KSRTC SWIFT Bus Accident : കെ-സ്വിഫ്റ്റ് ബസ്സുകൾ അപകടത്തിൽപ്പെട്ട സംഭവം; രണ്ട് ഡ്രൈവർമാരെ പിരിച്ചുവിട്ടു

തിരുവനന്തപുരം: കെഎസ്ആർടിസി സ്വിഫ്റ്റ് ബസുകൾ അപകടത്തിൽപ്പെട്ട സംഭവത്തിൽ ഡ്രൈവർമാർക്കെതിരെ കർശന നടപടിയെടുത്ത് കമ്പനി. രണ്ട് ബസ്സുകളും ഓടിച്ചിരുന്ന ഡ്രൈവർമാരെ പിരിച്ചുവിട്ടു. 

അപകടം സംബന്ധിച്ച കൂടുതൽ അന്വേഷണത്തിന്റെ ഭാഗമായാണ് കടുത്ത നടപടി. അപകടത്തിൽ വകുപ്പ് മന്ത്രിയും കെഎസ്ആർടിസി സിഎംഡിയും ദുരുഹത ആരോപിച്ചിരിക്കെയാണ് കെ-സ്വിഫ്റ്റ് കമ്പനി ഡ്രൈവർമാർക്കെതിരെ നടപടിയെടുത്തത്.

കെഎസ്ആർടിസിക്ക് ലഭിച്ച കെ-സ്വിഫ്റ്റ് ബസ്സുകളുടെ ഉദ്ഘാടനം കഴിഞ്ഞ് 24 മണിക്കൂറിനകമായിരുന്നു രണ്ട് ബസ്സുകളും അപകടത്തിൽപ്പെടുന്നത്. ഇക്കഴിഞ്ഞ പതിനൊന്നാം തീയതി സർവ്വീസ് ആരംഭിച്ച ബസ്സും പന്ത്രണ്ടാം തിയതി സർവീസ് നടത്തിയ ബസ്സുമാണ് അപകടത്തിൽപ്പെട്ടത്. മുഖ്യമന്ത്രി ഫ്ലാഗ് ഓഫ് ചെയ്ത കെ-സ്വിഫ്റ്റ് ബസ്സുകൾ അപകടത്തിൽപ്പെട്ടത് കെഎസ്ആർടിസി ഗൗരവമായി തന്നെ കണ്ടിരുന്നു. 

തുടർന്ന്, വിപുലമായ അന്വേഷണവും തുടങ്ങിയിരുന്നു. ഇന്റേണൽ കമ്മിറ്റി  നടത്തിയ അന്വേഷണത്തിൽ അപകടം സംഭവച്ചതിൽ ഡ്രൈവർമാരുടെ ഭാ​ഗത്ത് നിന്നുള്ള വീഴ്ച കണ്ടെത്തിയതിനെ തുടർന്നാണ് നടപടിയെടുത്തത്. രണ്ടു ഡ്രൈവർമാരെയും ജോലിയിൽ നിന്ന് പിരിച്ചുവിട്ടു. കൂടുതൽ അന്വേഷണത്തിനും മാനേജമെന്റ് ഉത്തരവിട്ടിട്ടുണ്ട്.

ഏപ്രിൽ 11-ാം തീയതി രാത്രി 11 മണിക്ക് തിരുവനന്തപുരം വർക്കലക്ക് സമീപം കല്ലമ്പലത്ത് വെച്ചും ഏപ്രിൽ 12-ാം തീയതി രാവിലെ 10.25 ന് മലപ്പുറം ജില്ലയിലെ കോട്ടക്കലിലുമാണ് അപകടങ്ങൾ നടന്നത്. 

അപകടങ്ങളിൽ ദുരൂഹത ആരോപിച്ച് ഗതാഗതമന്ത്രി ആന്റണി രാജുവും കെഎസ്ആർടിസി സിഎംഡി ബിജുപ്രഭാകറും രംഗത്തെത്തിയിരുന്നു. വിഷയത്തിൽ പൊലീസ് അന്വേഷണം ആവശ്യപ്പെട്ട് സിഎംഡി ഡിജിപിക്ക് പരാതിയും നൽകിയിരുന്നു.