Arjun Rescue Operation: 8 കി.മീ അകലെനിന്നും തടി കണ്ടെത്തി; അടിയൊഴുക്ക് ശക്തം, ദൗത്യം നീളുന്നു

ഷിരൂരിൽ അർജുനായുള്ള തിരച്ചിൽ നിർണായക ഘട്ടത്തിൽ എത്തി നിൽക്കുകയാണ്. ഡ്രോൺ ഉപയോ​ഗിച്ചുള്ള പരിശോധന തുടങ്ങി. പരിശോധനയിൽ അർജുന്റെ ലോറിയിൽ ഉണ്ടായിരുന്നുവെന്ന് കരുതപ്പെടുന്ന തടി കണ്ടെത്തി. 4 കഷ്ണം തടിയാണ് കണ്ടെത്തിയത്. 8 കിലോമീറ്റർ മാറിയാണ് തടി കണ്ടെത്തിയതെന്ന് ലോറി ഉടമ മനാഫ്.

അതേസമയം രക്ഷാദൗത്യം പിന്നെയും നീളുകയാണ്. പുഴയിലെ ശക്തമായ അടിയൊഴുക്കാണ് ഇതിന് കാരണം. നാവിക സേനയുടെ മുങ്ങൽ വിദ​ഗ്ധർക്ക് പുഴയ്ക്കടിയിലേക്ക് ഇറങ്ങാനാകുന്നില്ലെന്ന് നാവിക സേന വ്യക്തമാക്കി. ഡൈവർമാർക്ക് ട്രക്കിന് മുകളിലായി ഡിങ്കി ബോട്ടുകൾ നിലനിർത്താനും കഴിയുന്നില്ലെന്നാണ് വിവരം.

അതേസമയം ട്രക്കിന്റെ ക്യാബിൻ കണ്ടെത്താൻ ഡ്രോൺ പറത്തിയുള്ള പരിശോധന നടക്കുകയാണ്. ഈ പരിശോധനയിൽ പുഴയ്ക്കടിയിലെ ട്രക്കിന്റെ സ്ഥാനവും എങ്ങനെയാണ് അതിന്റെ കിടപ്പെന്നും മനസിലാകും. എന്നാൽ മനുഷ്യസാന്നിധ്യം കണ്ടെത്താൻ ഈ ഡ്രോൺ പരിശോധനയിൽ സാധിക്കില്ലെന്നാണ് നാവികസേന വ്യക്തമാക്കുന്നത്. അത് സാധിച്ചില്ലെങ്കിൽ ദൗത്യം ഇനിയും നീളാനാണ് സാധ്യത.