Kerala Budget 2022: സ്ത്രീശാക്തീകരണത്തിനും ശിശു ക്ഷേമത്തിനും പ്രാധാന്യം നൽകി കേരള ബജറ്റ്

തിരുവനന്തപുരം: വരുമാനം വർധിപ്പിക്കുന്നതിലും സാമ്പത്തിക വളർച്ചയെ ഉത്തേജിപ്പിക്കുന്നതിലും സംസ്ഥാനത്തിന്റെ വർദ്ധിച്ചുവരുന്ന കടബാധ്യതകൾ പരിഹരിക്കുന്നതിലും സർക്കാർ വെല്ലുവിളി നേരിടുന്ന സമയത്താണ് ധനമന്ത്രി കെ.എൻ.ബാലഗോപാൽ 2022-23 സാമ്പത്തിക വർഷത്തേക്കുള്ള ബജറ്റ് ഇന്ന് നിയമസഭയിൽ അവതരിപ്പിച്ചത്. എങ്കിലും ഈ ബജറ്റിലും സ്ത്രീകൾക്കും കുട്ടികൾക്കുമായി വിവിധ പദ്ധതികൾ ഒരുക്കുന്നതിൽ വീഴ്ചവരുത്തിയിട്ടില്ല. 

സ്ത്രീകൾക്കും പെൺകുട്ടികൾക്കും എതിരെയുള്ള അക്രമം ഇല്ലാതാക്കുകയെന്ന ലക്ഷ്യത്തോടെ നിർഭയ പദ്ധതി ബജറ്റിൽ ഉൾപെടുത്തിയിട്ടുണ്ട്.  ഈ പദ്ധതിക്കായി മൊത്തം 24 കോടി രൂപയാണ് നീക്കിവെച്ചതിട്ടുള്ളത്. അതിൽ 9 കോടി രൂപയാണ് നിർഭയ പദ്ധതിയ്ക്കായുള്ളതാണ്, ലിംഗ ബോധവത്കരണത്തിന് ഒരു കോടി രൂപയും സ്ത്രീശാക്തീകരണത്തിന് 14 കോടി രൂപയും വകയിരുത്തിയിട്ടുണ്ട്. 

കുട്ടികളുടെ പോഷകാഹാര നിലവാരം മെച്ചപ്പെടുത്തുന്നതിനായി വിശപ്പുരഹിത ബാല്യം എന്ന പദ്ധതിയും ഈ ബജറ്റിൽ ഉൾപെടുത്തിയിട്ടുണ്ട്. ഈ പദ്ധതിയിൽ അങ്കണവാടി കുട്ടികൾക്ക് നൽകുന്ന മെനുവിൽ ആഴ്ചയിൽ രണ്ടു ദിവസം പാലും മുട്ടയും ഉൾപ്പെടുത്തും. ഇതിനായി  61.5 കോടി രൂപവകയിരുത്തിയിട്ടുണ്ട്.