Kattappana: കട്ടപ്പന ഇരട്ടക്കൊലപാതകം; വിജയന്റേതെന്ന് സംശയിക്കുന്ന മൃതദേഹം കണ്ടെത്തി

ഇടുക്കി: കട്ടപ്പന ഇരട്ടക്കൊലപാതകത്തിൽ വിജയന്റേതെന്ന് സംശയിക്കുന്ന മൃതദേഹ അവശിഷ്ടങ്ങൾ കണ്ടെത്തി. വീടിനുള്ളിൽ കുഴിച്ചിട്ട നിലയിലാണ് മൃതദേഹം കണ്ടെത്തിയത്. പ്രാഥമിക പോസ്റ്റ്‌മോർട്ടം സംഭവ സ്ഥലത്ത് നടത്തും. വിദഗ്ധ പരിശോധനകൾക്കായി കോട്ടയം മെഡിക്കൽ കോളേജിലേയ്ക്ക് മാറ്റും. കുട്ടിയുടെ മൃതദേഹം മറവ് ചെയ്തിടത്തും ഉടൻ പരിശോധന നടത്തും.

മാർച്ച്‌ 2ന് മോഷണ കേസുമായി ബന്ധപ്പെട്ട് നടന്ന അന്വേഷണമാണ് ഇരട്ടക്കൊലപാതകത്തിലേയ്ക്ക് സൂചനകൾ നൽകിയത്. അറസ്റ്റിലായ നിധീഷ്, വിഷ്ണു എന്നിവരുടെ നേതൃത്വത്തിലായിരുന്നു കൃത്യങ്ങൾ നടന്നത്. വിഷ്ണുവിന്റെ പിതാവ് വിജയനെ ഏതാനും മാസങ്ങൾക്ക് മുമ്പ് ചുറ്റിക കൊണ്ട് അടിച്ചു കൊലപ്പെടുത്തുകയായിരുന്നു. തുടർന്ന് മൃതദേഹം വീടിനുള്ളിൽ കുഴിച്ചിട്ടു. 

വിജയന്റെ ഭാര്യയുടെ അറിവോടെയാണ് നിധീഷ് കൃത്യം നിർവ്വഹിച്ചത്. കാക്കട്ട്കടയിലെ വാടക വീട്ടിൽ കുഴിച്ചിട്ട മൃതദേഹം പൂർണ്ണമായും പുറത്തെടുത്തു. ചെറിയ കുഴിയിൽ ഇരിയ്ക്കുന്ന അവസ്ഥയിൽ മടക്കിയ നിലയിലാണ് മൃതദേഹം കണ്ടെത്തിയത്. പ്രാഥമിക പോസ്റ്റ്മോർട്ടത്തിന് ശേഷം മൃതദേഹം കോട്ടയത്തേയ്ക്ക് മാറ്റും. കട്ടപ്പനയിൽ മുമ്പ് ഇവർ താമസിച്ചിരുന്ന വീട്ടിൽ മറവ് ചെയ്ത നവജാത ശിശുവിന്റെ മൃതദേഹവും കണ്ടെത്താനുള്ള നടപടികൾ ഉടൻ ആരംഭിയ്ക്കും.