Uttarakhand Rescue: 18 മീറ്റർ അകലേ 41 ജീവനുകൾ; തുരങ്കത്തിലെ രക്ഷാദൗത്യം വിജയത്തിലേക്ക്

ഉത്തരകാശി: ഉത്തരകാശിയിലെ സില്‍ക്യാരയില്‍ നിര്‍മാണത്തിലിരുന്ന തുരങ്കം തകര്‍ന്ന് കുടുങ്ങിയ തൊഴിലാളികളെ രക്ഷിക്കാനുള്ള ശ്രമങ്ങള്‍ വിജയത്തിലേക്കെന്നാണ് നിലവിൽ ലഭിക്കുന്ന സൂചന. ഇനി 18 മീറ്റര്‍ കൂടി മാത്രമേയുള്ളൂ തുരങ്കം തുളയ്ക്കാന്‍ എന്ന് അധികൃതര്‍ അറിയിച്ചു. കൂറ്റന്‍ ആഗര്‍യന്ത്രങ്ങളുടെ സഹായത്തോടെയാണ് തുരങ്കം തുളയ്ക്കുന്നത്. 'അടുത്ത 24 മണിക്കൂറിനുള്ളില്‍, അതായത് ഇന്ന് രാത്രിയിലോ അല്ലെങ്കില്‍ നാളെയോ വിജയത്തിലെത്തിയെന്ന തരത്തിലുള്ള വാർത്ത പ്രതീക്ഷിക്കാമെന്ന് രക്ഷാദൗത്യസംഘം പറയുന്നു. 

ഇത് പതിനൊന്നാം ദിവസമാണ് തുരങ്കത്തിനുള്ളിൽ 41 ജീവനുകൾ കുടുങ്ങിയത്. രക്ഷാപ്രവർത്തനത്തിന് പ്ലാൻ എയും ബിയും സിയും ഒക്കെ നോക്കിയിട്ടും ഒന്നും ഫലവത്തായിരുന്നില്ല. തുരങ്കമുഖത്ത് അടിഞ്ഞുകൂടിയ സിമന്റും ഉൾപ്പെടെയുള്ള അവശിഷ്ടങ്ങൾ അത്യാധുനിക ഉപകരണങ്ങളോടെ മാറ്റാമെന്ന പ്ലാൻ എ ദുഷ്കരമായതാണ് ഇതിനു കാരണം. അതിനിടെ കൈയ്യിലുണ്ടായിരുന്ന ഡ്രില്ലിങ് മെഷീനിന്റെ ബ്ലേഡുകൾ കൂറ്റൻ സിമന്റ് കട്ടകളിൽ തട്ടി പ്രവർത്തനരഹിതമാവുകയും ചെയ്തിരുന്നു. ഉണങ്ങിയ പഴങ്ങളും വെള്ളവും വൈറ്റമിൻ ഗുളികളും മറ്റൊരു പൈപ്പ് വഴി തൊഴിലാളികൾക്ക് എത്തിക്കുന്നുണ്ട്.