Sabarimala Pilgrims Accident: ശബരിമല തീർഥാടകരുടെ വാഹനം തോട്ടിലേക്ക് മറിഞ്ഞ് മൂന്നുപേർക്ക് പരിക്ക്; അപകട കാരണം ഡ്രൈവർ ഉറങ്ങി പോയത്

പത്തനംതിട്ട: ശബരിമല തീർഥാടകരുടെ വാഹനം തോട്ടിലേക്ക് മറിഞ്ഞ് മൂന്നുപേർക്ക് പരിക്ക്. എരുമേലിയ്ക്ക് സമീപം മുക്കൂട്ടുത്തറയിൽ ഞായറാഴ്ച പുലർച്ചെ നാലരയോടെയാണ് അപകടം. അപകടത്തിൽ ബംഗളൂരു സ്വദേശികളായ മൂന്ന് പേർക്ക് പരിക്കേറ്റു.

മണികണ്ഠൻ, തൃപ്പണ്ണൻ, ശ്രീകാന്ത് എന്നിവർക്കാണ് പരിക്കേറ്റത്. രണ്ട് പേരെ എരുമേലിയിലെ സ്വകാര്യ ആശുപത്രിയിലും ഒരാളെ കോട്ടയം മെഡിക്കൽ കോളേജിലും പ്രവേശിപ്പിച്ചു. ഡ്രൈവർ ഉറങ്ങിപ്പോയതാണ് അപകട കാരണം.

ശബരിമല തീർഥാടനം കഴിഞ്ഞ് ബെം​ഗളൂരുവിലേക്ക് മടങ്ങുന്നതിനിടെ മുക്കൂട്ടുതറയിൽ വളവ് തിരിഞ്ഞ് വരവേയാണ് നിയന്ത്രണം വിട്ട വാഹനം തോട്ടിലേക്ക് തലകീഴായി മറിഞ്ഞത്. സമീപത്തുണ്ടായിരുന്ന മോട്ടോർ വാഹന വകുപ്പ് സേഫ് സോൺ അധികൃതരാണ് അപകടത്തിൽപ്പെട്ടവരെ രക്ഷിച്ചത്.

ശ്രീകാന്തിനെ കോട്ടയം മെഡിക്കൽ കോളേജ് ആശുപത്രിയിലും മറ്റ് രണ്ട് പേരെ എരുമേലിയിലെ സ്വകാര്യ ആശുപത്രിയിലും പ്രവേശിപ്പിച്ചിരിക്കുകയാണ്. ആരുടെയും പരിക്ക് ​ഗുരുതരമല്ലെന്നാണ് വിവരം. ഡ്രൈവർ ഉറങ്ങിപ്പോയതിനാലാണ് വാഹനത്തിന്റെ നിയന്ത്രണം നഷ്ടമായതെന്നാണ് മോട്ടോർ വാഹന വകുപ്പ് ഉദ്യോ​ഗസ്ഥരുടെ നി​ഗമനം.