Ranjith: മുറിയിലേയ്ക്ക് ക്ഷണിച്ചു, ശരീരത്തില്‍ തൊട്ടു; സംവിധായകന്‍ രഞ്ജിത്തിനെതിരെ ഗുരുതര ആരോപണവുമായി നടി

തിരുവനന്തപുരം: ചലച്ചിത്ര അക്കാദമി ചെയര്‍മാനും സംവിധായകനുമായ രഞ്ജിത്തിനെതിരെ ഗുരുതര ആരോപണവുമായി ബംഗാളി നടി രംഗത്ത്. ശ്രീലേഖ മിത്രയാണ് രഞ്ജിത്തിനെതിരെ വെളിപ്പെടുത്തലുമായി രംഗത്തെത്തിയിരിക്കുന്നത്. 'പാലേരി മാണിക്യം' സിനിമയില്‍ അഭിനയിക്കാനെത്തിയപ്പോള്‍ രഞ്ജിത്ത് മോശമായി പെരുമാറിയെന്നാണ് ശ്രീലേഖയുടെ വെളിപ്പെടുത്തല്‍. ഏഷ്യാനെറ്റിന് നല്‍കിയ അഭിമുഖത്തിലായിരുന്നു നടിയുടെ തുറന്നുപറച്ചില്‍. 

2009-10 കാലത്ത് മമ്മൂട്ടിയെ നായകനാക്കി രഞ്ജിത്ത് സംവിധാനം ചെയ്ത ചിത്രമായിരുന്നു പാലേരി മാണിക്യം ഒരു പാതിരാ കൊലപാതകത്തിന്റെ കഥ. പൃഥ്വിരാജ് നായകനായെത്തിയ അകലെ എന്ന സിനിമയില്‍ ശ്രീലേഖ അഭിനയിച്ചിരുന്നു. അകലെയിലെ അഭിനയം കണ്ടാണ് പാലേരി മാണിക്യത്തിലേയ്ക്ക് തന്നെ വിളിച്ചതെന്ന് ശ്രീലേഖ പറഞ്ഞു. ഓഡിഷന്‍ കഴിഞ്ഞ് രാവിലെ കൊച്ചിയില്‍ വെച്ച് രഞ്ജിത്തിനെ കണ്ടു. വൈകിട്ട് അണിയറപ്രവര്‍ത്തകരുമായി ഒരു പാര്‍ട്ടി ഉണ്ടായിരുന്നുവെന്നും അവിടെ വെച്ച് രഞ്ജിത്ത് മുറിയിലേയ്ക്ക് ക്ഷണിച്ചെന്നും ശ്രീലേഖ പറഞ്ഞു. 

സിനിമയെ കുറിച്ചുള്ള ചര്‍ച്ചകള്‍ക്ക് വേണ്ടിയായിരിക്കും ക്ഷണം എന്നാണ് വിചാരിച്ചതെന്ന് ശ്രീലേഖ പറഞ്ഞു. എന്നാല്‍, മുറിയില്‍ കയറിയപ്പോള്‍ തന്നെ രഞ്ജിത്ത് തന്റെ കയ്യില്‍ തൊടുകയും വളകളില്‍ പിടിക്കുകയും ചെയ്തു. പെട്ടെന്ന് പ്രതികരിക്കാന്‍ കഴിയാതെ വന്നതോടെ രഞ്ജിത്ത് കഴുത്തിലും മുടിയിലും തലോടിയെന്നും ഉടനെ തന്നെ താന്‍ ഞെട്ടലോടെ മുറിയില്‍ നിന്നും ഇറങ്ങിപ്പോയെന്നും ശ്രീലേഖ വെളിപ്പെടുത്തി. ആ രാത്രി മുഴുവന്‍ പേടിയോടെയാണ് ഹോട്ടല്‍ മുറിയില്‍ കഴിഞ്ഞതെന്നും തനിയ്ക്ക് ഒരിക്കലും ആ ദിവസം മറക്കാന്‍ കഴിയില്ലെന്നും ശ്രീലേഖ കൂട്ടിച്ചേര്‍ത്തു. 

തനിയ്ക്ക് ഇക്കാര്യങ്ങള്‍ ഭര്‍ത്താവിനോടോ കുടുംബത്തിനോടോ പറയാന്‍ കഴിഞ്ഞില്ലെന്നും സംഭവത്തില്‍ പരാതി അറിയിച്ചെങ്കിലും ഒരു നടപടിയും ഉണ്ടായില്ലെന്നും ശ്രീലേഖ പറഞ്ഞു. ഡോക്യുമെന്ററി സംവിധായകന്‍ ജോഷിയോട് ഇക്കാര്യങ്ങള്‍ വെളിപ്പെടുത്തിയിരുന്നുവെന്നും ശ്രീലേഖ വ്യക്തമാക്കി. അന്ന് പ്രതികരിച്ചതിനാല്‍ തിരികെ നാട്ടിലേയ്ക്ക് പോകാനുള്ള പണം മാത്രമല്ല, പിന്നീട് മലയാള സിനിമയില്‍ തനിയ്ക്ക് അവസരം പോലും ലഭിക്കാത്ത അവസ്ഥയാണ് ഉണ്ടായതെന്നും ശ്രീലേഖ തുറന്നടിച്ചു.