Wayanad Student Death: സിദ്ധാർഥന്റെ മരണത്തിൽ ആരോപണവിധേയനായ അക്ഷയുടെ മൊഴി രേഖപ്പെടുത്തി പോലീസ്

വയനാട്: പൂക്കോട് വെറ്റിനറി സർവകലാശാല വിദ്യാർഥി സിദ്ധാർഥന്റെ ദുരൂഹ മരണത്തിൽ ഇടുക്കി സ്വദേശി അക്ഷയുടെ മൊഴി പൊലീസ് രേഖപ്പെടുത്തി. എസ്എഫ്ഐ ഭാരവാഹിയും സിദ്ധാർഥന്റെ സഹപാഠിയും ആയിരുന്ന അക്ഷയ്ക്കെതിരെ സിദ്ധാർഥന്റെ കുടുംബം രംഗത്തെത്തിയിരുന്നു. അക്ഷയ് ആണ് സിദ്ധാർഥന്റെ ഫോൺ കൈകാര്യം ചെയ്തിരുന്നതെന്ന് കുടുംബം ആരോപിച്ചിരുന്നു.

പൂക്കോട് വെറ്ററിനറി സർവകലാശാലാ രണ്ടാം വർഷ ബി വി എസ് സി വിദ്യാർഥിയും ഇടുക്കി സ്വദേശിയുമായ അക്ഷയ്, കേസിൽ പ്രതിയാണെന്നാരോപിച്ച് കുടുംബം രംഗത്തു വന്നതിന് പിന്നാലെയാണ് പൊലീസ് ഇയാളുടെ മൊഴി രേഖപ്പെടുത്തിയത്. സിദ്ധാർഥനെ മർദ്ദിക്കുന്നത് നേരിൽ കണ്ടുവെന്ന് അക്ഷയ് മൊഴി നൽകിയതെന്നാണ് വിവരം.

സിദ്ധാർഥൻ മരിച്ചതിന് ശേഷം കോളജ് ഹോസ്റ്റലിൽ നിന്ന് പുറത്താക്കിയ 31 പേരിൽ അക്ഷയ് ഉൾപ്പെട്ടിരുന്നെങ്കിലും പൊലീസ് കണ്ടെത്തിയ 18 പ്രതികളിൽ ഇയാൾ ഉണ്ടായിരുന്നില്ല. അറസ്റ്റിലായ 18 പ്രതികളിൽ അഞ്ച് പേരെ തിങ്കളാഴ്ച കസ്റ്റഡിയിൽ വാങ്ങുമെന്നറിയിച്ച പോലീസ്, കൊലപാതക സാധ്യതയെ കുറിച്ച് കൂടുതൽ അന്വേഷണം നടത്തുന്നുണ്ടെന്നും അറിയിച്ചു.

കേസിൽ മുഖ്യപ്രതികളെന്ന് പോലീസ് കണ്ടെത്തിയ സിൻജോ ജോൺസൺ, ആർ എസ് കാശിനാഥൻ, അമീൻ അക്ബർ അലി, കെ അരുൺ, അമൽ ഇഹ്സാൻ എന്നിവരെ തിങ്കളാഴ്ച പോലീസ് കസ്റ്റഡിയിൽ വാങ്ങി ചോദ്യം ചെയ്യും.

18 പ്രതികളുടെയും ഫോണുകൾ കസ്റ്റഡിയിലെടുത്ത പോലീസ് ഫോണിൽ മർദ്ദന ദൃശ്യങ്ങൾ ഉണ്ടോ എന്ന് പരിശോധിക്കാൻ കോടതിയിൽ അപേക്ഷ നൽകും. അതിനിടെ കൊലപാതക സാധ്യത എന്ന കുടുംബത്തിൻ്റെ ആരോപണത്തിൽ കൂടുതൽ അന്വേഷണം ഉണ്ടായേക്കും. കൊലപാതക സാധ്യതയെക്കുറിച്ച് ആഴത്തിൽ അന്വേഷണം നടത്തുന്നുണ്ടെന്നും പോലീസ് അറിയിച്ചു.