Leopard Attack: പുലിയുടെ ആക്രമണത്തിൽ ആറ് വയസുകാരി കൊല്ലപ്പെട്ടു; പുലി കുഞ്ഞിനെ കടിച്ചെടുത്ത് കൊണ്ടുപോയത് അമ്മയുടെ മുന്നിൽ നിന്ന്

വാൽപ്പാറ: വാൽപ്പാറയിൽ പുലിയുടെ ആക്രമണത്തിൽ ആറ് വയസുകാരി കൊല്ലപ്പെട്ടു. ജാർഖണ്ഡ് സ്വദേശിനി അപ്സര ഖാത്തൂൻ ആണ് പുലിയുടെ ആക്രമത്തിൽ കൊല്ലപ്പെട്ടത്. അമ്മയ്ക്കൊപ്പം തേയില തോട്ടത്തിലൂടെ നടന്നുപോകവേയാണ് ആറ് വയസുകാരിയെ പുലി കടിച്ചെടുത്തുകൊണ്ടുപോയി കൊന്നത്.

വാൽപ്പാറയിലെ കേരള-തമിഴ്നാട് അതിർത്തിയിലുള്ള ഉഴേമല എസ്റ്റേറ്റിലാണ് സംഭവം. വനത്തോട് ചേർന്ന അതിർത്തിയിൽ നിന്നാണ് കുട്ടിയുടെ മൃതദേഹം കണ്ടെത്തിയത്. മൃതദേഹം വാൽപ്പാറയിലെ സർക്കാർ ആശുപത്രിയിലേക്ക് മാറ്റി. അമ്മയ്ക്കൊപ്പം നടന്നുപോകുകയായിരുന്ന കുട്ടിയെ പുലി കടിച്ചെടുത്തുകൊണ്ടുപോകുകയായിരുന്നു.

പുലിയുടെ ആക്രമണത്തെ തുടർന്ന് കുട്ടിയുടെ മാതാവ് ബഹളം വച്ചതിനെ തുടർന്ന് നാട്ടുകാരും എസ്റ്റേറ്റ് തൊഴിലാളികളും ഓടിക്കൂടുകയായിരുന്നു. നാട്ടുകാരും എസ്റ്റേറ്റ് തൊഴിലാളുകളും ചേർന്ന് നടത്തിയ പരിശോധനയിലാണ് എസ്റ്റേറ്റിനോട് ചേർന്ന വനാതിർത്തിയിൽ നിന്ന് കുട്ടിയുടെ മൃതദേഹം കണ്ടെത്തിയത്.