Kathua Terrorist Attack: കത്വയിൽ സൈനിക വാഹനത്തിന് നേരെ ഭീകരാക്രമണം; 5 സൈനികർക്ക് വീരമൃത്യു

ജമ്മു കശ്മീർ: ജമ്മു കശ്മീരിലെ കത്വയിലെ ബില്ലവാറിൽ തിങ്കളാഴ്ച സൈനിക വാഹനവ്യൂഹത്തിന് നേരെ ഭീകരർ നടത്തിയ ആക്രമണത്തിൽ അഞ്ച് സൈനികർക്ക് വീരമൃത്യു.  ആക്രമണത്തിൽ പരിക്കേറ്റ മറ്റ് അഞ്ച് സൈനികർ ചികിത്സയിലാണ്.

ബില്ലവാറിലെ മച്ചേദി മേഖലയിലെ ഒരു കുന്നിൻ മുകളിൽ നിന്നാണ് ഭീകരർ സൈനിക വാഹനത്തിന് നേരെ ആക്രമണം നടത്തിയത്. സൈനിക വാഹനത്തിനു നേരെ ഇവർ ഗ്രനേഡ് എറിയുകയായിരുന്നു.  ആക്രമണത്തിന് ശേഷം സൈന്യം ഭീകരർക്കെതിരെ കൗണ്ടർ ഓപ്പറേഷൻ നടത്തിയതിനെ തുടർന്ന് ഏറ്റുമുട്ടൽ ഉണ്ടായി. തുടർന്ന് മേഖലയിൽ നിന്നും ഭീകരർ ഓടിപ്പോയതായിട്ടാണ് റിപ്പോർട്ട്.

ആക്രമണത്തിൽ മൂന്ന് ഭീകരർ ഉൾപ്പെട്ടിട്ടുണ്ടെന്നാണ് വാർത്താ ഏജൻസിയായ പിടിഐ റിപ്പോർട്ട് ചെയ്യുന്നത്. ഇവർ അതിർത്തിക്കപ്പുറത്ത് നിന്നും നുഴഞ്ഞു കയറിയതാകാൻ സാധ്യതയുണ്ടെന്നും റിപ്പോർട്ടുണ്ട്. കഴിഞ്ഞ കുറച്ച്  ആഴ്ചകളായി ജമ്മു കശ്മീരിൽ ഭീകരാക്രമണങ്ങൾ വർധിച്ചുവരികയാണ്.

ജൂൺ 11, 12 തീയതികളിലായി ജമ്മു കശ്മീരിലെ ദോഡ ജില്ലയിൽ ഇരട്ട ഭീകരാക്രമണവും ഉണ്ടായി.  ജൂൺ 11 ന് ഛത്തർഗല്ലയിലെ സംയുക്ത ചെക്ക് പോസ്റ്റിൽ തീവ്രവാദികൾ നടത്തിയ ആക്രമണത്തിൽ ആറ് സുരക്ഷാ ഉദ്യോഗസ്ഥർക്കാണ് പരിക്കേറ്റത്.  ജൂൺ 12 ന് ഗണ്ഡോ മേഖലയിലെ കോട്ട മുകളിൽ തീവ്രവാദികളുമായുള്ള ഏറ്റുമുട്ടലിൽ ഒരു പോലീസ് ഉദ്യോഗസ്ഥന് പരിക്കേറ്റിരുന്നു.