'ପୋଲିସ ଏନକାଉଣ୍ଟରକୁ ଯିଏ ବିରୋଧ କରୁଛି, ସିଏ ଦେଶଦ୍ରୋହୀ'

ହାଇଦ୍ରାବାଦ ଇନକାଉଣ୍ଟରକୁ ବିରୋଧ କରୁଥିବା ଲୋକଙ୍କୁ ଏମିତି କହିଲେ YSRCP ସାଂସଦ

ନୂଆଦିଲ୍ଲୀ: ହାଇଦ୍ରାବାଦ ଗଣଦୁଷ୍କର୍ମ ଏବଂ ହତ୍ୟା ଘଟଣାରେ ୪ ଅଭିଯୁକ୍ତଙ୍କୁ ପୋଲିସର ଏନକାଉଣ୍ଟର ପରେ ଏବେ ଚର୍ଚ୍ଚା ସରଗରମ । ବିଭିନ୍ନ ମହଲରେ ପୋଲିସର ଏପରି କାର୍ଯ୍ୟକୁ ତାରିଫ କରାଯାଉଛି । ଅନ୍ୟପଟେ କେଉଁ ପରିସ୍ଥିତିରେ ଅଭିଯୁକ୍ତଙ୍କୁ ଏନକାଉଣ୍ଟର କରାଯାଇଛି, ତାକୁ ନେଇ ପ୍ରଶ୍ନ ଉଠାଇଛନ୍ତି ମାନବଧିକାର କର୍ମୀ । ଦେଶର ଆଇନ କାନୁନୁ ବ୍ୟବସ୍ଥା ଥାଇ ଆଇନକୁ ହାତକୁ ନେବା କେତେ ଯୁକ୍ତଯୁକ୍ତ, ତାକୁ ନେଇ କିଛି ପ୍ରଶ୍ନ କରୁଛନ୍ତି । ତେବେ ପୋଲିସର ଇନକାଉଣ୍ଟରକୁ ବିରୋଧ କରୁଥିବା ଲୋକଙ୍କୁ ଦେଶଦ୍ରୋହୀ ବୋଲି କହିଛନ୍ତି ଜଣେ YSRCP ସାଂସଦ । 

YSRCP ସାଂସଦ କାନୁମୁରୁ ରଘୁରାମ କୃଷ୍ଣ ରାଜୁ କହିଛନ୍ତି, ''ଅଭିଯୁକ୍ତମାନେ ପୋଲିସକୁ ତଦନ୍ତରେ ସହଯୋଗ ନକରି ଖସିଯିବାକୁ ଉଦ୍ୟମ କରୁଥିଲେ । ତେଣୁ ସେମାନଙ୍କୁ ଏନକାଉଣ୍ଟର କରିବାର ଦରକାର ଥିଲା, ଯାହା ପୋଲିସ କରିଛି । ଭଗବାନ ବହୁତ ଦୟାଳୁ, ଯେଉଁଥିପାଇଁ ଅଭିଯୁକ୍ତଙ୍କୁ ଗୁଳି ମରାଯାଇଛି । ଗଣଦୁଷ୍କର୍ମ ଓ ହତ୍ୟା ଅଭିଯୁକ୍ତଙ୍କୁ ପାନେ ମିଳିଛି । କୌଣସି ବି NGO ଏହାକୁ ବିରୋଧ କରିବା ଉଚିତ ନୁହେଁ । ଯଦି କେହି ପୋଲିସର ଏହି ଏନକାଉଣ୍ଟରକୁ ବିରୋଧ କରୁଛି, ସିଏ ଦେଶଦ୍ରୋହୀ। ''

Kanumuru Raghu Rama Krishna Raju, YSR Congress Party on #Telangana encounter: They deserved to be shot dead. God has been kind that they were shot dead, this is a good lesson. They tried to run away&they were killed. No NGO should oppose it & if they do so, they are anti-national pic.twitter.com/dl56IVBn6Y

— ANI (@ANI) December 6, 2019

କାହିଁକି ଅଭିଯୁକ୍ତଙ୍କୁ ଏନକାଉଣ୍ଟର କରିଥିଲା ପୋଲିସ ?

ପୋଲିସର ସୂଚନା ମୁତାବକ, ଦିଶା ଗଣଦୁଷ୍କର୍ମ ଏବଂ ହତ୍ୟା ଘଟଣାର ଅଧିକ ତଦନ୍ତ ପାଇଁ ଚେତନାପାଲି ଓଭରବ୍ରିଜ ନିକଟକୁ ଅଭିଯୁକ୍ତଙ୍କୁ ନିଆଯାଇଥିଲା । କାହିଁକିନା ଏହି ଓଭରବ୍ରିଜ ତଳୁ ହିଁ ଦିଶାଙ୍କ ଅର୍ଦ୍ଧଦଗ୍ଧ ମୃତଦେହ ମିଳିଥିଲା । ତେବେ ପୋଲିସକୁ ତଦନ୍ତରେ ସହଯୋଗ ନକରି ଖସି ପଳାଇବାକୁ ଉଦ୍ୟମ କରିଥିଲେ ସମସ୍ତ ଅଭିଯୁକ୍ତ । ଆଉ ଏମାନଙ୍କୁ କାବୁ କରିବାରେ ବିଫଳ ହେବାରୁ ଏନକାଉଣ୍ଟର କରିବାକୁ ପୋଲିସ ବାଧ୍ୟ ହୋଇଥିଲା । 

କୁହାଯାଉଛି, ପୋଲିସକୁ ଚକମା ଦେଇ ଖସି ପଳାଇବାକୁ ଅନ୍ୟ ୩ ଅଭିଯୁକ୍ତଙ୍କୁ ପ୍ରଥମେ ଇସାରା କରିଥିଲା ମୁଖ୍ୟ ଅଭିଯୁକ୍ତ ଟ୍ରକ ଡ୍ରାଇଭର । ଆଉ ତାହା ଇସାରାରେ ସମସ୍ତେ ଏକା ସାଙ୍ଗରେ ଦୌଡିବାକୁ ଲାଗିଥିଲେ । 

ଇନକାଉଣ୍ଟରକୁ ନେଇ ନିର୍ଭୟାଙ୍କ ମା'ଙ୍କ ପ୍ରତିକ୍ରିୟା

ଦିଶା ଗଣଦୁଷ୍କର୍ମ ଏବଂ ହତ୍ୟା ଘଟଣାରେ ମାତ୍ର ୧୦ ଦିନ ଭିତରେ ସମସ୍ତ ଅଭିଯୁକ୍ତଙ୍କୁ ଏନକାଉଣ୍ଟର କରାଯାଇଛି । ଅର୍ଥାତ ପୀଡିତାଙ୍କ ପରିବାରକୁ ନ୍ୟାୟ ମିଳିଛି । ଯାହାକୁ ନେଇ ନିର୍ଭୟାଙ୍କ ମା' ମଧ୍ୟ ଖୁସିବ୍ୟକ୍ତ କରିଛନ୍ତି । କହିଛନ୍ତି, ପୋଲିସ ବହୁତ ଭଲ କାମ କରିଛି । ଏପରିକି ପରବର୍ତ୍ତୀ ସମୟରେ ପୋଲିସ ଉପରେ କୌଣସି କାର୍ଯ୍ୟାନୁଷ୍ଠାନ ନ ନେବାକୁ ସେ ଦାବି କରିଛନ୍ତି । 

କେବଳ ଏତିକି ନୁହେଁ, ତାଙ୍କ ଝିଅଙ୍କ ଦୁଷ୍କର୍ମକାରୀଙ୍କୁ ମଧ୍ୟ ତୁରନ୍ତ ଫାଶୀ ଦିଆଯାଉ ବୋଲି କହିଛନ୍ତି ନିର୍ଭୟାଙ୍କ ମା' ଆଶା ଦେବୀ । ଦୀର୍ଘ ୭ ବର୍ଷ ହେଲା ସେ କୋର୍ଟ କଚେରୀ ଚକ୍କର କାଟୁଛନ୍ତି । ତେଣୁ ତ୍ୱରିତ ନ୍ୟାୟ ପାଇଁ ସେ ଦାବି କରିଛନ୍ତି । ଯେତେ ଶୀଘ୍ର ସମ୍ଭବ, ମୋ ଝିଅର ଦୁଷ୍କର୍ମକାରୀଙ୍କୁ ମଧ୍ୟ ଫାଶୀ ଦିଆଯାଉ ବୋଲି କହିଛନ୍ତି ଆଶା ଦେବୀ । 

ଆହୁରି ପଢନ୍ତୁ; ଦିଲ୍ ଜିତିଲେ ଦବଙ୍ଗ୍ ପୋଲିସ ! ସବୁଠି ତେଲେଙ୍ଗାନା ପୋଲିସକୁ ତାରିଫ