Accident: പാലക്കാട് ലോറിക്ക് പിന്നിൽ പിക്കപ്പ് വാൻ ഇടിച്ച് അപകടം; രണ്ട് പേർ മരിച്ചു

പാലക്കാട്: പാലക്കാട് കഞ്ചിക്കോട് ദേശീയപാതയില്‍ ലോറിക്ക് പിന്നില്‍ പിക്കപ്പ് വാൻ ഇടിച്ചു. അപകടത്തിൽ രണ്ട് പേർ മരിച്ചു. മേപ്പറമ്പ് പേഴുങ്കര സ്വദേശി നിഷാദ് (27), കൊടുന്തിരപ്പുള്ളി സ്വദേശി ശിവൻ (57) എന്നിവരാണ് മരിച്ചത്.

പിക്കപ്പ് വാനിന്റെ ഡ്രൈവർക്ക് ​ഗുരുതരമായി പരിക്കേറ്റു. ഡ്രൈവറെ ചികിത്സയ്ക്കായി ആശുപത്രിയിലേക്ക് മാറ്റി. കോയമ്പത്തൂരിൽ നിന്ന് പാലക്കാട്ടേക്ക് വരികയായിരുന്ന വാഹനങ്ങളാണ് അപകടത്തിൽപ്പെട്ടത്. വാഹനം വെട്ടിപ്പൊളിച്ചാണ് മൂവരെയും പുറത്തെടുത്തത്.

സുൽത്താൻ ബത്തേരിയിൽ പോലീസ് വാഹനമിടിച്ച് സ്കൂട്ടർ യാത്രികർക്ക് പരിക്ക്

വയനാട്: സുൽത്താൻ ബത്തേരിയിൽ പോലീസ് വാഹനമിടിച്ച് സ്കൂട്ടർ യാത്രികരായ മൂന്നുപേർക്ക് പരിക്കേറ്റതായി റിപ്പോർട്ട്. മലപ്പുറം വാഴക്കാട് പുൽപ്പറമ്പിൽ ജാസിദ്, ഭാര്യ ഷാഹിന, മകന്‍ ജുവാന്‍ എന്നിവർക്കാണ് പരിക്കേറ്റത്. പുത്തന്‍കുന്നില്‍ നടന്ന സമൂഹ വിവാഹത്തില്‍ പങ്കെടുക്കാനെത്തിയ കുടുംബത്തിനാണ് അപകടം സംഭവിച്ചത്.

അസംപ്ഷൻ ജംങ്ഷനിൽ വെള്ളിയാഴ്ച വൈകീട്ട് നാലോടെയായിരുന്നു അപകടം. ബത്തേരിയില്‍ നിന്ന് ബാരിക്കേഡുകള്‍ കയറ്റിക്കൊണ്ടു പോകുകയായിരുന്ന പുത്തൂര്‍വയല്‍ എ.ആര്‍. ക്യാമ്പിലെ പോലീസ് ലോറി അതേ ദിശയില്‍ സഞ്ചരിക്കുകയായിരുന്ന സ്കൂട്ടറിൽ ഇടിക്കുകയായിരുന്നു എന്നാണ് റിപ്പോർട്ട്.

അപകടത്തെ തുടർന്ന് പോലീസ് വാഹനത്തിന്റെ ഡ്രൈവറായ പോലീസുകാരൻ ഓടി രക്ഷപ്പെട്ടു. പരിക്കേറ്റവരെ ഓടിക്കൂടിയ നാട്ടുകാരാണ് ആശുപത്രിയിലെത്തിച്ചത്. ലോറിയോടിച്ചിരുന്ന പോലീസുകാരന്‍ മദ്യപിച്ചതായി സംശയിക്കുന്നതായി നാട്ടുകാര്‍ അറിയിച്ചു.

ലോറി സ്‌കൂട്ടറിനെ മറികടക്കുന്നതിനിടെയാണ് അപകടമുണ്ടായതെന്നാണ് നിഗമനം. ഇടിച്ചിട്ട ശേഷം സ്‌കൂട്ടറിനെ അല്‍പദൂരം ലോറി വലിച്ചുകൊണ്ടുപോയ പാടുകള്‍ റോഡിലുണ്ടായിരുന്നു. സംഭവത്തിൽ ലോറിയോടിച്ചിരുന്ന പോലീസുകാരന്‍ ബൈജുവിന്റെ പേരില്‍ കേസ് രജിസ്റ്റര്‍ ചെയ്തു.