ആറ്റിങ്ങലിൽ ലോറിയും കാറും കൂട്ടിയിടിച്ച് മൂന്നു പേർ മരിച്ചു

തിരുവനന്തപുരം:  ആറ്റിങ്ങലിൽ ലോറിയും കാറും കൂട്ടിയിടിച്ചുണ്ടായ അപകടത്തിൽ മൂന്നു പേർ മരിച്ചു.  അഞ്ചുപേർക്ക് ഗുരുതരമായി പരിക്കേറ്റു.  ആറ്റിങ്ങൽ ദേശീയപാതയിൽ ടിബി ജംക്ഷന് സമീപത്തുവച്ച് പുലർച്ചെ ഒരു മണിയോടെയായിരുന്നു അപകടം.  

കൊല്ലത്തുനിന്നും തിരുവനന്തപുരത്തേക്ക് വന്ന ടാങ്കർ ലോറി തിരുവനന്തപുരത്തു നിന്നും കൊല്ലത്തേയ്ക്ക് പോകുകയായിരുന്ന ഫോർച്ചൂണർ കാറുമായി കൂട്ടിയിടിച്ചാണ് അപകടം ഉണ്ടായത്.    ഇരുവാഹനങ്ങളും അമിത വേഗത്തിലായിരുന്നു.  കാറിൽ 8 പേരാണ് ഉണ്ടായിരുന്നത്.  ഇതിൽ മൂന്നുപേർ മരിക്കുകയും പരിക്കേറ്റ 5 പേരെ തിരുവനന്തപുരം മെഡിക്കൽ കോളേജ് ആശുപത്രിയിൽ അഡ്മിറ്റ് ചെയ്യുകയും ചെയ്തിട്ടുണ്ട്.  

അപകട കാരണം വ്യക്തമല്ല. കാർ പൂർണ്ണമായും തകർന്നു.  അപകട വിവരം അറിഞ്ഞെത്തിയ  പൊലീസും നാട്ടുകാരും അഗ്നിശമന സേനയും ചേർന്നാണ് രക്ഷാപ്രവർത്തനം നടത്തിയത്.  കാർ വെട്ടിപ്പൊളിച്ചാണ് കാറിലുള്ളവരെ പുറത്തെടുത്തത് എന്നാണ് റിപ്പോർട്ട്.