Covid വ്യാപനം; സംസ്ഥാനത്ത് ഐസിയുകളിലും വെന്റിലേറ്ററുകളിലും രോ​ഗികൾ വർധിക്കുന്നു

തിരുവനന്തപുരം: കൊവിഡ് വ്യാപനത്തിന്റെ പശ്ചാത്തലത്തിൽ സംസ്ഥാനത്ത് ഐസിയു, വെന്റിലേറ്റർ രോ​ഗികളുടെ എണ്ണത്തിൽ വർധന. ഇരട്ടിയലധികം വർധനവാണ് 10 ദിവസത്തിനിടെ ഉണ്ടായത്. രോ​ഗവ്യാപനം കൂടിയാൽ പ്രതിസന്ധിയുണ്ടാൻ സാധ്യതയുണ്ടെന്ന് ആരോ​ഗ്യ വിദ​ഗ്ധർ വ്യക്തമാക്കുന്നു. മെയ് ഒന്നിന് 650 പേരെ വെന്റിലേറ്ററിലും 1,808 പേരെ ഐസിയുവിലും ചികിത്സയിൽ പ്രവേശിപ്പിച്ചതായാണ് കണക്ക്. എന്നാൽ മെയ് 10 ആകുമ്പോഴേക്കും വെന്റിലേറ്ററിൽ 1,340 രോ​ഗികളും ഐസിയുവിൽ 2,641 രോ​ഗികളുമായി. കേരളത്തിൽ സർക്കാർ-സ്വകാര്യ മേഖലകളിലായി (Government And Private Health Sector) ആകെയുള്ളത് 9735 ഐസിയു ബെഡുകളും 3776 വെന്റിലേറ്ററുകളുമാണെന്നാണ് സർക്കാർ കണക്കുകൾ വ്യക്തമാക്കുന്നത്. ഇതിൽ 50 ശതമാനമാണ് കൊവിഡ് (Covid) രോ​ഗികൾക്കായി ഉപയോ​ഗിക്കാൻ സാധിക്കുക.

പ്രതിസന്ധി പരിഹരിക്കുന്നതിനായി ജില്ലാ ഭരണകൂടങ്ങൾ ശ്രമങ്ങൾ ആരംഭിച്ചിട്ടുണ്ട്. എറണാകുളത്ത് 1000 ഓക്സിജൻ ബെഡുകൾ അടങ്ങിയ താൽകാലിക ആശുപത്രി നിർമാണം ആരംഭിച്ചിട്ടുണ്ട്. അതേസമയം, ഇടുക്കിയിൽ 99 ശതമാനം സർക്കാർ ആശുപത്രികളും രോ​ഗികളാൽ നിറഞ്ഞുവെന്നാണ് സർക്കാർ ഡോക്ടർമാരുടെ സംഘടനയായ കെജിഎംഒഎ വ്യക്തമാക്കുന്നത്. വിഷയത്തിൽ സർക്കാർ അടിയന്തര ഇടപെടൽ നടത്തണമെന്നാണ് സംഘടനയുടെ ആവശ്യം. രണ്ട് ആശുപത്രികൾ മാത്രമാണ് ഇടുക്കിയിൽ കൊവിഡ് (Covid) ആശുപത്രികളായി പ്രവർത്തിക്കുന്നത്. രോ​ഗികളുടെ എണ്ണം വർധിച്ചതോടെ മറ്റ് ആശുപത്രികളും കൊവിഡ് ആശുപത്രികളാക്കി മാറ്റാനുള്ള ശ്രമത്തിലാണ് ജില്ലാ ഭരണകൂടം. സ്വകാര്യ ആശുപത്രികളിലെ അമ്പത് ശതമാനം കിടക്കകളെങ്കിലും കൊവിഡ് പ്രതിരോധത്തിനായി മാറ്റിവച്ചില്ലെങ്കിൽ കാര്യങ്ങൾ അതീവ ​ഗുരുതരമാകുമെന്നാണ് കെജിഎംഒഎ (KGMOA) വ്യക്തമാക്കുന്നത്.

ഇടുക്കി ജില്ലയിലെ ടെസ്റ്റ് പോസിറ്റിവിറ്റി നിരക്ക് 20.39 ആയി കുറഞ്ഞതാണ് നേരിയ ആശ്വാസം നൽകുന്നത്. എന്നാൽ ഇത് ആശ്വസിക്കാനുള്ള കണക്കല്ലെന്നാണ് കെജിഎംഒഎ വിലയിരുത്തുന്നത്. വരുംദിവസങ്ങളിൽ രോ​ഗികളുടെ എണ്ണം ഉയർന്നേക്കാം. കിടക്കകളുടെ എണ്ണം അടക്കം ജില്ലയിൽ സർക്കാർ തലത്തിൽ സൗകര്യങ്ങൾ കുറവാണ്. ഇനി പുതിയ രോ​ഗികൾ വരുന്ന സമയത്ത് ഉൾക്കൊള്ളാൻ സർക്കാർ തലത്തിൽ സൗകര്യമില്ല എന്നത് സ്ഥിതി ​കൂടുതൽ സങ്കീർണമാക്കുകയാണ്.

ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്...  മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEEHindustanApp ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...

android Link - https://bit.ly/3b0IeqA

ios Link - https://apple.co/3hEw2hy