Kolkata Doctors Rape Murder Case: കൊൽക്കത്തയിലെ യുവ ഡോക്ടറുടെ കൊലപാതകം; 24 മണിക്കൂർ പണിമുടക്കിലേക്ക് ഡോക്ടർമാർ, അവശ്യ സേവനങ്ങൾ മാത്രം

IMA Strike: പിജി ഡോക്ടറെ ബലാത്സം​ഗം ചെയ്ത് കൊലപ്പെടുത്തിയ സംഭവത്തിൽ ഇന്ത്യൻ മെഡിക്കൽ അസോസിയേഷൻ (ഐഎംഎ) രാജ്യവ്യാപകമായി പണിമുടക്ക് പ്രഖ്യാപിച്ചു.

ന്യൂഡൽഹി: കൊൽക്കത്തയിലെ ആർജി കാർ മെഡിക്കൽ കോളേജിലെ 31കാരിയായ പിജി ഡോക്ടറെ ബലാത്സം​ഗം ചെയ്ത് കൊലപ്പെടുത്തിയ സംഭവത്തിൽ രാജ്യമെങ്ങും പ്രതിഷേധം ശക്തമാകുകയാണ്. ഇന്ത്യൻ മെഡിക്കൽ അസോസിയേഷൻ (ഐഎംഎ) രാജ്യവ്യാപകമായി പണിമുടക്ക് പ്രഖ്യാപിച്ചു. രാജ്യത്തുടനീളമുള്ള സർക്കാർ, സ്വകാര്യ ആശുപത്രികളിലെ ഡോക്ടർമാർ എല്ലാ ആശുപത്രി സേവനങ്ങളും നിർത്തിവയ്ക്കും.

24 മണിക്കൂറാണ് പണിമുടക്ക് പ്രഖ്യാപിച്ചിരിക്കുന്നത്. മെഡിക്കൽ കോളേജുകളിൽ ഉൾപ്പെടെ ഒപി സേവനങ്ങൾ നിർത്തിവയ്ക്കും. അത്യാഹിത വിഭാ​ഗത്തെ സമരത്തിൽ നിന്ന് ഒഴിവാക്കിയിട്ടുണ്ട്. മറ്റ് സേവനങ്ങൾ എല്ലാം തന്നെ നിർത്തിവയ്ക്കും. ഡോക്ടർമാരുടെ പണിമുടക്കിൽ എന്തെല്ലാം അവശ്യ സർവീസുകൾ നൽകുമെന്ന് അറിയാം.

ഓ​ഗസ്റ്റ് 17ന് രാവിലെ ആറ് മുതൽ ഓ​ഗസ്റ്റ് 18ന് രാവിലെ ആറ് വരെയാണ് പണിമുടക്ക്
ഡോക്ടർമാരുടെ പണിമുടക്കിനെ തുടർന്ന് രാജ്യത്തെ മിക്ക ആശുപത്രികളിലും സേവനങ്ങൾ ലഭ്യമാകില്ല
ഔട്ട് പേഷ്യന്റ് വിഭാ​ഗം (ഒപി) പ്രവർത്തിക്കില്ല
എമർജൻസിയല്ലാത്ത ഇലക്ടീവ് സർജറി മാറ്റിവയ്ക്കും
അത്യാഹിത വിഭാ​ഗം, അഡ്മിറ്റ് ചെയ്ത രോ​ഗികളുടെ ചികിത്സ, ​ഗുരുതരാവസ്ഥയിലുള്ള രോ​ഗികളുടെ ചികിത്സ എന്നിവ തടസപ്പെടില്ല
എല്ലാ സർക്കാർ, സ്വകാര്യ ആശുപത്രികളും പണിമുടക്കിൽ പങ്കെടുക്കും
അടിയന്തര മെഡിക്കൽ ആവശ്യങ്ങൾക്കായി അത്യാഹിത വിഭാ​ഗം പ്രവർത്തിക്കും