ഡൽഹി മദ്യനയ കേസിൽ ഇഡിക്ക് തിരിച്ചടി; അരവിന്ദ് കെജ്രിവാളിന് ഇടക്കാല ജാമ്യം

ന്യൂഡൽഹി: ഡൽഹി മുഖ്യമന്ത്രി അരവിന്ദ് കെജ്രിവാളിന് മദ്യ നയവുമായി ബന്ധപ്പെട്ട കേസിൽ സുപ്രീം കോടതി വെള്ളിയാഴ്ച ഇടക്കാല ജാമ്യം അനുവദിച്ചതായി റിപ്പോർട്ട്. ഇഡി അറസ്റ്റ് ചെയ്ത കേസിലാണ് ജാമ്യം അനുവദിച്ചിരിക്കുന്നത്. ഇഡിയുടെ അറസ്റ്റ് നിയമ വിരുദ്ധമാണെന്നാണ് വാദം. ഈ വാദം സുപ്രീം കോടതി തള്ളിയിട്ടില്ല. ഹാജിയിലെ നിയമ വിഷയങ്ങൾ മൂന്നംഗ ബെഞ്ചിന് വിട്ടു. 

എന്നാൽ മുഖ്യമന്ത്രി പദവി രാജിവെയ്ക്കണമോ എന്ന കാര്യത്തിൽ തീരുമാനമെടുക്കുന്നത് സുപ്രീംകോടതി കെജ്‌രിവാളിന് വിടുന്നുവെന്ന് അറിയിച്ചു. ഇടക്കാല ജാമ്യം കിട്ടുമെങ്കിലും കെജ്‌രിവാൾ ജയിലിൽ തന്നെ തുടരും. സിബിഐ കേസിൽ ജുഡീഷ്യൽ കസ്റ്റഡിയിൽ ആയതു കൊണ്ട് ഇതിൽ ജാമ്യം ലഭിച്ചാല്‍ മാത്രമേ ജയില്‍ മോചിതനാകാൻ കഴിയൂ.   

എൻഫോഴ്‌സ്‌മെൻ്റ് ഡയറക്ടറേറ്റ് അറസ്റ്റ് ചെയ്തതിനെതിരെ അരവിന്ദ് കേജ്‌രിവാളിൻ്റെ ഹർജി ജസ്റ്റിസുമാരായ സഞ്ജീവ് ഖന്നയും ദീപങ്കർ ദത്തയും അടങ്ങുന്ന സുപ്രീം കോടതി ബെഞ്ച് വിശാല ബെഞ്ചിന് വിട്ടു. വെറുതെ ചോദ്യം ചെയ്താൽ അറസ്റ്റ് അനുവദിക്കില്ലെന്ന് വിധി പ്രസ്താവിച്ചുകൊണ്ട് സുപ്രീം കോടതി പറഞ്ഞു. ജസ്റ്റിസ് ഖന്ന അധ്യക്ഷനായ ബെഞ്ചാണ് വിധി പറഞ്ഞത്. ഈ കേസിന്റെ വാദത്തിനിടയിലാണ് നേരത്തെ സുപ്രീംകോടതി ഇടക്കാല ജാമ്യം അനുവദിച്ചത്.