Nipah Virus: കണ്ണൂരിൽ നിപ ബാധയെന്ന് സംശയം; ചികിത്സയിലുള്ളത് രണ്ട് പേർ

ണ്ണൂർ: കണ്ണൂർ ജില്ലയിൽ നിപ ബാധയെന്ന് സംശയം. രണ്ട് പേരെ രോ​ഗലക്ഷണങ്ങളോടെ പരിയാരം മെഡിക്കൽ കോളേജിൽ പ്രവേശിപ്പിച്ചു. മട്ടന്നൂർ സ്വദേശികളായ അച്ഛനും മകനുമാണ് നിപ രോ​ഗലക്ഷണങ്ങളോടെ ചികിത്സയിലുള്ളത്. ഇരുവരുടെയും സ്രവങ്ങൾ കോഴിക്കോട്ടേക്ക് പരിശോധനയ്ക്ക് അയക്കും. ഇരുവരെയും ഐസൊലേറ്റ് ചെയ്ത് നിരീക്ഷിച്ചുവരികയാണ്.

കഴിഞ്ഞ ദിവസം ഇവർ പനിയെ തുടർന്ന് ചികിത്സ തേടിയിരുന്നു. ആദ്യം മട്ടന്നൂരിലെ സ്വകാര്യ ആശുപത്രിയിലാണ് ചികിത്സ തേടിയത്. പിന്നീട് കണ്ണൂർ ജില്ലാ ആശുപത്രിയിലും ചികിത്സ തേടി. ഇവിടെ നടത്തിയ പരിശോധനയിൽ നിപല ലക്ഷങ്ങൾ കണ്ടെത്തി. തുടർന്ന് പരിയാരം മെഡിക്കൽ കോളേജിലേക്ക് മാറ്റുകയായിരുന്നു.

നിരീക്ഷണത്തിൽ കഴിയുന്ന പിതാവ് പഴക്കച്ചവടം നടത്തുന്ന ആളാണ്. ഇത് ആശങ്ക വർധിപ്പിച്ചിട്ടുണ്ട്. പരിയാരം മെഡിക്കൽ കോളേജിലും ഇവരുടെ വീട് സ്ഥിതി ചെയ്യുന്ന പ്രദേശത്തും ജാ​ഗ്രത നിർദേശം നൽകിയിട്ടുണ്ട്. എല്ലാവരും നിർബന്ധമായി മാസ്ക് ധരിക്കണമെന്ന് അധികൃതർ നിർദേശം നൽകിയിട്ടുണ്ട്. കഴിഞ്ഞ മാസം മലപ്പുറത്ത് പതിനാലുകാരന് നിപ സ്ഥിരീകരിച്ചിരുന്നു. ചികിത്സയിലിരിക്കെ കുട്ടി മരിച്ചു.

ഇതേ തുടർന്ന് മലപ്പുറത്ത് ജാ​ഗ്രത നിർദേശം നിലനിന്നിരുന്നു. കഴിഞ്ഞ ദിവസമാണ് മലപ്പുറത്തെ നിപ മുക്തമായി പ്രഖ്യാപിച്ചത്. ഡബിൾ ഇൻക്യുബേഷൻ പിരീഡ് ആയ 42 ദിവസം കഴിഞ്ഞതിനാൽ നിയന്ത്രണങ്ങൾ പൂർണമായി ഒഴിവാക്കിയിരുന്നു. സമ്പർക്കപ്പട്ടികയിൽ ഉൾപ്പെട്ടിരുന്നവരെ പട്ടികയിൽ നിന്ന് ഒഴിവാക്കി. 472 പേരാണ് പട്ടികയിൽ ഉൾപ്പെട്ടിരുന്നത്.