Tribal Man Attacked: ആദിവാസി യുവാവിനെ റോഡിലൂടെ വലിച്ചിഴച്ച സംഭവം; രണ്ട് പേർ കൂടി പിടിയിൽ

വയനാട്: കൂടൽകടവിൽ ആദിവാസി യുവാവിനെ കാറിൻ്റെ ഡോറിൽ കൈ കുരുക്കി വലിച്ചിഴച്ച സംഭവത്തിൽ രണ്ടുപേർ കൂടി പിടിയിലായി. വയനാട് പനമരം സ്വദേശികളായ വിഷ്ണു, നബീൽ കമർ എന്നിവരാണ് കോഴിക്കോട് നിന്ന് പിടിയിലായത്. മാനന്തവാടി പോലീസ് സ്റ്റേഷനിൽ എത്തിച്ച പ്രതികളെ കോടതിയിൽ ഹാജരാക്കും. പട്ടികജാതി പട്ടികവർഗ അതിക്രമ നിരോധന നിയമം, വധശ്രമം ഉൾപ്പെടെയുള്ള വകുപ്പുകൾ ചുമത്തിയാണ് അറസ്റ്റ്. 

ഇവരുടെ സുഹൃത്തുക്കളും കേസിലെ കൂട്ടുപ്രതികളുമായ അഭിരാം, അർഷിദ് എന്നിവരെ നേരത്തെ പൊലീസ് പിടികൂടിയിരുന്നു. ബാം​ഗ്ലൂർ ബസ്സിൽ കൽപ്പറ്റയിലേക്ക് വരുമ്പോഴായിരുന്നു മാനന്തവാടി പൊലീസ് അ‍ർഷിദിനെയും അഭിരാമിനെയും അറസ്റ്റ് ചെയ്തത്. പ്രതികൾക്കെതിരെ വധശ്രമത്തിനാണ് കേസെടുത്തിരിക്കുന്നത്. പ്രതികൾ സഞ്ചരിച്ച KL52 H 8733 നമ്പർ സെലേറിയോ കാർ മാനന്തവാടി പോലീസ് കഴിഞ്ഞദിവസം കസ്റ്റഡിയിലെടുത്തിരുന്നു. സംഭവത്തിന് ശേഷം കാർ ഉപേക്ഷിച്ച് പ്രതികൾ കടന്നുകളയുകയായിരുന്നു.

കഴിഞ്ഞ ദിവസമാണ് കൂടൽ കടവ് സ്വദേശിയായ മാതനെ ഇവർ കാറിൽ വലിച്ചിഴയ്ക്കുന്ന ദൃശ്യം പുറത്തുവന്നത്. ഞായറാഴ്ച വൈകിട്ടാണ് കൂടൽ കടവിൽ നാലംഗ സംഘം മാതനെ ആക്രമിച്ചത്. വിനോദസഞ്ചാരികൾ തമ്മിലുണ്ടായ സംഘർഷത്തിൽ ഇടപ്പെട്ട മാതനെ പ്രതികൾ റോഡിലൂടെ വലിച്ചിഴയ്ക്കുകയായിരുന്നു. കാറിന്റെ ഡോറിനോട് കൈ ചേർത്ത് പിടിച്ച് അര കിലോമീറ്ററോളം ദൂരം ഇത്തരത്തിൽ യുവാവിനെ വലിച്ചിഴച്ചു. കൈകാലുകൾക്കും നട്ടെല്ലിനും പരിക്കേറ്റ മാതൻ മാനന്തവാടി മെഡിക്കൽ കോളജിൽ ചികിത്സയിലാണ്.