନ୍ତୁ ମରିନି ତା' ଚିନ୍ତାଧାରା । ତେବେ କ'ଣ ବାସ୍ତବରେ ପୃଥିବୀରୁ ଆତଙ୍କବାଦର କଳାବାଦଲ ହଟି ଯାଇଛି ? ଦୃଢ଼ତାର ସହ କିଏ ଦେବ ଏହାର ଉତ୍ତର ?