Wild Animal Attack: വാല്‍പ്പാറയില്‍ കാട്ടുപോത്തിൻറെ ആക്രമണം; തോട്ടം തൊഴിലാളിക്ക് ദാരുണാന്ത്യം

വാൽപ്പാറ: കാട്ടുപോത്തിന്റെ ആക്രമണത്തിൽ തോട്ടം തൊഴിലാളിക്ക് ദാരുണാന്ത്യം. ഷോളയാർ ഡാമിനോട് ചേർന്ന മുരുകാളി എസ്റ്റേറ്റിലെ അരുൺ (51) ആണ് കാട്ടുപോത്തിന്റെ ആക്രമണത്തിൽ മരിച്ചത്. വാൽപ്പാറയിലാണ് കാട്ടുപോത്തിന്റെ ആക്രമണമുണ്ടായത്. രാവിലെ ജോലിക്ക് പോകുമ്പോഴാണ് അരുൺ കാട്ടുപോത്തിന് മുന്ന‍ിൽപ്പെട്ടത്.

താമസ സ്ഥലത്ത് നിന്ന് ജോലിക്ക് പോകുന്ന വഴിയാണ് കാട്ടുപോത്തിന്റെ ആക്രമണമുണ്ടായതെന്ന് കൂടെയുണ്ടായിരുന്നവർ പറഞ്ഞു. കരച്ചിൽ കേട്ട് ചെന്നു നോക്കുമ്പോഴാണ് കാട്ടുപോത്തിന്റെ ആക്രമണത്തിൽ ​ഗുരുതരമായ പരിക്കേറ്റ അരുണിനെ കൂടെയുള്ളവർ കണ്ടത്. ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

രണ്ട് മൂന്ന് മാസത്തോളമായി വാൽപ്പാറയിലെ ജനവാസ മേഖലയിൽ കാട്ടുപോത്തുകൾ എത്തുന്നതായാണ് പ്രദേശവാസികൾ പറയുന്നത്. കാട്ടുപോത്തിന്റെ ആക്രമണം ഭയന്ന് തോട്ടം തൊഴിലാളികൾ ജോലി പോലും ഉപേക്ഷിക്കുന്ന സാഹചര്യമാണ്. ഇതിനിടെയാണ് ഒരാളുടെ മരണം സംഭവിച്ചിരിക്കുന്നത്.