Ayodhya Ram Mandir: ചൂട് കൂടി വരുകയല്ലേ...! ഇനിയങ്ങോട്ട് രാം ലല്ല പ്രകൃതിദത്ത കോട്ടൺ വസ്ത്രങ്ങൾ മാത്രമാണ് ധരിക്കുക; ചിത്രങ്ങളുമായി ട്രസ്റ്റ്

ചൂട് കൂടി വരുന്ന സാഹചര്യത്തിൽ അയോധ്യയിലെ രാം ലല്ലയുടെ വസ്ത്രധാരണത്തിൽ കൊണ്ടുവന്ന മാറ്റങ്ങളാണ് ഇപ്പോൾ ശ്രദ്ധ നേടുന്നത്. പ്രകൃതിദത്ത കോട്ടൺ കൈത്തറികൊണ്ട് നിർമ്മിച്ച വസ്ത്രങ്ങളണിഞ്ഞ രാംലല്ലയുടെ ചിത്രങ്ങളാണ് ഇപ്പോൾ സോഷ്യൽ മീഡിയയിൽ വൈറൽ ആയി കൊണ്ടിരിക്കുന്നത്. ശ്രീറാം ട്രസ്റ്റാണ് രാംലല്ലയുടെ ഈ പുത്തൻ ചിത്രങ്ങൾ സമൂഹമാധ്യമങ്ങളിൽ പങ്കുവെച്ചത്.  ദേശീയ മാധ്യമങ്ങൾ അടക്കം ഈ വാർത്ത റിപ്പോർട്ട് ചെയ്തിട്ടുണ്ട്. 

ട്രസ്റ്റ് ചിത്രങ്ങൾക്കൊപ്പം പങ്കുവെച്ച കുറിപ്പ്

വേനൽ കാലത്തിൻ്റെ വരവും ഉയരുന്ന താപനിലയും കണക്കിലെടുത്ത് ഇന്ന് മുതൽ ഭഗവാൻ ശ്രീ രാംലാല കോട്ടൺ വസ്ത്രങ്ങൾ മാത്രമാണ് ധരിക്കുക. ഇന്ന് പ്രഭു ധരിച്ചിരിക്കുന്ന വസ്ത്രം, കൈത്തറി കോട്ടൺ മൽമാൽ കൊണ്ടാണ് നിർമ്മിച്ചിരിക്കുന്നത്, പ്രകൃതിദത്ത ചായം പൂശി, ഗോട്ടാ പൂക്കൾ കൊണ്ട് അലങ്കരിച്ചിരിക്കുന്നു. എന്നാണ് കുറിച്ചിരിക്കുന്നത്. ചിത്രങ്ങൾക്ക് താഴെ വിശ്വാസികൾ ജയ് ശ്രീറാം എന്ന് കുറിച്ചിട്ടുണ്ട്. 

ഉയരുന്ന താപനില കാരണമാണ് ഇത്തരത്തിൽ കോട്ടൺ വസ്ത്രങ്ങൾ ധരിപ്പിച്ചിരിക്കുന്നത്. പ്രാണ പ്രതിഷ്ഠാ ചടങ്ങുകൾക്ക് ശേഷം രാം ലല്ലയെ ശ്രൂ കോവിലിനുള്ളിൽ പ്രതിഷ്ഠിച്ചു. എന്നാൽ ശ്രീ കോവിലിനുള്ളിൽ ഇത് വരെ ഫാനോ എയർകണ്ടീഷനോ ഇല്ല. ​ഗൃഹത്തിനുള്ളിൽ എയർ കണ്ടീഷനറുകൾ സ്ഥാപിക്കണം  എന്നാണ് മുഖ്യ പുരോഹിതനായ ആചാര്യ സത്യേന്ദ്ര ദാസ് ആവശ്യപ്പെടുന്നത്. 

അതേസമയം ഈ വർഷത്തെ രാമനവമി, സീതാനവമി, ഹനുമാൻ ജയന്തി എന്നിവ ​ഗംഭീരമായി ആഘോഷിക്കുമെന്നാണ് രാമജന്മഭൂമി തീർത്ഥക്ഷേത്ര ട്രസ്റ്റ് സെക്രട്ടറി ചമ്പത് റായ് പറഞ്ഞത്. രാമനവമി വേളയിൽ ദർശനത്തിനെത്തുന്ന ഭക്തരെ ചൂടിൽ നിന്നും സംരക്ഷിക്കാൻ മതിയായ ക്രമീകരണങ്ങൾ ഒരുക്കുമെന്നും അദ്ദേഹം വ്യക്തമാക്കി.