Wayanad Theft Case: വയനാട് കടകളിൽ തുടർച്ചയായി മോഷണം; ഭീതിയിൽ നാട്ടുകാർ

വയനാട്: കമ്പളക്കാട് പോലീസ് സ്റ്റേഷൻ പരിധിയിലെ കമ്പളക്കാട് ടൗണിനടുത്തുള്ള പരിസര പ്രദേശങ്ങളിലും തുടർച്ചയായ മൂന്ന് ദിവസങ്ങളിൽ വിവിധ ഇടങ്ങളിൽ മോഷണം. തുടർ മോഷണങ്ങളുടെ പാശ്ചാത്തലത്തിൽ നാട്ടുകാർ ഭീതിയിലാണ്. കമ്പളക്കാട് പോലീസ് സ്റ്റേഷൻ പരിധിയിലെ കമ്പളക്കാട് ടൗണിനടുത്തുള്ള പരിസര പ്രദേശങ്ങളിലും മറ്റുമാണ് ഇടവിട്ട ദിവസങ്ങളിൽ മോഷണങ്ങൾ നടന്നത്.

ഞായർ പുലർച്ചെ മൈലാടി മുസ്‌ലിം പള്ളിയിലും സമീപത്തെ വീട്ടിലുമാണ് മോഷണശ്രമമുണ്ടായത്. ശനിയാഴ്ച രാത്രി ചുണ്ടക്കര ഹംസക്കവലയിലെ തോട്ടത്തിൽ നിന്ന് നിന്ന് 70 കിലോയോളം കുരുമുളകും കാപ്പിയും മോഷ്ടിച്ചു. വെള്ളി പുലർച്ചെ പള്ളിമുക്കിലും പോലീസ് സ്റ്റേഷൻ മുക്കിലും ആറുവീടുകളിൽ മോഷണം നടന്നിരുന്നു.

പാനക്കാരൻ അബ്ദുൽ ലത്തീഫിൻ്റെ മേഷണം നടന്ന വീട്ടിൽ കഴിഞ്ഞ ദിവസം ഫിംഗർപ്രിന്റ് സംഘം പരിശോധന നടത്തി. ഒന്നിലധികം പേരടങ്ങുന്ന സംഘമാണ് മോഷണത്തിനറങ്ങുന്നതെന്നാണ് സംശയം. മോഷണം നടന്ന എല്ലാ വീടുകളിലെയും മേശയും അലമാരയും കുത്തിപ്പൊളിച്ച നിലയിലാണ്. വീടിന്റെ ലോക്ക് തകർത്താണ് ഉള്ളിൽ കയറുന്നത്.

രണ്ടിടങ്ങളിൽ  വീട്ടുകാർ ഉണർന്നതിനെത്തുടർന്ന് മോഷ്ടാക്കൾ ശ്രമമുപേക്ഷിച്ച് രക്ഷപ്പെട്ടു. മാസങ്ങൾക്ക് മുമ്പും മൈലാടിയിൽ  നിരവധി വീടുകളിൽ സമാന രീതിയിൽ മോഷണം നടന്നിരുന്നു. വീട്ടുകാർക്ക് നേരെ ആക്രമണ ശ്രമവും നടന്നിരുന്നു. മോഷ്ടാക്കളെ പിടികൂടണമെന്നും പോലീസ് നൈറ്റ് പെട്രോളിങ് ശക്തമാക്കണമെന്നും നാട്ടുകാർ ആവശ്യപ്പെട്ടു.