Tiger attack: വാകേരിയിൽ വീണ്ടും കടുവയിറങ്ങി; പശുക്കിടാവിനെ കൊന്നു, ഭീതി മാറാതെ നാട്ടുകാർ

കൽപ്പറ്റ: വയനാട് വാകേരി സി.സിയിൽ വീണ്ടും കടുവയുടെ ആക്രമണം. ഞാറക്കാട്ടിൽ സുരേന്ദ്രന്റെ എട്ടുമാസം പ്രായമുള്ള പശുക്കിടാവിനെ കടുവ കൊന്നു. പ്രദേശത്ത് വനം വകുപ്പ് നടത്തിയ പരിശോധനയിൽ കടുവയാണെന്ന് സ്ഥീരികരിച്ചു. മേഖലയിൽ ക്യാമറയും സ്ഥാപിച്ചിട്ടുണ്ട്.

ഞാറക്കൽ സുരേന്ദ്രന്റെ എട്ടുമാസം പ്രായമായ പശുക്കിടാവിനെ ഇന്ന്‌ രാവിലെയാണ് തൊഴുത്തിൽ പാതി ഭക്ഷിച്ച നിലയിൽ കണ്ടെത്തിയത്. പ്രഭാത നടത്തത്തിന് ഇറങ്ങിയ വീട്ടുകാർ സംഭവം ശ്രദ്ധയിൽപ്പെട്ട ഉടൻ വനം വകുപ്പിനെ വിവരം അറിയിക്കുകയായിരുന്നു. വനം വകുപ്പ് ഉദ്യോഗസ്ഥർ സ്ഥലത്തെത്തി പരിശോധന നടത്തി. 

നേരത്തെ യുവ കര്‍ഷകന്റെ ജീവനെടുത്ത നരഭോജി കടുവയെ പിടികൂടിയ കൂടല്ലൂരില്‍ നിന്ന്‌ 5 കിലോ മീറ്റര്‍ മാത്രം അകലെയാണ് സി.സി. വീണ്ടും കടുവ ഇറങ്ങിയതോടെ കടുത്ത ഭീതിയിലാണ് പ്രദേശവാസികൾ. ജനങ്ങളുടെ ജീവനും സ്വത്തിനും സുരക്ഷ ഉറപ്പാക്കാന്‍ അടിയന്തര നടപടി സ്വീകരിക്കണമെന്നാണ് നാട്ടുകാരുടെ ആവശ്യം.