Airport Strike: ശമ്പള പരിഷ്കരണവും ബോണസും ആവശ്യം; തിരുവനന്തപുരം വിമാനത്താവളത്തിലെ സമരം തുടരുന്നു

തിരുവനന്തപുരം: തിരുവനന്തപുരം അന്താരാഷ്ട്ര വിമാനത്താവളത്തില്‍ ഒരു വിഭാഗം ജീവനക്കാര്‍ നടത്തുന്ന പണിമുടക്ക് തുടരുകയാണ്. ഗ്രൗണ്ട് ഹാന്‍ഡ്‌ലിങ് ഏജന്‍സിയിലെ ഒരുവിഭാഗം ജീവനക്കാരാണ് നിലവിൽ പണിമുടക്കുന്നത്. 

ശമ്പള പരിഷ്കരണവും ബോണസും ആവശ്യപ്പെട്ടാണ് ഇവർ പണിമുടക്ക് നടത്തുന്നത്. സമരം വിമാനത്താവളത്തിന്റെ പ്രവർത്തനത്തെ താറുമാറാക്കിയിരിക്കുകയാണ്. സംയുക്ത തൊഴിലാളി യൂണിയനുകളുടെ നേതൃത്വത്തിലാണ് വിമാനത്താവളത്തിൽ പണിമുടക്ക് നടക്കുന്നത്.

വിമാനത്താവളത്തിലെ പണിമുടക്ക്  യാത്രക്കാരെയും ബാധിച്ചിട്ടുണ്ട്. ബെംഗളൂരു – തിരുവനന്തപുരം വിമാനത്തിലെ യാത്രക്കാർക്ക് പുറത്തിറങ്ങാനായത്  40 മിനിറ്റിന് ശേഷമാണ്, എന്നാൽ സമരത്തെ തുടർന്ന് വിമാനങ്ങളൊന്നും റദ്ദാക്കിയിട്ടില്ല. പണിമുടക്കുന്ന ജീവനക്കാർക്ക് പകരം ജീവനക്കാരെ നിയോ​ഗിക്കുന്ന നടപടികൾ തുടരുന്നുമുണ്ട്. ഈ നടപടി വലിയ പ്രശ്‌നമായി മാറി. റിപ്പോർട്ടുകളുടെ അടിസ്ഥാനത്തിൽ സമരം ഉടൻ അവസാനിക്കാൻ സാധ്യതയില്ല എന്നാണ്.  

പണിമുടക്കുമായി മുന്നോട്ട് പോകുമെന്നാണ് തൊഴിലാളികൾ അറിയിച്ചിരിക്കുന്നത്. എയർ ഇന്ത്യ സാറ്റ്സിലെ ഗ്രൗണ്ട് ഹാൻഡ്‌ലിംഗ് വിഭാഗം കരാർ തൊഴിലാളികളാണ് ഇപ്പോൾ പണിമുടക്കുന്നത്. 400 ഓളം ജീവനക്കാരാണ് സമരത്തിന്റെ ഭാ​ഗമായിരിക്കുന്നതെന്ന് സമരസമിതി അറിയിച്ചിട്ടുണ്ട്.  ഇന്നലെ രാത്രിയാണ് സമരം ആരംഭിച്ചത്.