ନିଦ ହଜାଇଲା ଦନ୍ତା ହାତୀ, ଟ୍ରାଙ୍କୁଲାଇଜ କରିବାରେ ବିଫଳ ବନବିଭାଗ

ବାରିପଦା: ସହର ଭିତରକୁ ପସିଆସି ଲୋକଙ୍କ ନିଦ ହଜାଇଛି ଦନ୍ତା ହାତୀ । ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ଘୁରିବୁଲିବା ସହ ବନ ବିଭାଗ ଟିମକୁ ନାକେଦମ କରିବାରେ ଲାଗିଛି । ହାତୀଟିକୁ ଟ୍ରାଙ୍କୁଲାଇଜ୍ କରିବାକୁ ଚେଷ୍ଟା କରାଯାଉଥିଲେ ମଧ୍ୟ ଏଯାଏଁ ତାହା ସମ୍ଭବ ହୋଇପାରିନି । ଯାହାକୁ ନେଇ ଲୋକଙ୍କ ମନରେ ଭୟର ବାତାବରଣ ଦେଖାଦେଇଛି ।

ବୁଧବାର ରାତି ସମୟରେ ବାରିପଦା (Baripada) ଏମକେସି ହାଇସ୍କୁଲର ପାଚେରୀ ଭାଙ୍ଗିବା ସମେତ ସ୍କୁଲ ନିକଟରେ ଅନେକ କ୍ଷୟକ୍ଷତି ଘଟାଇଛି ଦନ୍ତାହାତୀ । ହାତୀର ପାଦୃଭାବ ଦେଖିବା ପରେ ସ୍ଥାନୀୟ ଲୋକେ ତୁରନ୍ତ ଏନେଇ ବନବିଭାଗକୁ ଜଣାଇଥିଲେ । ଖବର ପାଇବା ପରେ ବନବିଭାଗ ଟିମ୍ ମଧ୍ୟ ଘଟଣାସ୍ଥଳରେ ପହଞ୍ଚି ହାତୀକୁ ଘଉଡାଇବା ପାଇଁ ଚେଷ୍ଟା କରିଥିଲେ । ହେଲେ ବନ ବିଭାଗ ହାତୀକୁ ଘଉଡାଇବାରେ ଅସଫଳ ହୋଇଥିଲା । ହାତୀଟି ବନବିଭାଗ ଟିମକୁ ନାକେଦମ କରିଥିଲା । ପରେ ହାତୀକୁ ଟ୍ରାଙ୍କୁଲାଇଜ୍ କରିବା ନେଇ ଉଦ୍ୟମ କରାଯାଇଥିଲେ ମଧ୍ୟ ତାହା କରାଯାଇପାରିନଥିଲା । ବନବିଭାଗ ଟିମ ଏବଂ ସାଧାରଣ ଲୋକଙ୍କୁ ଦେଖି ହାତୀଟି ଦୌଡିବାରେ ଲାଗିଥିଲା । ହାତୀଟି କାଳେ କିଛି କ୍ଷୟକ୍ଷତି ଘଟାଇବ ତେଣୁ ଲୋକମାନଙ୍କୁ ଘରେ ରହିବା ପାଇଁ ପ୍ରଶାସନ ପକ୍ଷରୁ କୁହାଯାଇଛି ।