ଇଂଲଣ୍ଡରେ ୧୯୭୯ ମସିହାରେ ଜେମ୍ସ କଲାଘାନ ଅବିଶ୍ୱାସ ପ୍ରସ୍ତାବରେ ହାରିବା ପରେ ମାର୍ଗାରେଟ୍ ଥାଚର ପ୍ରଧାନମନ୍ତ୍ରୀ ହୋଇଥିଲେ । ସେତେବେଳେ ଇଂଲଣ୍ଡର ଆର୍ଥିକ ଅବସ୍ଥା ସାଙ୍ଘାତିକ ଥିଲା । ଆର୍ଥିକ ମାନ୍ଦାବସ୍ଥା ଦେଇ ଗତି କରୁଥିବା ଇଂଲଣ୍ଡର ମଙ୍ଗ ସମ୍ଭାଳିଥିଲେ ସେଠାକାର ପ୍ରଥମ ପ୍ରଧାନମନ୍ତ୍ରୀ ମାର୍ଗାରେଟ୍ ଥାଚର ।
Trending Photos
ଚାରୁ ଚନ୍ଦନ ଦାଶ, ନୂଆଦିଲ୍ଲୀ: ଆସନ୍ତା ଫେବ୍ରୁଆରୀ ପହିଲାରେ ଉପସ୍ଥାପନ କରାଯିବ କେନ୍ଦ୍ର ବଜେଟ୍ । ଅର୍ଥମନ୍ତ୍ରୀ ନିର୍ମଳା ସୀତାରମଣ ସଂସଦରେ ଉପସ୍ଥାପନ କରିବେ ବଜେଟ୍ । ଦେଶ ଏବେ ଆର୍ଥିକ ମାନ୍ଦାବସ୍ଥା ଦେଇ ଗତି କରୁଥିବାରୁ ଏହି ବଜେଟ୍ କେନ୍ଦ୍ର ସରକାରଙ୍କ ପାଇଁ ବଡ଼ ଚ୍ୟାଲେଞ୍ଜ ହେବ । ଭାରତର ଆର୍ଥିକ ପରିସ୍ଥିତିକୁ ସୁଧାରିବାକୁ ସରକାର ପ୍ରାଣପଣେ ଚେଷ୍ଟା କରିବେ । ସେଥିପାଇଁ ସବୁ ବର୍ଗର ଲୋକଙ୍କୁ ସନ୍ତୁଷ୍ଟ କରିବାକୁ ନିର୍ମଳା ସୀତାରମଣ ନିଶ୍ଚିତ ଭାବେ ପ୍ରୟାସ କରିବେ । ତେବେ ଆର୍ଥିକ ମାନ୍ଦାବସ୍ଥାକୁ ସୁଧାରିବାକୁ ସରକାର ଯେଉଁ ସବୁ ବିଭାଗ ଉପରେ ଧ୍ୟାନ ଦେବେ ତନ୍ମଧ୍ୟରୁ...
୧) ଓଏନଜିସି, କୋଲ୍ ଇଣ୍ଡିଆ ଭଳି କମ୍ପାନିର ଅଂଶଧନ ୫୧ ପ୍ରତିଶତକୁ ହ୍ରାସ ହୋଇଗଲେ ସରକାର ଏହାର ଫାଇଦା ଉଠାଇ ପାରିବେ ।
୨) ଏୟାର ଇଣ୍ଡିଆ, ବିପିସିଏଲ୍ ଭଳି ବଡ଼ ବଡ଼ କମ୍ପାନିର ଘରୋଇକରଣ ଯୋଗୁ ସରକାର ଲାଭରେ ରହିପାରନ୍ତି ।
୩) ଶକ୍ତି, ଗ୍ୟାସ୍ ଓ ହାଇୱେ ଆଦି କ୍ଷେତ୍ରରେ ଯଦି ସରକାର ନିବେଶ କରନ୍ତି, ତେବେ ଏହା ଦ୍ୱାରା ଲାଭବାନ ହେବାର ସମ୍ଭାବନା ରହିଛି ।
୪) ଶତ୍ରୁ ସମ୍ପତ୍ତି ବିକ୍ରି କରିବା ଦ୍ୱାରା ସରକାର ପ୍ରାୟ ଏକ ଲକ୍ଷ କୋଟି ଟଙ୍କାର ଲାଭ ପାଇବେ । ୯ ହଜାର ୪୦୬ଟି ଶତ୍ରୁ ସମ୍ପତ୍ତି ବିକ୍ରି କରିବାର ପ୍ରକ୍ରିୟା ପାଇଁ ମନ୍ତ୍ରୀସ୍ତରୀୟ ଏକ କମିଟି ଗଠନ କରିଛନ୍ତି । ଏହି ସମ୍ପତ୍ତି ବିକ୍ରି ହୋଇଗଲେ ସରକାରଙ୍କୁ ଲକ୍ଷାଧିକ ଟଙ୍କା ମିଳିବ ।
୫) କ୍ଷତିରେ ଚାଲୁଥିବା କମ୍ପାନି ଗୁଡ଼ିକର ଏକ ତାଲିକା ନୀତି ଆୟୋଗ ପ୍ରସ୍ତୁତ କରିଛି । ଏହାକୁ ସରକାର ବିକ୍ରି କରିବାର ଯୋଜନା କରୁଛନ୍ତି ।
ସେହିପରି ଯେଉଁ ସବୁ ଅନ୍ୟ ଦିଗ ଉପରେ ସରକାର ଧ୍ୟାନ ଦେଇପାରନ୍ତି, ସେଗୁଡ଼ିକ ହେଲା-
୧) କୃଷି- ଏଥର ସରକାର କୃଷି ଉପରେ ଅଧିକ ଫୋକସ୍ ଦେବେ । କାରଣ ଏହାଦ୍ୱାରା ସରକାର ସବୁଠୁ ଅଧିକ ଲାଭ ପାଇଥାନ୍ତି । ସେଥିପାଇଁ କୃଷକମାନଙ୍କ ପାଇଁ ସରକାର ନୂଆ ଯୋଜନା ଆଣିପାରନ୍ତି । ପ୍ରଧାନମନ୍ତ୍ରୀ କିଷାନ ନିଧି ଯୋଜନା ଭଳି ଅନେକ ଗୁଡ଼ିଏ ସବସିଡି ଯୋଜନାକୁ ମିଶାଇ 'ପ୍ରଧାନମନ୍ତ୍ରୀ ସାର୍ବଭୌମ' ଯୋଜନା ନାଁରେ ଏକ ନୂଆ ଯୋଜନା ଆଣିପାରନ୍ତି । ଏହାଦ୍ୱାରା ଚାଷୀମାନେ ଅଧିକ ଲାଭବାନ ହେବେ । ୨୦୨୨ ସୁଦ୍ଧା ଚାଷୀଙ୍କ ଆୟ ଦୁଇ ଗୁଣା ହେବା ନେଇ ସରକାର ଯେଉଁ ସ୍ୱପ୍ନ ଦେଖିଛନ୍ତି ତାହା ପୂରଣ ହେବ ।
୨) ମନରେଗା- ଗ୍ରାମୀଣ ବିକାଶ ପାଇଁ କେବଳ ମହାତ୍ମା ଗାନ୍ଧି ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା ବା ମନେରଗା ହିଁ ଏକ ମାତ୍ର ଯୋଜନା । ତେଣୁ, ଗ୍ରାମୀଣ ବିକାଶ ପାଇଁ ଥିବା ଅନେକ ଛୋଟ ଛୋଟ ଯୋଜନାକୁ ସରକାର ବନ୍ଦ କରିଦେଇ ମନେରଗାକୁ ଉପରେ ହିଁ କେବଳ ଫୋକସ୍ ଦେବେ । ନଚେତ୍ ମନେରଗାରେ ହିଁ ସେସବୁ ଯୋଜନାକୁ ସାମିଲ କରିଦେବାର ସମ୍ଭାବନା ରହିଛି । ପ୍ରାୟ ୭୫ ହଜାର କୋଟି ଟଙ୍କା କେବଳ ମନେରଗାକୁ ଏଥର ମିଳିବାର ସମ୍ଭାବନା ରହିଛି ।
୩) ଗ୍ରାମୀଣ ବିକାଶ- ଗ୍ରାମୀଣ ବିକାଶ ପାଇଁ ଏଥର ବଜେଟରେ ସରକାର ଗ୍ରାମାଞ୍ଚଳର ମୁଣ୍ଡପିଛା ଆୟକୁ ବୃଦ୍ଧି କରିବା ସହ ଆହୁରି ଅନେକ ବ୍ୟବସ୍ଥା କରିପାରନ୍ତି ।
୪) ବିଜୁଳି- ପୂର୍ବ ବଜେଟ୍ ଭାଷଣରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୨୦୨୪ ପର୍ଯ୍ୟନ୍ତ ଭାରତର ପ୍ରତିଟି ଘରକୁ ନଳ ଜଳ ଏବଂ ୨୦୨୨ ପର୍ଯ୍ୟନ୍ତ ପ୍ରତି ଘରକୁ ବିଜୁଳି ଯୋଗାଇ ଦେବାକୁ ପ୍ରତିଶ୍ରୁତି ଦେଇଥିଲେ । ତେଣୁ, ଏହି ଟାର୍ଗେଟ୍ ପୂରା କରିବାକୁ ହେଲେ ଏଥର ବଜେଟରେ ଏ ବିଷୟରେ ସରକାର ନିହାତି ଭାବେ ଚିନ୍ତା କରୁଥିବେ । ସେଥିପାଇଁ ୨୪ ଘଣ୍ଟା ବିଜୁଳି ସେବା ଯୋଗାଇ ଦେବାକୁ ସରକାର ଯୋଜନା କରିଛନ୍ତି । 'Atal Distribution System Improvement Yojana’ ବା ଆଦିତ୍ୟ ଭଳି ନୂଆ ଯୋଜନା ମାଧ୍ୟମରେ ପ୍ରାୟ ୧ ଦଶମିକ୧୦ ଲକ୍ଷ କୋଟି ଟଙ୍କା ବ୍ୟୟବରାଦ କରିବାର ସମ୍ଭାବନା ରହିଛି । ସେହିପରି କେତେକ ସରକାରୀ ସଂସ୍ଥା ବ୍ୟତୀତ ବେସରକାରୀ ସଂସ୍ଥା ଗୁଡ଼ିକୁ ମଧ୍ୟ ବିଜୁଳି ଶକ୍ତି ଯୋଗାଇବା ପାଇଁ ସରକାର ଦାୟିତ୍ୱ ଦେଇପାରନ୍ତି । ତେବେ ବିଦ୍ୟୁତ୍ ସଂଯୋଗ କରିବା, ସ୍ମାର୍ଟ ମିଟର ବସାଇବା ଆଦି ଏହି ଯୋଜନାର ଅନ୍ତର୍ଭୁକ୍ତ । ତେବେ ସରକାର ଭାରତର ପ୍ରାୟ ୨୫ କୋଟି ପରିବାରରେ ସ୍ମାର୍ଟ ମିଟର ଲଗାଇବା ପାଇଁ ଲକ୍ଷ୍ୟ ରଖିଛନ୍ତି ।
୫) ସେହିପରି ମାନ୍ଦାବସ୍ଥା କାରଣରୁ ଲୋକଙ୍କ ବ୍ୟୟ ହ୍ରାସ ପାଇଛି । ଲୋକମାନେ ଘର ଓ କାର୍ ଭଳି ସାମଗ୍ରୀ କ୍ରୟ କରିବାକୁ ଡରୁଛନ୍ତି । ତେଣୁ, ଏଦିଗରେ ନିର୍ମଳାଙ୍କ ବଜେଟରେ ବ୍ୟକ୍ତିଗତ କରରେ କିଛି ମାତ୍ରା ହ୍ରାସ ପାଇପାରେ । ଦୀର୍ଘମିଆଦି ପୁଞ୍ଜିଲାଭ ଟିକସ ପ୍ରତ୍ୟାହାର କରିବା ସହ ଗୃହ କ୍ରେତାଙ୍କୁ ଅଧିକ ପ୍ରୋତ୍ସାହନ ଦେଇପାରେ କେନ୍ଦ୍ର ବଜେଟ୍ । କୃଷି ବୀମା, ସ୍ୱାସ୍ଥ୍ୟ ବୀମା ଓ ପେନସନ ଯୋଜନା ଆଦିକୁ ମଧ୍ୟ ଏଥର ବଜେଟରେ ବିଶେଷ ଗୁରୁତ୍ୱ ଦିଆଯିବ ।
ଇଂଲଣ୍ଡରେ ୧୯୭୯ ମସିହାରେ ଜେମ୍ସ କଲାଘାନ ଅବିଶ୍ୱାସ ପ୍ରସ୍ତାବରେ ହାରିବା ପରେ ମାର୍ଗାରେଟ୍ ଥାଚର ପ୍ରଧାନମନ୍ତ୍ରୀ ହୋଇଥିଲେ । ସେତେବେଳେ ଇଂଲଣ୍ଡର ଆର୍ଥିକ ଅବସ୍ଥା ସାଙ୍ଘାତିକ ଥିଲା । ଆର୍ଥିକ ମାନ୍ଦାବସ୍ଥା ଦେଇ ଗତି କରୁଥିବା ଇଂଲଣ୍ଡର ମଙ୍ଗ ସମ୍ଭାଳିଥିଲେ ସେଠାକାର ପ୍ରଥମ ମହିଳା ପ୍ରଧାନମନ୍ତ୍ରୀ ମାର୍ଗାରେଟ୍ ଥାଚର । ସେତେବେଳେ ସେ ଇଂଲଣ୍ଡର ପ୍ରତ୍ୟକ୍ଷ କରକୁ ହ୍ରାସ କରି ପରୋକ୍ଷ କର ବୃଦ୍ଧି କରିଥିଲେ, ଯାହାକୁ ବିଶ୍ୱର ବଡ଼ ବଡ଼ ଅର୍ଥନୀତିଜ୍ଞମାନେ ପ୍ରଶଂସା କରିଥିଲେ । ସେହିପରି ଗୃହ, ଶିକ୍ଷା ଆଦି କ୍ଷେତ୍ରରେ ଖର୍ଚ୍ଚ କରିବା କମ୍ କରି ଦେଇଥିଲେ । ଏହାସହ ମନି ସପ୍ଲାଏ ହ୍ରାସ କରିବା ପାଇଁ ସେ ସୁଧ ହାର ବୃଦ୍ଧି ଭଳି କଠୋର ନିଷ୍ପତ୍ତି ନେଇଥିଲେ । ସେହିପରି ଇଂଲଣ୍ଡର ମୁଦ୍ରାସ୍ଫୀତି ସର୍ବାଧିକ ଥିବାବେଳେ ଦେଶକୁ ବଞ୍ଚାଇଥିଲେ ମାର୍ଗାରେଟ୍ ଥାଚର । ସେଥିପାଇଁ ତାଙ୍କୁ ଆଇରନ ଲେଡି ବୋଲି କୁହାଯାଏ । ଏବେ ଭାରତ ମଧ୍ୟ ଘୋର ଆର୍ଥିକ ମାନ୍ଦାବସ୍ଥା ଦେଇ ଗତି କରୁଛି । ତେଣୁ, ଏବେ ସମସ୍ତଙ୍କ ନଜର ଚଳିତ ଆର୍ଥିକ ବଜେଟ ସମେତ ସୀତାରମଣଙ୍କ ଉପରେ ରହିଛି । ଏହି ପରିପ୍ରେକ୍ଷୀରେ ଯଦି ନିର୍ମଳା ସୀତାରମଣ ବଜେଟ ମାଧ୍ୟମରେ ଦେଶବାସୀଙ୍କୁ ସନ୍ତୁଷ୍ଟ କରିପାରନ୍ତି ଏବଂ ଦେଶର ଅର୍ଥନୀତିକୁ ସୁଧାରିପାରନ୍ତି, ତେବେ ମାର୍ଗାରେଟ ଥାଚରଙ୍କ ପରି ସିଏ ମଧ୍ୟ ଇତିହାସରେ ନିଜର ଏକ ସ୍ୱତନ୍ତ୍ର ସ୍ଥାନ ବଜାୟ ରଖିବେ ।
ଆହୁରି ପଢ଼ନ୍ତୁ; ବଜେଟ ୨୦୨୦: ଇପିଏଫ ସ୍ଲାବରେ ହୋଇପାରେ ଏହି ବଡ଼ ପରିବର୍ତ୍ତନ