Kolkata doctor rape murder case: ഡോക്ടർമാരുടെ സുരക്ഷ ഉറപ്പാക്കാൻ നടപടി സ്വീകരിക്കും; സമിതി രൂപീകരിച്ച് കേന്ദ്രസർക്കാർ

ന്യൂഡൽഹി: കൊൽക്കത്ത ആർജി കാർ മെഡിക്കൽ കോളേജിലെ യുവ വനിതാ ഡോക്ടർ ബലാത്സം​ഗത്തിന് ഇരയായി കൊല്ലപ്പെട്ടതിൽ പ്രതിഷേധിച്ച് ഡോക്ടർമാരുടെ സമരം തുടരുന്നു. ‍ഡോക്ടർമാരുടെ സുരക്ഷ ഉറപ്പുവരുത്താൻ സാധ്യമായ എല്ലാ നടപടിയും സ്വീകരിക്കുമെന്ന് ആരോ​ഗ്യമന്ത്രാലയം വ്യക്തമാക്കി.ആരോ​ഗ്യരം​ഗത്ത് പ്രവർത്തിക്കുന്നവരുടെ സുരക്ഷ ഉറപ്പുവരുത്താൻ വേണ്ട മാർ​ഗനിർദേശങ്ങൾ നൽകുന്നതിനായി സമിതി രൂപീകരിക്കുമെന്നും ആരോ​ഗ്യമന്ത്രാലയം ഔദ്യോ​ഗിക പ്രസ്താവനയിലൂടെ വ്യക്തമാക്കി.

ഇന്ത്യൻ മെഡിക്കൽ അസോസിയേഷൻ (ഐഎംഎ), റസിഡന്റ് ഡോക്ടേഴ്സ് അസോസിയേഷൻ ഓഫ് ​ഗവൺമെന്റൽ മെഡിക്കൽ കോളേജസ് ആൻഡ് ഹോസ്പിറ്റൽസ് ഓഫ് ഡൽഹി, ഫെഡറേഷൻ ഓഫ് റസിഡന്റ് ഡോക്ടേഴ്സ് അസോസിയേഷൻ (ഫോർഡ) എന്നിവയുടെ പ്രതിനിധികൾ ആരോ​ഗ്യമന്ത്രാലയ ഉദ്യോ​ഗസ്ഥരുമായി നടത്തിയ ചർച്ചയെത്തുടർന്നാണ് സമിതിയെ രൂപീകരിക്കാൻ തീരുമാനമായത്.

ഡോക്ടർമാരുടെയും ആശുപത്രികളുടെയും നേരെയുണ്ടാകുന്ന അതിക്രമങ്ങൾ തടയാൻ ശക്തമായ നയം കൊണ്ടുവരണമെന്ന് ഡോക്ടർമാരുടെ സംഘടനകൾ കേന്ദ്രത്തിനോട് ആവശ്യപ്പെട്ടു. വിമാനത്താവളത്തിന് സമാനമായി ആശുപത്രികളെയും സേഫ് സോണായി പ്രഖ്യാപിച്ച് ശക്തമായ സുരക്ഷ ഒരുക്കുക, റസിഡന്റ് ഡോക്ടർമാരുടെ തൊഴിൽ സാഹചര്യം മെച്ചപ്പെടുത്തുക, കൊൽക്കത്തയിൽ യുവ ഡോക്ടറെ ബലാംത്സം​ഗം ചെയ്ത് കൊലപ്പെടുത്തിയ കേസിൽ വിശദമായ അന്വേഷണം നടത്തി കുറ്റവാളികൾക്ക് ശിക്ഷ നൽകുക, കൊല്ലപ്പെട്ട ഡോക്ടറുടെ കുടുംബത്തിന് അർഹമായ നഷ്ടപരിഹാരം നൽകണം എന്നീ ആവശ്യങ്ങളും സംഘടനകൾ കേന്ദ്രത്തിന് മുന്നിൽ ഉന്നയിച്ചു.