Theft: മോഷണത്തിനിടെ അലമാര കുത്തിത്തുറന്നപ്പോൾ കിട്ടയത് മദ്യം, കള്ളൻ കുടിച്ച് പൂസായി സ്വർണം കണ്ടില്ല; സംഭവം കൊല്ലത്ത്

കൊല്ലം: കടയ്ക്കലിന് സമീപം ചിതറയിൽ പരേതനായ സൈനികന്‍റെ വീട്ടിൽ മോഷണശ്രമം. ആളില്ലാത്ത തക്കം നോക്കി വീടു കുത്തിപ്പൊളിച്ച് അകത്തുകടന്ന കള്ളന് വീട്ടിൽ സൂക്ഷിച്ചിരുന്ന മദ്യം കണ്ടപ്പോൾ ലക്ഷ്യം തെറ്റി. ഒരു ഫുൾ കുപ്പിയുടെ പകുതിയും ഒരു ബിയറും അകത്താക്കിയ ശേഷം വീട്ടിലെ അലമാര കുത്തിപ്പൊളിച്ചു. തുണിയെല്ലാം വാരിവലിച്ചിട്ടെങ്കിലും കാര്യമായി ഒന്നും കിട്ടിയില്ല. വാരിവലിച്ചിട്ട തുണികൾക്കിടയിൽ സൂക്ഷിച്ചിരുന്ന നാലുപവന്‍റെ ആഭരണങ്ങൾ മദ്യത്തിന്‍റെ ഹാങ് ഓവറിൽ കണ്ടതുമില്ല.

രണ്ട് ഫുൾബോട്ടിലും ഒരു കുപ്പി ബിയറുമായി കള്ളൻ സ്ഥലം വിടുകയും ചെയ്തു. മകൻ ശബരിമല‌ യാത്രയിലായിരുന്നതിനാൽ വീട്ടമ്മ തിരുവനന്തപുരത്തെ കുടുംബവീട്ടിൽ പോയിരുന്ന സമയത്താണ് മോഷണം നടന്നത്. ഞായറാഴ്ച രാവിലെ റബ്ബർ പാൽ എടുക്കാൻ വന്ന സ്ത്രീ വീടിന്റെ മുൻവശത്തെ വാതിൽ കുത്തിപ്പൊളിച്ച നിലയിൽ കണ്ടതോടെയാണ് മോഷണവിവരം പുറത്തറിഞ്ഞത്.

തിരിച്ചെത്തിയ വീട്ടമ്മയും പ്രദേശവാസികളും ചേർന്ന് അറിയിച്ചതിനെ തുടർന്ന് പൊലീസെത്തി പരിശോധന നടത്തി. സ്വർണം നഷ്ടപ്പെട്ടെന്നാണ് വീട്ടുകാരും പോലീസും കരുതിയത്. വൈകിട്ട് വിരലടയാള വിദഗ്ധരെത്തി പരിശോധന നടത്തിയ ശേഷമാണ് ട്വിസ്റ്റ്. പരിശോധനകൾ പൂർത്തിയായ ശേഷം മുറി വൃത്തിയാക്കുന്നതിനിടെ വാരിവിതറിയ തുണികൾക്കിടയിൽ നിന്ന്  ആഭരണങ്ങൾ കണ്ടെത്തുകയായിരുന്നു.

വീടു കുത്തിത്തുറന്നുളള മോഷണശ്രമം പരാജയപ്പെട്ടെങ്കിലും മദ്യക്കുപ്പികളുമായി കള്ളൻ കടന്നു. മദ്യലഹരിയിലായിപ്പോയ കളളൻ അലമാരയിലിരുന്ന തുണികൾ വാരിവലിച്ചിട്ടെങ്കിലും ഇതിനിടയിൽ സൂക്ഷിച്ചിരുന്ന നാലു പവൻ സ്വർണം കണ്ടില്ല. സംഭവത്തിൽ പോലീസ് അന്വേഷണം ആരംഭിച്ചു. സംഭവത്തിൽ ഒന്നിലേറെ പേർ ഉൾപ്പെട്ടതായാണ് പോലീസ് സംശയിക്കുന്നത്.