Health Department: അനധികൃതമായി ജോലിക്ക് ഹാജരാകാതെ ഡോക്ടർമാർ, പട്ടിക പരസ്യപ്പെടുത്തി ആരോഗ്യവകുപ്പ്; സർവീസിൽ നിന്ന് പിരിച്ചുവിടും

തിരുവനന്തപുരം: അനധികൃതമായി ജോലിക്ക് ഹാജരാകാത്ത ഡോക്ടർമാരുടെ പേരുവിവരങ്ങൾ പ്രസിദ്ധീകരിച്ചു. ആരോ​ഗ്യവകുപ്പാണ് ഡോക്ടർമാരുടെ പേരുവിവരങ്ങൾ പ്രസിദ്ധീകരിച്ചത്. ഡോക്ടർമാരുടെ പേര്, വിലാസം, ജോലി ചെയ്തിരുന്ന ആശുപത്രി എന്നിവ ഉൾപ്പെടെ പത്രങ്ങളിൽ പരസ്യം നൽകിയിട്ടുണ്ട്. എന്നുമുതലാണ് ജോലിക്ക് ഹാജരാകാതെയിരുന്നതെന്നും പരസ്യത്തിൽ വ്യക്തമാക്കിയിട്ടുണ്ട്.

ഇവരെ സർവീസിൽ നിന്ന് പിരിച്ചുവിടുന്നതിന് മുന്നോടിയായാണ് പരസ്യം നൽകിയിരിക്കുന്നത്. അനധികൃതമായി ജോലിക്ക് ഹാജരാകാത്തവരെ 15 ദിവസത്തിനുള്ളിൽ പിരിച്ചുവിടുമെന്നും വ്യക്തമാക്കിയിട്ടുണ്ട്. മെഡിക്കൽ കോളേജുകളിലെ ഡോക്ടർമാരുടെ പേരുവിവരങ്ങളാണ് ഇപ്പോൾ പുറത്തുവിട്ടിരിക്കുന്നത്. അനധികൃതമായി ജോലിക്ക് ഹാജരാകാത്തവർക്ക് ആരോ​ഗ്യവകുപ്പ് പലതവണ മുന്നറിയിപ്പ് നൽകിയിരുന്നു.

തിരികെ സർവീസിൽ പ്രവേശിക്കാൻ പലതവണ നിർദേശം നൽകിയിട്ടും സർവീസിൽ പ്രവേശിക്കാത്തവരെയാണ് സർവീസിൽ നിന്ന് പുറത്താക്കുന്നത്. സംസ്ഥാനത്ത് ഡോക്ടർമാരുടെ കുറവ് രോ​ഗീപരിചരണത്തെ ബാധിച്ചതോടെയാണ് ആരോ​ഗ്യമന്ത്രി തന്നെ ഇടപെട്ട് കടുത്ത നടപടിക്ക് നിർദേശം നൽകിയത്.

പലരും നീണ്ട അവധിയെടുത്ത് വിദേശത്ത് പോകുകയും സ്വകാര്യ ആശുപത്രികളിൽ ജോലി ചെയ്യുകയും ചെയ്യുന്നത് മൂലമാണ് തിരികെ സർവീസിൽ പ്രവേശിക്കാതിരുന്നത്. ഉയർന്ന ശമ്പളവും മറ്റ് ആനുകൂല്യങ്ങളും ലഭിക്കുന്നതിനാൽ സർക്കാർ സർവീസിലേക്ക് മടങ്ങാതിരിക്കുന്നവരാണ് ഭൂരിഭാ​ഗവും.

വിരമിക്കുന്നതിന് മുൻപ് ജോലിയിൽ വീണ്ടും പ്രവേശിച്ച് പെൻഷൻ ഉറപ്പാക്കുന്ന പ്രവണതയും ഉണ്ട്. ഇനി ഇത്തരം കാര്യങ്ങൾ അനുവദിക്കാൻ കഴിയില്ലെന്നാണ് സർക്കാർ നിലപാട്. ഡോക്ടർമാർ ഉൾപ്പെടെ രണ്ടായിരത്തോളം ജീവനക്കാരാണ് ആരോ​ഗ്യ വകുപ്പിൽ നിന്ന് അനധികൃതമായി അവധി എടുത്തിരിക്കുന്നത്.