K Radhakrishnan: യഥാർഥ ഭക്തന്മാർ മാലയൂരിയും തേങ്ങയുടച്ചും തിരിച്ചു പോയിട്ടില്ല; അങ്ങനെ ചെയ്തത് കപടഭക്തരാണെന്ന് മന്ത്രി കെ. രാധാകൃഷ്ണൻ

തിരുവനന്തപുരം: വ്യാജ പ്രചാരണം ശബരിമലയെ തകർക്കാനാണെന്ന് സംശയമുണ്ടെന്ന് ദേവസ്വം മന്ത്രി കെ. രാധാകൃഷ്ണൻ. യഥാർഥ ഭക്തന്മാർ ആരും മാലയൂരിയും തേങ്ങയുടച്ചും തിരിച്ചു പോയിട്ടില്ല. അങ്ങനെ ചെയ്തത് കപടഭക്തരാണെന്നും മന്ത്രി നിയമസഭയിൽ പറഞ്ഞു. എം. വിൻസെന്റ് എംഎൽഎയുടെ ചോദ്യത്തിന് മറുപടി പറയുകയായിരുന്നു ദേവസ്വം മന്ത്രി.

പതിനായിരക്കണക്കിന് പേരിൽ രണ്ടോ മൂന്നോ പേരുടെ കാര്യമുയർത്തി പ്രശ്നമുണ്ടാക്കാൻ ചിലർ ശ്രമിക്കുന്നു. ശബരിമലയിൽ ചില സന്ദർഭങ്ങളിൽ തിരക്ക് ഉണ്ടായെന്നും ഇത് ഉപയോഗിച്ച് വ്യാജ പ്രചാരണം നടത്തി ശബരിമലയെ തകർക്കുന്ന നിലയിലേക്ക് തീർഥാടനകാലത്തെ എത്തിക്കാൻ ചിലർ തുനിഞ്ഞുവെന്നും ദേവസ്വം മന്ത്രി കെ രാധാകൃഷ്ണൻ പറഞ്ഞു.

ശബരിമലയിൽ താമസ സൗകര്യം ഉൾപ്പെടെ വികസിപ്പിക്കേണ്ടതായിട്ടുണ്ട്. ഇതിനായി കൂടുതൽ ഭൂമി ഏറ്റെടുക്കേണ്ടി വരും. ഇതിന് കേന്ദ്രത്തിന്റെ സഹായം വേണം. മാസ്റ്റർ പ്ലാനിൻ്റെ പദ്ധതികൾക്കായി ഹൈപ്പവർ കമ്മറ്റി രൂപീകരിച്ച് പ്രവർത്തനം പുരോഗമിക്കുകയാണെന്നും മന്ത്രി പറഞ്ഞു. തീർത്ഥാടനകാലം മുഴുവൻ പോലീസ് നല്ല രീതിയിലുള്ള പ്രവർത്തനമാണ് കാഴ്ചവച്ചത്.

പോലീസ് ഇടപെട്ടില്ലെങ്കിൽ ഉണ്ടാകുന്ന പ്രശ്നം വേറെയാണ്. പുല്ലുമേടിന്റെയും പമ്പയുടെയും അനുഭവം നമുക്ക് മുന്നിലുണ്ടെന്നും അത്തരത്തിലുള്ള അനുഭവം ആവർത്തിക്കാതിരിക്കാനാണ് പോലീസ് മുൻകരുതലെടുത്തതെന്നും കെ. രാധാകൃഷ്ണൻ നിയമസഭയിൽ പറഞ്ഞു. തീർത്ഥാടനത്തിന് എത്തിയ കുഞ്ഞ് മരണപ്പെട്ട സംഭവവുമായി ബന്ധപ്പെട്ട് ആശങ്കയുണ്ടാക്കുന്ന പ്രചാരണം നടന്നു.

സൈബർ സെൽ വഴി അന്വേഷണവും കേസെടുക്കലും ആരംഭിച്ചതോടെ ഇതിന് ശമനമുണ്ടായി. വാട്ടർ അതോറിറ്റിയിലെ ചില പോരായ്മകൾ ശബരിമലയിൽ പരിഹരിക്കുമെന്ന് മന്ത്രി റോഷി അഗസ്റ്റിനും എരുമേലിയിൽ നടന്നത് അനാവശ്യ പ്രക്ഷോഭമാണെന്ന് ദേവസ്വം മന്ത്രിയും കൂട്ടിച്ചേർത്തു.