ಭರ್ಜರಿ ಬೇಟೆ: 21 ಸಾವಿರ ಕೋಟಿ ರೂ. ಮೌಲ್ಯದ 3 ಸಾವಿರ ಕೆಜಿ ಡ್ರಗ್ಸ್ ವಶಕ್ಕೆ..!

ಗುಜರಾತ್: ಕಂದಾಯ ಗುಪ್ತಚರ ನಿರ್ದೇಶನಾಲಯ (DRI)ದ ಅಧಿಕಾರಿಗಳು ಭರ್ಜರಿ ಬೇಟೆಯಾಡಿದ್ದು, ಬರೋಬ್ಬರಿ 21 ಸಾವಿರ ಕೋಟಿ ರೂ. ಮೌಲ್ಯದ 3 ಸಾವಿರ ಕೆಜಿ ಡ್ರಗ್ಸ್ ವಶಪಡಿಸಿಕೊಂಡಿದ್ದಾರೆ. ಇದು ಭಾರತದಲ್ಲಿಯೇ ವಶಕ್ಕೆ ಪಡೆದ ಅತಿಹೆಚ್ಚು ಮೌಲ್ಯದ ಮಾದಕವಸ್ತು ಪ್ರಕರಣವಾಗಿದೆ. ಕಳೆದ ವಾರ ಗುಜರಾತ್‌ನ ಮುಂದ್ರಾ ಬಂದರಿನಲ್ಲಿ 2 ಕಂಟೇನರ್‌ಗಳನ್ನು ಅಧಿಕಾರಿಗಳು ವಶಪಡಿಸಿಕೊಂಡಿದ್ದರು. ಅದರಲ್ಲಿ ಅಕ್ರಮವಾಗಿ ಸಾಗಿಸುತ್ತಿದ್ದ ಸುಮಾರು 21 ಸಾವಿರ ಕೋಟಿ ರೂ. ಮೌಲ್ಯದ ಡ್ರಗ್ಸ್(Drugs) ಪತ್ತೆಯಾಗಿತ್ತು ಎಂದು ವರದಿಯಾಗಿದೆ. ​

ಡಿಆರ್‌ಐ  ಜಪ್ತಿ(Drugs Seized) ಮಾಡಿರುವ  ಈ ಮಾದಕ ವಸ್ತುಗಳನ್ನು ಭಾರತದಲ್ಲಿ ಹಂಚಿಕೆ ಮಾಡಲು ಅಕ್ರಮವಾಗಿ ಸಾಗಿಸಲಾಗುತ್ತಿತ್ತು ಎಂದು ತಿಳಿದುಬಂದಿದೆ. ಪ್ರಾರಂಭದಲ್ಲಿ ಈ ಡ್ರಗ್ಸ್​ ಮೌಲ್ಯ 3,500  ಕೋಟಿ ರೂ. ಎಂದು ಅಂದಾಜಿಸಲಾಗಿತ್ತು. ಆದರೆ 6 ದಿನಗಳ ತೀವ್ರ ತನಿಖೆಯ ಬಳಿಕ ದೊಡ್ಡ ಪ್ರಮಾಣದ ಹೆರಾಯಿನ್ ಪತ್ತೆಯಾಗಿದ್ದರಿಂದ ಇದರ ಮೌಲ್ಯವು ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ 21 ಸಾವಿರ ಕೋಟಿ ರೂ. ಇದೆ ಎಂದು ಅಂದಾಜಿಸಲಾಗಿದೆ.

ಸದ್ಯ ತಾಲಿಬಾನ್ ಆಳ್ವಿಕೆಯಲ್ಲಿರುವ ಅಫ್ಘಾನಿಸ್ತಾನ(Afghanistan)ದಲ್ಲಿ ತಯಾರಿಸಲಾಗಿರುವ ಹೆರಾಯಿನ್ ಮಾದಕವಸ್ತು ಸರಕನ್ನು ಸೆಪ್ಟೆಂಬರ್ 13-14ರಂದು ಇರಾನ್‌ನ ಅಬ್ಬಾಸ್ ಬಂದರಿನ ಮೂಲಕ ಗುಜರಾತ್‌ಗೆ ರವಾನಿಸಲಾಯಿತು. ಇಷ್ಟು ಪ್ರಮಾಣದ ಡ್ರಗ್ಸ್ ಅನ್ನು ಆಂಧ್ರಪ್ರದೇಶ ಮೂಲದ ಸಂಸ್ಥೆಯಿಂದ ಆಮದು ಮಾಡಿಕೊಂಡ ಅರೆ-ಸಂಸ್ಕರಿಸಿದ ಅಫ್ಘಾನ್ ಟಾಲ್ಕ್ ಪೌಡರ್ ಕಂಟೇನರ್‌ಗಳಲ್ಲಿ ಅಡಗಿಸಲಾಗಿತ್ತು ಎಂದು ತಿಳಿದುಬಂದಿದೆ.

ಇದನ್ನೂ ಓದಿ: ಉಧಂಪುರದಲ್ಲಿ ಸೇನಾ ಹೆಲಿಕಾಪ್ಟರ್ ಪತನ: ಇಬ್ಬರು ಪೈಲಟ್‌ಗಳು ಹುತಾತ್ಮ

ಜಾಗತಿಕ ಉಗ್ರ ಸಂಘಟನೆಗಳಾದ ಐಎಸ್‌ಐ(ISI) ಮತ್ತು ತಾಲಿಬಾನ್(Taliban) ಭಯೋತ್ಪಾದನಾ ಚಟುವಟಿಕೆಗಳಿಗೆ ಹಣ ನೀಡುವ ಏಕೈಕ ಮಾರ್ಗವಾಗಿ ಈ ಡ್ರಗ್ಸ್ ವ್ಯವಹಾರ ನಡೆಯುತ್ತದೆ ಎಂದು ಹೇಳಲಾಗಿದೆ. ಸದ್ಯ ವಶಕ್ಕೆ ಪಡೆಯಲಾಗಿರುವ ಹೆರಾಯಿನ್ ಅತ್ಯುತ್ತಮ ಗುಣಮಟ್ಟದ್ದು ಎಂದು ಮೂಲಗಳಿಂದ ತಿಳಿದುಬಂದಿದೆ.

ಪ್ರಕರಣ ಸಂಬಂಧ ಚೆನ್ನೈ ಮೂಲದ ದಂಪತಿಯನ್ನು ಬಂಧಿಸಲಾಗಿದೆ ಮತ್ತು ದೆಹಲಿ-ರಾಷ್ಟ್ರೀಯ ರಾಜಧಾನಿ ಪ್ರದೇಶದ ಹಲವಾರು ಅಫ್ಘಾನ್ ಪ್ರಜೆಗಳನ್ನು ಏಜೆನ್ಸಿ ಬಂಧಿಸಿದೆ. ಇವರೆಲ್ಲರಿಗೂ ತಾಲಿಬಾನ್-ಐಎಸ್‌ಐ ಸಂಪರ್ಕ ಇರುವ ಶಂಕೆ ಹಿನ್ನೆಲೆ ತೀವ್ರ ವಿಚಾರಣೆ ನಡೆಸಲಾಗುತ್ತಿದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.   

ಇದನ್ನೂ ಓದಿ: ಸ್ಯಾಮ್‌ಸಂಗ್ ಬಿಡುಗಡೆ ಮಾಡಲಿದೆ ಭರ್ಜರಿ 5 ಜಿ ಸ್ಮಾರ್ಟ್‌ಫೋನ್‌, ವೈಶಿಷ್ಟ್ಯಗಳು ಏನಿರಲಿದೆ ಗೊತ್ತಾ ?

ಗುಪ್ತಚರ ಮಾಹಿತಿ ಮೇರೆಗೆ ಡಿಆರ್‌ಐ(DRI) ಅಧಿಕಾರಿಗಳು ಸೆಪ್ಟೆಂಬರ್ 16 ಮತ್ತು 17 ರಂದು ಕಂದಹಾರ್ ಮೂಲದ ಕಂಪನಿಯು ರಫ್ತು ಮಾಡಿದ 2 ಕಂಟೇನರ್‌ಗಳನ್ನು ಶೋಧಿಸಿದಾಗ ಗೊಡ್ಡ ಪ್ರಮಾಣದ ಮಾದಕವಸ್ತು ಪತ್ತೆಯಾಗಿತ್ತು. ಒಂದು ಕಂಟೇನರ್‌ನಲ್ಲಿ 1,999.58 ಕೆಜಿ ಹೆರಾಯಿನ್ ಅನ್ನು ಪ್ಯಾಕ್ ಮಾಡಲಾಗಿದ್ದು, 988.64 ಕೆಜಿ ಹೆರಾಯಿನ್ ಅನ್ನು 1 ದೊಡ್ಡ ಚೀಲದಲ್ಲಿ ಪತ್ತೆ ಮಾಡಲಾಗಿದೆ. ಭದ್ರತಾ ಮತ್ತು ಕಸ್ಟಮ್ಸ್ ಅಧಿಕಾರಿಗಳ ಗಮನಕ್ಕೆ ಬಾರದಿರಲೆಂದು ಅವುಗಳನ್ನು ಅಡಗಿಸಿಡಲಾಗಿತ್ತು. ಸದ್ಯ ಈ ಬಗ್ಗೆ ಅಧಿಕಾರಿಗಳು ಹೆಚ್ಚಿನ ತನಿಖೆ ನಡೆಸುತ್ತಿದ್ದಾರೆ. ಪ್ರಕರಣ ಸಂಬಂಧ ಇನ್ನಷ್ಟು ಜನರನ್ನು ಬಂಧಿಸುವ ನಿರೀಕ್ಷೆ ಇದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.