Sri Krishna Janmashtami: ഇന്ന് ശ്രീകൃഷ്ണ ജയന്തി; നാടും ന​ഗരവും ജന്മാഷ്ടമി ആഘോഷിക്കാൻ ഒരുങ്ങി കഴിഞ്ഞു

Janmashtami 2024: ഇന്ന് ശ്രീകൃഷ്ണ ജയന്തി.... നാടും ന​ഗരവും ജന്മാഷ്ടമി ആഘോഷങ്ങൾ‌ക്കായി ഒരുങ്ങി കഴിഞ്ഞു.  ഉണ്ണിക്കണ്ണന്മാരും രാധമാരും ഗോപികമാരുമെല്ലാം ചേർന്ന് വീഥികൾ അമ്പാടിയാക്കുന്ന ദിനം.  

ശോഭായാത്രയ്ക്ക് വിവിധ തരത്തിലുള്ള നിശ്ചല ദൃശ്യങ്ങൾ, ഭജന സംഘങ്ങളും അകമ്പടിയേകും. ശോഭായാത്രയ്‌ക്ക് നിറപ്പകിട്ടേകാൻ നിരവധി ബാലികാബാലന്മാർ കൃഷ്ണനെയും രഥയായും ഗോപികയായുമൊക്കെ എത്തും.   ജന്മാഷ്ടമിയെ വരവേൽക്കാൻ ബാലഗോകുലം വലിയ ഒരുക്കങ്ങളാണ് ഒരുക്കിയിരിക്കുന്നത്.

ഇത്തവണ 'പുണ്യമീ മണ്ണ്‌ പവിത്രമീ ജന്മം' എന്ന സന്ദേശത്തിലൂന്നിയാണ് ബാലഗോകുലം ശ്രീകൃഷ്ണ ജയന്തി ആഘോഷിക്കുന്നത്.  അഷ്ടമിരോഹിണി ദിനമായ ഇന്ന് ഗുരുവായൂരിൽ തിരക്കേറും.  രാവിലെ 9 മണിയോടെ പ്രസാദം ഊട്ട് ആരംഭിക്കും.  ഭഗവാന് നിവേദിച്ച പാൽപ്പായസമുൾപ്പെടെയുള്ള വിശേഷാൽ പ്രസാദ ഊട്ടാണ് ഇന്ന് നടക്കുന്നത്.

പ്രസിദ്ധമായ ആറന്മുള വള്ളസദ്യയും ഇന്നാണ്.   11 മണിയോടെ കേന്ദ്ര മന്ത്രി സുരേഷ് ഗോപി ഉദ്‌ഘാടനം ചെയ്യും.  വയനാട് ദുരന്തത്തിന്റെ പശ്ചാത്തലത്തിൽ വയനാട്ടിൽ ആഘോഷങ്ങൾ ഒഴിവാക്കിയിട്ടുണ്ട്. സംസ്ഥാനത്ത് ആർഭാടങ്ങൾ ഒഴിവാക്കി ഭക്തിസാന്ദ്രമായിട്ടായിരിക്കും ഇത്തവണത്തെ ശോഭായാത്ര.