Sexual Abuse: ഗോവയിൽ പരിചയപ്പെട്ട വിദേശ വനിതയെ ദുബായിൽ വിളിച്ചു വരുത്തി പീഡനം; ഒരാൾ അറസ്റ്റിൽ

ഷൊർണൂർ: മലയാളി യുവാവിനൊപ്പം ഷൊർണൂരിൽ കഴിയുകയായിരുന്ന വിദേശ വനിതയെ ദുബൈയിലെ ഫ്ലാറ്റിലേക്ക് വിളിച്ചു വരുത്തി പീഡിപ്പിച്ച കേസിൽ മഹാരാഷ്ട്ര സ്വദേശി അറസ്റ്റിൽ. മുപ്പതുകാരനായ മുംബൈ ജോഗേശ്വരി വെസ്റ്റ് മെഡോ പാർക്കിലെ സൊഹൈൽ ഇഖ്ബാൽ ചൗധരിയാണ് പിടിയിലായത്.  

ഷൊർണൂർ ഡി.വൈ.എസ്.പിയുടെ നേതൃത്വത്തിലുള്ള സംഘം നടത്തിയ അന്വേഷണത്തിലാണ് ഗോവയിൽ നിന്നും പ്രതിയെ പിടികൂടിയത്.  സംഭവം നടന്നത് മെയ് 12 ന് ദുബൈയിൽ വച്ചായിരുന്നു. ബ്രസീലിയൻ മോഡലായ യുവതിയെ ഗോവയിൽ വച്ചാണ് പ്രതിയുൾപ്പടെയുള്ള രണ്ടു പേർ പരിചയപ്പെടുന്നത്. 

ശേഷം യുവതി ദുബൈയിലുണ്ടെന്ന് മനസിലാക്കിയ പ്രതികൾ ഫ്ലാറ്റിൽ പാർട്ടിക്കു ക്ഷണിക്കുകയും തുടർന്ന് അവർക്ക് എന്തോ   സ്പെഷ്യൽ പാനീയം നൽകി മയക്കിയ ശേഷം പീഡിപ്പിച്ചെന്നാണ് കേസ്. കൊച്ചിയിൽ തിരിച്ചെത്തിയ യുവതി നഗരത്തിലെ സ്വകാര്യ ആശുപത്രിയിൽ ചികിത്സ തേടിയ ശേഷം പരാതിയുമായി ചേരാനല്ലൂർ പോലീസിനെ സമീപിച്ചുവെന്നാണ് റിപ്പോർട്ട്.. 

ആദ്യ ഘട്ടത്തിൽ കൊച്ചി എസിപി അന്വേഷിച്ച കേസ് തുടരന്വേഷണത്തിന് ഷൊർണൂരിലേക്കു കൈമാറുകയും തുടർന്ന് ഡിവൈഎസ്പി പി.സി.ഹരിദാസന്‍റെ നേതൃത്വത്തിലുള്ള പ്രത്യേക സംഘം നടത്തിയ അന്വേഷണത്തിൽ പ്രതി ചൗധരി പിടിയിലാവുകയുമായിരുന്നു. ഇയാൾ കേസലെ രണ്ടാം പ്രതിയാണ്.  ഒന്നാം പ്രതിക്കായി ഊർജ്ജിത അന്വേഷണം നടക്കുന്നുണ്ടെന്നും പോലീസ് അറിയിച്ചു. യുവതി കഴിഞ്ഞ രണ്ട് വർഷമായി ഷൊർണൂർ സ്വദേശിയായ യുവാവിനൊപ്പമാണ് കഴിയുന്നത്.