Need A Bride: ವಧು ಬೇಕು! `ಇ-ರಿಕ್ಷಾ ಚಾಲಕ ತನಗಾಗಿ ವಧು ಹುಡುಕುತ್ತಿರುವ ಪರಿ ಇದು`

Need A Bride: 'ಮದುವೆ'... ಭಾರತದಲ್ಲಿ ಮದುವೆ ಎಂದರೆ ಒಂದು ಪವಿತ್ರ ಬಂಧನ. ಹಿಂದೆಲ್ಲಾ ಸಂಬಂಧದಲ್ಲೇ ಮದುವೆ ಮಾಡಲಾಗುತ್ತಿತ್ತು. ಅದರಲ್ಲೂ ಕೆಲವರಂತೂ ಸೋದರ ಸಂಬಂಧವನ್ನು ಬಿಟ್ಟು ಬೇರೆಡೆಯಿಂದ ವಧುವನ್ನು ತರುವುದಾಗಲಿ, ಇಲ್ಲವೇ ಹುಡುಗಿಯನ್ನು ಬೇರೆ ಕಡೆಗೆ ಮದುವೆ ಮಾಡಿಕೊಡುವುದನ್ನಾಗಲಿ ಮಾಡುತ್ತಿರಲಿಲ್ಲ. ಆದರೀಗ ಕಾಲಕ್ಕೆ ತಕ್ಕಂತೆ ಜನರು ಕೂಡ ಬದಲಾಗುತ್ತಿದ್ದಾರೆ. ಒಳ್ಳೆಯ ಸಂಬಂಧ ಎಂದರೆ ಕೊಂಚ ದೂರದ ಸಂಬಂಧವಾದರೂ ಪರಸ್ಪರ ಸಂಬಂಧ ಬೆಳೆಸುತ್ತಿದ್ದಾರೆ. ಇದರ ಹೊರತಾಗಿ ತಂತ್ರಜ್ಞಾನ ಬೆಳೆದಂತೆ ಆನ್‌ಲೈನ್‌ನಲ್ಲಿಯೂ ವಧು-ವರರ ವೇದಿಕೆಗಳು ತಲೆಯೆತ್ತತೊಡಗಿದ್ದು, ಮ್ಯಾಟ್ರಿಮೋನಿ ಮೂಲಕವೂ ವಧು-ವರರನ್ನು ಹುಡುಕಲಾಗುತ್ತಿದೆ. ಆದರಿಲ್ಲೊಬ್ಬ ಯುವಕ ಇ-ರಿಕ್ಷಾದಲ್ಲಿ ವಿಶೇಷವಾಗಿ ವಧುವಿಗಾಗಿ ಹುಡುಕಾಟ ನಡೆಸುತ್ತಿದ್ದು, ಸದ್ಯ ಈ ದೃಶ್ಯ ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗಿದೆ. 

ಈ ಮೇಲ್ಕಂಡ ಚಿತ್ರದಲ್ಲಿ ಕಾಣಿಸುತ್ತಿರುವ ಯುವಕನ ಹೆಸರು ದೀಪೇಂದ್ರ ರಾಥೋಡ್. 29 ವರ್ಷದ ದೀಪೇಂದ್ರ ರಾಥೋಡ್ ತನಗಾಗಿ ವಧುವನ್ನು ಹುಡುಕಲು ವಿಶಿಷ್ಟವಾದ ವಿಧಾನವನ್ನು ಅನುಸರಿಸಿದ್ದಾರೆ. ಇ-ರಿಕ್ಷಾ ಚಾಲನೆ ಮಾಡಿ ಬದುಕಿನ ಬಂಡಿ ದೂಡುತ್ತಿರುವ ಈತ ಮದುವೆಗಾಗಿ ಹುಡುಗಿಯನ್ನು ಹುಡುಕುತ್ತಿದ್ದು, ತನ್ನ ಇ-ರಿಕ್ಷಾದಲ್ಲಿಯೇ ತನ್ನ ಬಗೆಗಿನ ವೈಯಕ್ತಿಕ (ಎತ್ತರ, ಜನ್ಮ ದಿನಾಂಕ ಮತ್ತು ಗೋತ್ರದಂತಹ ) ಮಾಹಿತಿಗಳನ್ನು ಪ್ರದರ್ಶಿಸುತ್ತಿದ್ದಾನೆ. 

ಇದನ್ನೂ ಓದಿ- 103ನೇ ವಯಸ್ಸಿನಲ್ಲಿ 3ನೇ ಮದುವೆಯಾದ ತಾತ..! ವಧುವಿನ ವಯಸ್ಸು ಎಷ್ಟು ಗೊತ್ತೆ?

ಈ ಬಗ್ಗೆ ಪ್ರತಿಕ್ರಿಯಿಸಿರುವ ದೀಪೇಂದ್ರ ರಾಥೋಡ್, ನನ್ನ ಮದುವೆಯ ವಯಸ್ಸು ಮೀರುತ್ತಿದೆ. ಆದರೆ, ಸಮಾಜದಲ್ಲಿ ಹೆಣ್ಣು ಮಕ್ಕಳ ಕೊರತೆಯಿಂದಾಗಿ ನನಗೆ ಸಂಗಾತಿ ಸಿಗುತ್ತಿಲ್ಲ. ಹಾಗಾಗಿ, ಈ ಉಪಾಯ ಮಾಡಿರುವುದಾಗಿ ತಿಳಿಸಿದ್ದಾರೆ. ಮಾತ್ರವಲ್ಲದೆ, ತನಗೆ ಮದುವೆಯಾಗಲು ಯಾವುದೇ ಜಾತಿ, ಧರ್ಮದ ಭೇದವಿಲ್ಲ. ನನ್ನ (ದೀಪೇಂದ್ರ ರಾಥೋಡ್)  ವೈಯಕ್ತಿಕ ಮಾಹಿತಿಯನ್ನು ಇಲ್ಲಿ ಉಲ್ಲೇಖಿಸಲಾಗಿದ್ದು ನನ್ನ ಮದುವೆಯ ಪ್ರಸ್ತಾಪವನ್ನು ಒಪ್ಪಿಕೊಳ್ಳುವ ಯಾವುದೇ ಮಹಿಳೆ ತನ್ನನ್ನು ಸಂಪರ್ಕಿಸಬಹುದು ಎಂದು ಹೇಳಿದ್ದಾರೆ. 

ಇದನ್ನೂ ಓದಿ- Viral News: ಮದುವೆ ಹೆಸರಲ್ಲಿ ಅನೇಕರಿಗೆ ಟೋಪಿ ಹಾಕಿದ ವಂಚಕಿ, ಎಷ್ಟು ಮದುವೆಯಾಗಿದ್ಲು ಗೊತ್ತಾ?

ದೀಪೇಂದ್ರ ರಾಥೋಡ್ ಅವರ ಈ ನಡೆಯನ್ನು ಅವರ ಪೋಷಕರೂ ಕೂಡ ಬೆಂಬಲಿಸಿದ್ದಾರೆ. ಜೊತೆಗೆ ತಮ್ಮ ಮಗನಿಗೆ ಬೇಗ ವಧು ದೊರೆಯುವಂತಾಗಲಿ ಎಂದು ಅವರು ವ್ರತ ಪೂಜೆಗಳನ್ನು ಮಾಡುತ್ತಿದ್ದಾರೆ ಎನ್ನಲಾಗಿದೆ.