Case Against Beena Antony Swasika and Manoj: സ്ത്രീത്വത്തെ അപമാനിച്ചെന്ന പരാതി: സ്വാസിക, ബീന ആന്റണി, മനോജ്, എന്നിവർക്കെതിരെ കേസ്

കൊച്ചി: യൂട്യൂബ് ചാനലിലൂടെ സ്ത്രീത്വത്തെ അപമാനിച്ചെന്ന പരാതിയില്‍ നടിമാരായ സ്വാസിക, ബീന ആന്റണി, ബീനാ ആന്റണിയുടെ ഭര്‍ത്താവും നടനുമായ മനോജിനുമെതിരെ കേസെടുത്ത് പോലീസ്. കേസെടുത്തത് നെടുമ്പാശേരി പോലീസാണ്. 

ആലുവ സ്വദേശിയായ നടിയുടെ പരാതിയിലാണ് പോലീസ് മൂവർക്കെതിരെ നടപടി എടുത്തിരിക്കുന്നത്.  കേസിൽ ബീന ആന്റണി ഒന്നാംപ്രതിയും, ഭര്‍ത്താവ് മനോജ് രണ്ടാം പ്രതിയും, സ്വാസിക മൂന്നാം പ്രതിയുമാണ്. പ്രമുഖ നടന്മാര്‍ക്കെതിരെ ലൈംഗികാതിക്രമ ആരോപണം ഉന്നയിച്ച നടിയാണ് താരങ്ങള്‍ക്കെതിരെയും പരാതി നല്‍കിയിരിക്കുന്നത്.  മൂവർക്കുമെതിരെ ജാമ്യം ലഭിക്കാനുള്ള വകുപ്പുകളാണ് ചുമത്തിയിരിക്കുന്നത്. 

യൂട്യൂബിലൂടെ തന്നെ അപമാനിക്കാന്‍ ശ്രമിച്ചുവെന്ന് കാണിച്ച് ബീനാ ആന്റണിക്കും മനോജിനും സ്വാസികയ്ക്കുമെതിരെ കഴിഞ്ഞ ആഴ്ചയാണ് ആലുവ സ്വദേശിനിയായ നടി പരാതി നല്‍കിയിരിക്കുന്നത്. പ്രമുഖ നടന്മാര്‍ക്കെതിരെ പരാതി നല്‍കിയതിന്റെ വൈരാഗ്യത്തില്‍ താരങ്ങള്‍ യൂട്യൂബ് ചാനലിലൂടെ തന്നെ അപമാനിക്കാന്‍ ശ്രമിച്ചുവെന്നാണ് നടി തന്റെ  പരാതിയിലൂടെ വ്യക്തമാക്കിയിരിക്കുന്നത്. ഈ പരാതിയിന്മേലാണ് പോലീസിന്റെ നടപടി. 

നേരത്തേ ഹേമാ കമ്മിറ്റി റിപ്പോർട്ട് പുറത്തുവന്നതിന് പിന്നാലെ മലയാള സിനിമയിലെ പ്രമുഖ നടന്മാര്‍ക്കെതിരെ ലൈംഗികാരോപണ പരാതിയുമായി ഈ നടി രംഗത്തെത്തിയിരുന്നു. നടന്മാരായ ഇടവേള ബാബു, മുകേഷ്, മണിയന്‍പിള്ള രാജു, ജയസൂര്യ, ജാഫര്‍ ഇടുക്കി, സംവിധായകനും നടനുമായ ബലചന്ദ്രമേനോന്‍ എന്നിവര്‍ക്കെതിരെയായിരുന്നു നടി പരാതി നൽകിയത്. ഇവരുടെ പരാതിയില്‍ നടന്മാര്‍ക്കെതിരെ പോലീസ് കേസെടുക്കുകയുമുണ്ടായി. ഇതിനുപിന്നാലെയാണ് ഇവർക്കെതിരെ സമൂഹ മാധ്യമങ്ങളിലൂടെ ബീനാ ആന്റണിയും ഭർത്താവ് മനോജും സ്വാസികയും യൂട്യൂബ് ചാനലിലൂടെ നടിയെ അപമാനിച്ചുവെന്ന ആരോപണവുമായി നടി കേസ് കൊടുത്തത്.  ഇതിനിടയിൽ  ഫോണില്‍ വിളിച്ച് ബ്ലാക്ക് മെയില്‍ ചെയ്തുവെന്നുമാരോപിച്ച് നടിക്കെതിരെ ബാലചന്ദ്രമേനോനും പോലീസില്‍ പരാതി നല്‍കിയിരുന്നു. ഇതിന്റെ അടിസ്ഥാനത്തില്‍ പോലീസ് കേസെടുത്തിട്ടുമുണ്ട്.