വയനാട്ടിൽ വൻ കഞ്ചാവ് വേട്ട; രണ്ട് മലപ്പുറം സ്വദേശികൾ പിടിയിൽ

കൽപ്പറ്റ: വയനാട്ടിൽ കഞ്ചാവ് വേട്ട.  രണ്ട് കാറുകളിലായി കടത്തികൊണ്ടുവന്ന 10 കിലോ കഞ്ചാവാണ് വയനാട് എക്സൈസ് സ്പെഷ്യൽ സ്ക്വാഡ് പിടികൂടിയത്.  ഇതുമായി ബന്ധപ്പെട്ട് രണ്ട് മലപ്പുറം സ്വദേശികളെ അറസ്റ്റു ചെയ്തിട്ടുണ്ട്. 

മലപ്പുറം ഏറനാട് സ്വദേശികളായ മുഹമ്മദ് ഷിബിലി, വിവേക് എന്നിവരെയാണ് അറസ്റ്റു ചെയ്തത്.  രണ്ടുപേർ രക്ഷപ്പെടുകയും ചെയ്തിട്ടുണ്ട്.  അവരെയും ചേർത്താണ് കേസ് രജിസ്റ്റർ ചെയ്തിരിക്കുന്നത്.  കോറോണ വ്യാപകമായി പടരുന്ന ഈ സാഹചര്യത്തിൽ കർണ്ണാടകയിൽ നിന്നും ഇപ്പോൾ ഇത്തരം സാധനങ്ങൾ കടത്തികൊണ്ടു വരാൻ ബുദ്ധിമുട്ടുളളതിനാൽ കോഴിക്കോട് മലപ്പുറം ജില്ലകൾ വഴി വയനാട്ടിലേക്ക് വൻ കഞ്ചാവ് ശേഖരം കടത്തുന്നതായി എക്സൈസിന് വിവരം ലഭിച്ചതിനെ തുടർന്നുള്ള നീക്കത്തിലാണ് ഈ സംഘം പിടിയിലായത്. 

വിവരമറിഞ്ഞ എക്സൈസ് ഷാഡോ സംഘം ആവശ്യക്കാർ എന്നനിലയിൽ സംഘവുമായി ബന്ധപ്പെടുകയും 2 കിലോ കഞ്ചാവിന് 5000 രൂപ എന്ന വില പറഞ്ഞ് ഉറപ്പിക്കുകയും ചെയ്തിരുന്നു.   തുടർന്ന് നടത്തിയ നാടകീയ രംഗങ്ങളിലൂടെയാണ് ഈ സംഘത്തെ എക്സൈസ് സംഘം കുടുക്കിലാക്കിയത്.  ഇവർ നാലു പേര് ഉണ്ടായിരുന്നു.  അതിൽ രണ്ടുപേർ ഓടി രക്ഷപ്പെട്ടു.  സ്പെഷ്യൽ സ്ക്വാഡ് ഇൻസ്പെക്ടർ ജിമ്മി ജോസഫിന്റെ നേതൃത്വത്തിലാണ് സംഘത്തെ പിടികൂടിയത്.