Tiger attack: കടുവ, കരടി, പുലി; വന്യമൃഗശല്യത്തിൽ പൊറുതിമുട്ടി വയനാടൻ ജനത

കൽപ്പറ്റ: വന്യമൃഗശല്യത്തിൽ പൊറുതിമുട്ടി വയനാടൻ ജനത. വകേരി മൂടക്കൊല്ലിയിൽ വീണ്ടും കടുവയുടെ ആക്രമണം ഉണ്ടായി. മേപ്പാടി കടൂരിൽ തുടർച്ചയായ 3 ദിവസങ്ങളിൽ നാട്ടുകാർ പുലിയെ കണ്ടു. ഇതിനിടയിൽ നാല് ദിവസമായി മാനന്തവാടിയിലെയും പനമരത്തെയും ജനവാസ മേഖലയിൽ ഇറങ്ങിയ കരടിയെ കാട് കയറ്റിയതായി വനം വകുപ്പ് അറിയിച്ചു. 

കഴിഞ്ഞ ദിവസം പുലർച്ചെയാണ് വാകേരി മൂടക്കൊല്ലിയിൽ വീണ്ടും കടുവയുടെ ആക്രമണമുണ്ടായത്. ‌മൂടക്കൊല്ലി സ്വദേശി ശ്രീജിത്തിന്റെയും ശ്രീനിഷിന്റെയും ഉടമസ്ഥതയിലുള്ള പന്നി ഫാമിലെ ഒരു പന്നിയെ കടുവ കൊന്നു. ഒരു മാസത്തിനിടെ നാല് തവണയായി 27 പന്നികളെയാണ് കടുവ ആക്രമിച്ചു കൊന്നത്. ഇതോടെ സംഭവത്തിൽ പ്രതിഷേധിച്ച നാട്ടുകാർ ഇരുളം ഫോറസ്റ്റ് ഓഫീസ് ഉപരോധിച്ചു.

ഇതിനിടയിൽ മേപ്പാടി കടൂരിൽ തുടർച്ചയായ മൂന്നാം ദിവസവും പുലിയിറങ്ങി. ഇന്നലെ വൈകുന്നേരം 6 മണിയോട തേയില തോട്ടത്തിലെ പാറയുടെ  മുകളിലായാണ് നാട്ടുകാർ പുലിയെ കണ്ടത്. ജനവാസ മേഖലയിറങ്ങിയ പുലിയെ കൂടുവെച്ച് പിടികൂടണമെന്നാണ് നാട്ടുകാരുടെ ആവശ്യം.

നാല് ദിവസമായി ജനവാസ കേന്ദ്രത്തിൽ തുടരുന്ന കരടിക്കായുള്ള തിരച്ചിൽ നടത്തിയെങ്കിലും കരടിയെ കണ്ടെത്താനായില്ല. കഴിഞ്ഞ ദിവസം തരുവണയിലെത്തിയ കരടി ഇന്നലെ പുലർച്ചയോടെയാണ് പനമരത്തെത്തിയത്. തുടർന്ന് പുൽപ്പള്ളി ഫോറസ്റ്റ് സ്റ്റേഷൻ പരിധിയിലെ നെയ്ക്കുപ്പാ വനത്തിലേക്കാണ് വനം വകുപ്പ് കരടിയെ ഓടിച്ചു കയറ്റിയത്.