Sharon Murder Case: കലർത്തി നൽകിയത് പാരക്വിറ്റ് കളനാശിനി; ഷാരോൺ കൊലപാതകത്തിൽ നിർണായക വെളിപ്പെടുത്തലുകളുമായി മെഡിക്കൽ സംഘം

ഷാരോൺ വധക്കേസിൽ നിർണായക തെളിവുമായി മെഡിക്കൽ സംഘം. കഷായത്തിൽ കലർത്തിയത് കളനാശിനിയായി ഉപയോ​ഗിക്കുന്ന പാരക്വിറ്റാണെന്ന് ​മെഡിക്കൽ സംഘം കോടതിയിൽ മൊഴി നൽകി. നെയ്യാറ്റിൻകര അഡീഷണൽ ജില്ലാ സെഷൻസ് ജഡ്ജി എ.എം ബഷീറിന് മുന്നിലാണ് ഷാരോണിനെ ചികിത്സിച്ച ഡോക്ടർമാർ മൊഴി നൽകിയത്.‌

​ഗ്രീഷ്മ വിഷത്തിന്റെ പ്രവർത്തനരീതി വെബ്സെർച്ചിലൂടെ മനസ്സിലാക്കിയതിന്റെ ഡിജിറ്റൽ തെളിവും പ്രോസിക്യൂഷൻ ഹാജരാക്കി. ഒക്ടോബർ 15 നാണ് ഷാരോൺ കേസുമായി ബന്ധപ്പെട്ട വിചാരണ നെയ്യാറ്റിൻകര അഡീഷണൽ സെഷൻസ് കോടതിയിൽ ആരംഭിച്ചത്. കോടതിയിൽ വാദം തുടരുന്നതിനിടെയാണ് ഗ്രീഷ്മക്കെതിരെ ഗുരുതര തെളിവുകൾ പ്രോസിക്യൂഷൻ കോടതിയിൽ ഹാജരാക്കിയത്.

വിഷം നൽകുന്നതിന് മണിക്കൂറുകൾക്ക് മുൻപ്‌ ഗ്രീഷ്മ പാരക്വിറ്റ് വിഷം മനുഷ്യശരീരത്തിൽ എങ്ങനെയാണ് പ്രവർത്തിക്കുന്നതെന്ന് ഇന്റർനെറ്റിൽ തിരഞ്ഞതായും 15 മില്ലി വിഷം ശരീരത്തിലെത്തിയാല്‍ മരണം ഉറപ്പാണെന്ന് വെബ്‌സെര്‍ച്ചിലൂടെ മനസിലാക്കിയതായും പ്രോസിക്യൂഷൻ വാദിച്ചു. 

തഹസിൽദാർ നൗഷാദിന്റെ സാന്നിധ്യത്തിലാണ് ഗ്രീഷ്മ വെബ് സെർച്ച് ചെയ്ത തെളിവുകൾ ഫോണിൽനിന്നു കണ്ടെടുത്ത് മഹസർ തയ്യാറാക്കിയത്. വിഷത്തിന്റെ കുപ്പിയും മറ്റുതെളിവുകളും പ്രോസിക്യൂഷൻ കോടതിയിൽ ഹാജരാക്കിയിരുന്നു. താലികെട്ടിയശേഷം ഇരുവരും ഒരുമിച്ച് തൃപ്പരപ്പിലെ ഹോട്ടലിൽ താമസിച്ചിരുന്നു. ഹോട്ടൽ മാനേജർ കോടതിയിലെത്തി ഗ്രീഷ്മയെ തിരിച്ചറിഞ്ഞു. 

പാറശ്ശാല സ്വദേശിയായ ഷാരോണും തമിഴ്നാട്ടിലെ ദേവിയോട് സ്വദേശിയായ ​ഗ്രീഷ്മയും പ്രണയത്തിലായിരുന്നു. ഇതിനിടെ ആർമി ഉദ്യോ​ഗസ്ഥനുമായി വിവാഹം ഉറപ്പിക്കുന്നു. ഗ്രീഷ്മയുടെ ജാതകപ്രകാരം ആദ്യ ഭർത്താവ് മരിച്ചുപോകുമെന്ന് ജ്യോത്സ്യൻ പറഞ്ഞതിനെ തുടർന്നാണ് താലികെട്ടിയശേഷം ഷാരോണിനെ കഷായത്തിൽ  വിഷം കലർത്തി നൽകി കൊലപ്പെടുത്തിയത്.

ഷാരോൺ കൊലപാതകത്തിൽ ഗ്രീഷ്മയുടെ അമ്മ സിന്ധു രണ്ടും അമ്മാവൻ നിർമൽകുമാർ മൂന്നും പ്രതികളാണ്. ഗ്രീഷ്മയ്ക്ക് പാരക്വിറ്റ് കളനാശിനി വാങ്ങിനൽകിയത് മൂന്നാം പ്രതിയായ അമ്മാവൻ നിർമൽകുമാറാണ്. 

പരമാവധി തെളിവുകൾ കോടതിയിൽ ഹാജരാക്കാൻ ആണ് പ്രോസിക്യൂഷൻ തീരുമാനം. ക്രൈംബ്രാഞ്ച് സമർപ്പിച്ച കുറ്റപത്രത്തിൽ ആകെ 141 സാക്ഷികൾ ആണുള്ളത്.