RBI Web Series: ਆਰਬੀਆਈ ਆਪਣੇ 90 ਸਾਲਾਂ ਦੇ ਬੈਕਿੰਗ ਇਤਿਹਾਸ 'ਤੇ ਅਦਾਰਤ ਬਣਾਏਗਾ ਖਾਸ ਵੈੱਬ ਸੀਰੀਜ਼

RBI Web Series: ਆਰਬੀਆਈ ਦੁਆਰਾ ਜਾਰੀ ਅਧਿਕਾਰਤ ਜਾਣਕਾਰੀ ਵਿੱਚ ਕਿਹਾ ਗਿਆ ਹੈ ਕਿ ਰਾਸ਼ਟਰੀ ਟੀਵੀ ਚੈਨਲਾਂ ਤੋਂ ਇਲਾਵਾ, ਇਸ ਵੈੱਬ ਸੀਰੀਜ਼ ਨੂੰ OTT ਪਲੇਟਫਾਰਮ 'ਤੇ ਵੀ ਟੈਲੀਕਾਸਟ ਕੀਤਾ ਜਾ ਸਕਦਾ ਹੈ।

RBI Web Series: ਆਰਬੀਆਈ ਆਪਣੇ 90 ਸਾਲਾਂ ਦੇ ਸਫ਼ਰ 'ਤੇ 5 ਐਪੀਸੋਡਾਂ ਦੀ ਵੈੱਬ ਸੀਰੀਜ਼ ਬਣਾਉਣ ਦੀ ਯੋਜਨਾ ਬਣਾ ਰਿਹਾ ਹੈ, ਜਿਸ ਲਈ ਫਿਲਮ ਨਿਰਮਾਤਾਵਾਂ ਅਤੇ ਪ੍ਰੋਡਕਸ਼ਨ ਕੰਪਨੀਆਂ ਅਤੇ OTT ਪਲੇਟਫਾਰਮਾਂ ਤੋਂ ਪ੍ਰਸਤਾਵ ਮੰਗੇ ਗਏ ਹਨ। ਸਮਾਚਾਰ ਏਜੰਸੀ ਪੀਟੀਆਈ ਦੀ ਇੱਕ ਰਿਪੋਰਟ ਦੇ ਅਨੁਸਾਰ, ਇਸ ਵੈੱਬ ਸੀਰੀਜ਼ ਵਿੱਚ ਆਰਬੀਆਈ ਦੇ ਕੰਮ ਕਰਨ ਦੇ ਤਰੀਕਿਆਂ ਦਾ ਡੂੰਘਾਈ ਨਾਲ ਵਰਣਨ ਕੀਤਾ ਜਾਵੇਗਾ। ਵੈੱਬ ਸੀਰੀਜ਼ ਦੀ ਮਿਆਦ ਲਗਭਗ 3 ਘੰਟੇ ਹੋਵੇਗੀ, ਜੋ ਕਿ ਇਕ ਲੰਬੀ ਫੀਚਰ ਫਿਲਮ ਦੇ ਬਰਾਬਰ ਹੈ। ਇਸ ਨੂੰ 25-30 ਮਿੰਟਾਂ ਦੇ ਪੰਜ ਐਪੀਸੋਡਾਂ ਵਿੱਚ ਵੰਡਿਆ ਜਾਵੇਗਾ।

ਆਰਬੀਆਈ ਦੁਆਰਾ ਜਾਰੀ ਅਧਿਕਾਰਤ ਜਾਣਕਾਰੀ ਵਿੱਚ ਕਿਹਾ ਗਿਆ ਹੈ ਕਿ ਰਾਸ਼ਟਰੀ ਟੀਵੀ ਚੈਨਲਾਂ ਤੋਂ ਇਲਾਵਾ, ਇਸ ਵੈੱਬ ਸੀਰੀਜ਼ ਨੂੰ OTT ਪਲੇਟਫਾਰਮ 'ਤੇ ਵੀ ਟੈਲੀਕਾਸਟ ਕੀਤਾ ਜਾ ਸਕਦਾ ਹੈ। ਦੇਸ਼ ਦੇ ਪ੍ਰਮੁੱਖ ਬੈਂਕ ਨੇ ਇਸ ਸਾਲ ਅਪ੍ਰੈਲ 'ਚ ਸਥਾਪਨਾ ਦੇ 89 ਸਾਲ ਪੂਰੇ ਕਰ ਲਏ ਹਨ। RBI ਦੀ ਨੀਂਹ 1935 ਵਿੱਚ ਰੱਖੀ ਗਈ ਸੀ। 2025 ਵਿੱਚ ਇਹ 90 ਸਾਲ ਦੀ ਹੋ ਜਾਵੇਗੀ। ਵੈੱਬ ਸੀਰੀਜ਼ ਦੇ ਉਤਪਾਦਨ ਅਤੇ ਵੰਡ ਲਈ ਸਬੰਧਤ ਕੰਪਨੀਆਂ ਤੋਂ ਈ-ਟੈਂਡਰਿੰਗ ਰਾਹੀਂ ਪ੍ਰਸਤਾਵ ਮੰਗੇ ਜਾਣਗੇ। ਇਸ ਲੜੀ ਦੇ ਜ਼ਰੀਏ ਆਮ ਆਦਮੀ ਵੀ ਆਰਬੀਆਈ ਬਾਰੇ ਮਹੱਤਵਪੂਰਨ ਜਾਣਕਾਰੀ ਪ੍ਰਾਪਤ ਕਰ ਸਕੇਗਾ। ਦੇਸ਼ ਦੀ ਅਰਥਵਿਵਸਥਾ 'ਚ ਇਸ ਬੈਂਕ ਦੀ ਭੂਮਿਕਾ ਬਾਰੇ ਸਮਝ ਵੀ ਵਧੇਗੀ, ਜਿਸ ਨਾਲ ਭਰੋਸਾ ਕਾਇਮ ਹੋਵੇਗਾ।

ਇਹ ਲੜੀ ਕੇਂਦਰੀ ਬੈਂਕ ਦੇ ਵਿਜ਼ਨ ਅਤੇ ਮਿਸ਼ਨ ਦੀ ਰੂਪਰੇਖਾ ਦੇਵੇਗੀ। ਇਸ ਦੀਆਂ ਪ੍ਰਾਪਤੀਆਂ ਅਤੇ ਪਹਿਲਕਦਮੀਆਂ ਬਾਰੇ ਵੀ ਦੱਸਿਆ ਜਾਵੇਗਾ। ਹਾਲਾਂਕਿ, ਇਸ ਨੂੰ ਦਿਖਾਉਣ ਵੇਲੇ, ਇਸ ਗੱਲ ਦਾ ਧਿਆਨ ਰੱਖਿਆ ਜਾਵੇਗਾ ਕਿ ਇਹ ਮਨੋਰੰਜਕ ਢੰਗ ਨਾਲ ਕੀਤਾ ਗਿਆ ਹੈ, ਤਾਂ ਜੋ ਲੋਕਾਂ ਦੀ ਦਿਲਚਸਪੀ ਬਣੀ ਰਹੇ। ਇਸ ਵਿੱਚ ਆਰਬੀਆਈ ਨੇ ਕਿਹਾ ਕਿ ਇਸ ਲੜੀ ਦਾ ਉਦੇਸ਼ ਗੁੰਝਲਦਾਰ ਆਰਥਿਕ ਸਿਧਾਂਤਾਂ ਨੂੰ ਲੋਕਾਂ ਤੱਕ ਆਸਾਨੀ ਨਾਲ ਪਹੁੰਚਯੋਗ ਬਣਾਉਣਾ ਅਤੇ ਉਨ੍ਹਾਂ ਦੀ ਆਰਥਿਕ ਸਮਝ ਨੂੰ ਵਧਾਉਣਾ ਹੈ। ਜੇਕਰ ਅਸੀਂ ਦਸਤਾਵੇਜ਼ੀ ਸੀਰੀਜ਼ ਦੀ ਗੱਲ ਕਰੀਏ ਤਾਂ ਅਪਰਾਧਿਕ ਘਟਨਾਵਾਂ, ਸਮਾਜਿਕ ਮੁੱਦਿਆਂ ਅਤੇ ਸੱਭਿਆਚਾਰਕ ਵਿਸ਼ਿਆਂ 'ਤੇ ਸਮੱਗਰੀ ਦੀ ਕੋਈ ਕਮੀ ਨਹੀਂ ਹੈ, ਪਰ OTT ਸਪੇਸ ਵਿੱਚ ਆਰਥਿਕ ਮੁੱਦਿਆਂ 'ਤੇ ਬਹੁਤ ਜ਼ਿਆਦਾ ਸਮੱਗਰੀ ਨਹੀਂ ਹੈ। ਬੈਂਕ ਘੁਟਾਲਿਆਂ 'ਤੇ ਕਹਾਣੀਆਂ ਵੀ ਦਿਖਾਈਆਂ ਗਈਆਂ ਹਨ, ਪਰ ਸੰਸਥਾਵਾਂ ਦੇ ਇਤਿਹਾਸ ਬਾਰੇ ਘੱਟ ਹੀ ਗੱਲ ਕੀਤੀ ਗਈ ਹੈ।