Suicide: കാഞ്ഞങ്ങാട്ട് ഒരുകുടുംബത്തിലെ മൂന്നുപേർ മരിച്ചനിലയിൽ

കാഞ്ഞങ്ങാട്: ആവിക്കരയില്‍ ഒരു കുടുംബത്തിലെ മൂന്നുപേരെ വീട്ടിനുള്ളില്‍ മരിച്ച നിലയില്‍ കണ്ടെത്തിയതായി റിപ്പോർട്ട്. കാഞ്ഞങ്ങാട്ടെ സൂര്യ വാച്ച് വര്‍ക്‌സ് ഉടമയായ പികെ സൂര്യപ്രകാശ്, ഭാര്യ കെ.ഗീത സൂര്യപ്രകാശിന്റെ അമ്മ കെ.ലീല എന്നിവരെയാണ് ശനിയാഴ്ച രാവിലെ വീട്ടിനുള്ളിൽ മരിച്ചനിലയില്‍ കണ്ടെത്തിയത്.

പ്രാഥമിക നിഗമനം അനുസരിച്ചു സൂര്യപ്രകാശ് അമ്മയേയും ഭാര്യയേയും കഴുത്തുഞെരിച്ച് കൊലപ്പെടുത്തിയ ശേഷം തൂങ്ങി മരിച്ചുവെന്നാണ്.  സാമ്പത്തിക ബുദ്ധിമുട്ടുണ്ടെന്ന് വ്യക്തമാക്കുന്ന കുറിപ്പുകൾ സൂര്യപ്രകാശ് എഴുതിവെച്ചതായും സൂചനയുണ്ട്.  ശനിയാഴ്ച പുലര്‍ച്ചെ അഞ്ചുമണിയോടെ എറണാകുളത്തുള്ള മകന്‍ അജയ്പ്രകാശിനെ സൂര്യപ്രകാശ് വിളിക്കുകയും അമ്മമ്മയും അമ്മയും പോയെന്നും ഞാനും പോകുന്നുവെന്ന് പറഞ്ഞതായിട്ടാണ് ബന്ധുക്കള്‍ പറയുന്നത്. ഇതിനു ശേഷം അജയ്പ്രകാശ് വിളിച്ചു പറഞ്ഞതിന്റെ അടിസ്ഥാനത്തിൽ ആവിക്കരയിലെ സുഹൃത്ത് സൂര്യപ്രകാശും കുടുംബവും താമസിക്കുന്ന വാടകവീട്ടിലെത്തി നോക്കിയപ്പോഴായിരുന്നു മൂവരേയും മരിച്ചനിലയില്‍ കണ്ടത്.

സൂര്യപ്രകാശിന്റെ ഭാര്യ ഗീതയുടെ മൃതദേഹം കിടപ്പുമുറിയിലും.  ഇയാളുടെ അമ്മയുടെ മൃതദേഹം വീട്ടിലെ മറ്റൊരുമുറിയിലും സൂര്യപ്രകാശ് അടുക്കളയില്‍ തൂങ്ങി മരിച്ചനിലയിലുയിരുന്നു. സംഭവത്തില്‍ കാഞ്ഞങ്ങാട് ഡിവൈ.എസ്.പി. എം.പി.വിനോദിന്റെ നേതൃത്വത്തിലുള്ള സംഘം സ്ഥലത്തെത്തി മേല്‍നടപടികള്‍ സ്വീകരിച്ചുവരികയാണ്.