Covid 19 Vaccine: ಮಹಿಳೆಯರು ಈ ಸಮಯದಲ್ಲಿ ಲಸಿಕೆ ಪಡೆಯಬಾರದೇ? ಇಲ್ಲಿದೆ ವೈರಲ್ ಮೆಸೇಜ್ ಹಿಂದಿನ ಸತ್ಯಾಸತ್ಯತೆ

Covid 19 Vaccine For Women: ದೇಶಾದ್ಯಂತ ವೇಗವಾಗಿ ಹೆಚ್ಚುತ್ತಿರುವ ಕರೋನಾ ಪ್ರಕರಣಗಳು ಎಲ್ಲರಲ್ಲೂ ಆತಂಕ ಹೆಚ್ಚಿಸಿವೆ. ಕರೋನವೈರಸ್ ಸೋಂಕನ್ನು ನಿಯಂತ್ರಿಸುವ ಸಲುವಾಗಿ, ಮೇ 1 ರಿಂದ 18 ವರ್ಷಕ್ಕಿಂತ ಮೇಲ್ಪಟ್ಟ ಎಲ್ಲರಿಗೂ ಲಸಿಕೆ ಹಾಕಲು ಕೇಂದ್ರ ಸರ್ಕಾರ ಅನುಮತಿ ನೀಡಿದೆ. ಏತನ್ಮಧ್ಯೆ, ಸಾಮಾಜಿಕ ಜಾಲತಾಣಗಳಲ್ಲಿ ಕರೋನಾ ಲಸಿಕೆಗೆ ಸಂಬಂಧಿಸಿದಂತೆ ಹಲವು ಸಂದೇಶಗಳು ವೈರಲ್ ಆಗುತ್ತಿವೆ. ಈ ಸಂದೇಶಗಳಲ್ಲಿ ಒಂದು ಮಹಿಳೆಯರ ಮುಟ್ಟಿನೊಂದಿಗೆ ಸಂಬಂಧಿಸಿದೆ.

ವಾಸ್ತವವಾಗಿ ಮಹಿಳೆಯರು (Women) ತಮ್ಮ ಪೀರಿಯಡ್ಸ್ ಅಂದರೆ ಮುಟ್ಟಿನ ಐದು ದಿನಗಳ ಮೊದಲು ಮತ್ತು ನಂತರ ಐದು ದಿನಗಳವರೆಗೆ ಕರೋನಾ ಲಸಿಕೆ ಪಡೆಯಬಾರದು ಎಂಬ ಸಂದೇಶ ಇತ್ತೀಚಿಗೆ ಬಾರೀ ವೈರಲ್ ಆಗುತ್ತಿದೆ. ಈ ವೈರಲ್ ಸಂದೇಶದಲ್ಲಿ ಇದು ರೋಗ ನಿರೋಧಕ ಶಕ್ತಿಯನ್ನು ಕಡಿಮೆ ಮಾಡುತ್ತದೆ ಎಂದು ಕೂಡ ಬರೆಯಲಾಗಿದೆ.

ಇದನ್ನೂ ಓದಿ- Corona Vaccine : 18 ವರ್ಷ ಮೇಲ್ಪಟ್ಟ ಎಲ್ಲರಿಗೂ 'ಉಚಿತ ಕೊರೋನಾ ಲಸಿಕೆ'..!

ಮತ್ತೊಂದು ಸಂದೇಶದಲ್ಲಿ, ಕೋವಿಡ್ -19 ಲಸಿಕೆ (Covid 19 Vaccine) ಮಹಿಳೆಯರ ಮುಟ್ಟಿನ ಮೇಲೆ ಪರಿಣಾಮ ಬೀರುತ್ತದೆ ಎಂದು ಹೇಳಲಾಗುತ್ತಿದೆ.

ಆದರೆ ಈ ವೈರಲ್ ಸಂದೇಶದ ಬಗ್ಗೆ ಮಾಹೀತಿ ನೀಡಿರುವ ಪಿಐಬಿ ಇದರ ಹಿಂದಿನ ಸತ್ಯಾಸತ್ಯತೆಯನ್ನು ಬಿಚ್ಚಿಟ್ಟಿದ್ದು ಇದೊಂದು ನಕಲಿ ಸಂದೇಶ ಎಂದು ಸ್ಪಷ್ಟಪಡಿಸಿದೆ.

ಅದೇ ಸಮಯದಲ್ಲಿ, ಯೇಲ್ ಸ್ಕೂಲ್ ಆಫ್ ಮೆಡಿಸಿನ್‌ನ ಡಾ. ರಾಂಡಿ ಹಟ್ಟರ್ ಎಪ್ಸ್ಟೀನ್ ಮತ್ತು ಆಲಿಸ್ ಲು-ಕುಲ್ಲಿಗನ್, "ಕರೋನಾ ಲಸಿಕೆ ಹಾಗೂ ಮುಟ್ಟಿನ ಬದಲಾವಣೆಗಳಿಗೆ ಸಂಬಂಧಿಸಿದಂತೆ ಇದುವರೆಗೂ ಯಾವುದೇ ಅಧ್ಯಯನ ನಡೆದಿಲ್ಲ ಅಥವಾ ಯಾವುದೇ ನಿಖರ ಡೇಟಾ ಲಭ್ಯವಾಗಿಲ್ಲ" ಎಂದು  ಹೇಳಿದ್ದಾರೆ.