Ram Mandir: ಭಕ್ತರಿಗಿಲ್ಲ ರಾಮ ಮಂದಿರ ನಿರ್ಮಾಣ ಕಾರ್ಯ ಕಣ್ತುಂಬಿಕೊಳ್ಳುವ ಭಾಗ್ಯ..!

ಅಯೋಧ್ಯೆ: ಭವ್ಯ ರಾಮ ಮಂದಿರ ನಿರ್ಮಾಣ ಕಾರ್ಯಗಳನ್ನು ಕಣ್ತುಂಬಿಕೊಂಡು ಪುನೀತರಾಗಲು ಬಯಸಿರುವ ರಾಮ ಭಕ್ತರಿಗೆ ನಿರಾಶೆಯಾಗುವ ಸುದ್ದಿಯಿದು. ಸುರಕ್ಷತೆಯ ಕಾರಣಗಳಿಂದಾಗಿ ಮಂದಿರ ನಿರ್ಮಾಣ ಕಾರ್ಯಗಳನ್ನು ನೋಡಲು ವೀಕ್ಷಕರಿಗೆ ಪ್ರವೇಶ ನೀಡಲಾಗುವುದಿಲ್ಲ ಎಂದು ಶ್ರೀ ರಾಮಜನ್ಮಭೂಮಿ ಟ್ರಸ್ಟ್‌ ತಿಳಿಸಿದೆ.

'ರಾಮಭಕ್ತರು ರಾಮಮಂದಿ(Ram Mandir)ರ ನಿರ್ಮಾಣ ಕಾರ್ಯಗಳನ್ನು ನೋಡಲು ಬಯಸಿದ್ದಾರೆ. ಆದರೆ, ನಿರ್ಮಾಣ ಸ್ಥಳದಲ್ಲಿ ಬೃಹತ್‌ ಕ್ರೇನ್‌ಗಳು, ಕಲ್ಲು ಪುಡಿ ಮಾಡುವ ಭಾರೀ ಯಂತ್ರಗಳು ಕಾರ್ಯನಿರ್ವಹಿಸುತ್ತಿವೆ. ಇಲ್ಲಿಗೆ ಪ್ರವೇಶಿಸಲು ವೀಕ್ಷಕರಿಗೆ ಅವಕಾಶ ನೀಡಿದರೆ ಅಪಘಾತಗಳು ಸಂಭವಿಸಬಹುದು. ಸುರಕ್ಷತೆಯ ದೃಷ್ಟಿಯಿಂದ ನಿರ್ಮಾಣ ಕಾರ್ಯಗಳನ್ನು ಹತ್ತಿರದಿಂದ ನೋಡಲು ಅವಕಾಶ ನೀಡದೆ ಇರಲು ನಿರ್ಧರಿಸಲಾಗಿದೆ' ಎಂದು ಟ್ರಸ್ಟ್‌ನ ಪ್ರಧಾನ ಕಾರ್ಯದರ್ಶಿ ಚಂಪತ್‌ ರಾಯ್‌ ಹೇಳಿದ್ದಾರೆ.

ರಾಮ ಮಂದಿರ ನಿರ್ಮಾಣ ಕಾರ್ಯವನ್ನು ರಾಮ ಭಕ್ತರು ನಿಗದಿತ ಸ್ಥಳದಿಂದ ನೋಡಲು ಅವಕಾಶ ನೀಡುವುದಾಗಿ ಈ ಹಿಂದೆ ಟ್ರಸ್ಟ್‌ ಹೇಳಿತ್ತು. ಆದರೆ, ಸುರಕ್ಷತೆಯ ಕಾರ್ಯದಿಂದ ಈ ಅವಕಾಶವನ್ನು ನೀಡದೆ ಇರಲು ನಿರ್ಧರಿಸಲಾಗಿದೆ. ದೇಗುಲ ನಿರ್ಮಾಣ ಕಾರ್ಯದ ಪ್ರಗತಿಯನ್ನು ಟ್ರಸ್ಟ್‌ ನಿಯಮಿತವಾಗಿ ಅಪ್‌ಡೇಟ್‌ ಮಾಡಲಿದೆ ಎಂದು ರಾಯ್‌ ಸ್ಪಷ್ಟಪಡಿಸಿದ್ದಾರೆ.