Palakkad By Election Police Raid: അഴിമതിയുടെ പണപ്പെട്ടിയുള്ളത് ക്ലിഫ് ഹൗസിൽ, റെയ്ഡ് സിപിഎം-ബിജെപി ഗൂഢാലോചന; രൂക്ഷ വിമ‍ർശനങ്ങളുമായി പ്രതിപക്ഷ നേതാവ്

പാലക്കാട്ടെ പാതിര റെയ്ഡിന് പിന്നിൽ സിപിഎം- ബിജെപി ഗൂഢാലോചനയെന്ന് പ്രതിപക്ഷ നേതാവ് വിഡി സതീശൻ.  എംബി രാജേഷും സിപിഎം നേതാവായ ഭാര്യാസഹോദരനും ബിജെപിയും ചേർന്ന് മുഖ്യമന്ത്രിയുടെ ഓഫീസിലെ ഉപജാപക സംഘത്തിന്റെ ഒത്താശയോടെ ചെയ്ത കാര്യമാണിതെന്ന് വിഡി സതീശൻ പറഞ്ഞു.

സ്ത്രീകളെ അപമാനിച്ചത് ക്ഷമിക്കില്ലെന്നും മന്ത്രി എം.ബി. രാജേഷ് രാജിവയ്ക്കണമെന്നും പ്രതിപക്ഷ നേതാവ് ആവശ്യപ്പെട്ടു. രാജിക്കായി പ്രതിഷേധം നടത്തുമെന്നും പ്രതിപക്ഷ നേതാവ് അറിയിച്ചു. പണപ്പെട്ടി അന്വേഷിക്കേണ്ടത് കോൺ​ഗ്രസ് പ്രവർത്തകരുടെ മുറിയിൽ അല്ലെന്നും മുഖ്യമന്ത്രി പിണറായി വിജയന്റെ ക്ലിഫ്ഹൗസിലാണ് അഴിമതിയുടെ പണപ്പെട്ടിയുള്ളതെന്നും സതീശൻ പറഞ്ഞു. 

കൊടകര കുഴൽപ്പണ കേസിൽ മുഖം നഷ്ടപ്പെട്ട ബിജെപി സിപിഎം പാർട്ടികൾ നടത്തിയ നാടകമാണിതെന്നും കേരള പൊലീസ് അടിമക്കൂട്ടമായി മാറിയെന്നും പ്രതിപക്ഷ നേതാവ് ആരോപിച്ചു. വാളയാര്‍ കേസില്‍ പ്രതികളെ രക്ഷിക്കാന്‍ സഹായിച്ചയാളും ഇന്നലെയുണ്ടായിരുന്നുവെന്ന് വി ഡി സതീശന്‍ പറഞ്ഞു. 

പൊലീസിന്റെ വിശദീകരണത്തിൽ വൈരുദ്ധ്യമുണ്ട്. തൊട്ടടുത്ത് ഉണ്ടായിരുന്ന ബിജെപി, സിപിഎം വനിത പ്രവർത്തകരുടെ മുറി പരിശോധിക്കാത്തത് എന്തുകൊണ്ടാണ്. പൊലീസ് എത്തുന്നതിന് മുമ്പേ ഡിവൈഎഫ്ഐയുടെയും ബിജെപിക്കാരുടെയും ആളുകൾ ഹോട്ടലിലുണ്ടായിരുന്നു. റെയ്ഡ് നടത്താൻ പോകുന്ന വിവരം കൈരളി ടിവി എങ്ങനെ അറിഞ്ഞു. ഇവരെ അറിയിച്ചിട്ടാണോ പൊലീസ് റെയ്ഡ് നടത്താൻ പോകുന്നതെന്നും സതീശൻ ചോദിച്ചു.

അതേസമയം സിസിടിവി ദൃശ്യങ്ങൾ പരിശോധിക്കാൻ തിരഞ്ഞെടുപ്പ് കമ്മീഷന്റെ ഫ്ലയിങ് സ്ക്വാഡ് പൊലീസിന് നിർദ്ദേശം നൽകി.

ചൊവ്വാഴ്ച അർദ്ധരാത്രിയോടെയാണ് കോൺ​ഗ്രസ് നേതാക്കൾ താമസിച്ച ഹോട്ടലിൽ പോലീസ് സംഘം പരിശോധന നടത്തിയത്. പാലക്കാട്ടെ യുഡിഎഫ് സ്ഥാനാർഥി രാഹുൽ മാങ്കൂട്ടത്തിലിനായി അനധികൃതമായ പണം എത്തിച്ചെന്ന് തെരഞ്ഞെടുപ്പ് കമ്മീഷന് പരാതി ലഭിച്ചതിനെ തുടർന്നാണ് പോലീസ് പരശോധന നടത്തിയത്.