Wild Animal Attack : നെടുംകണ്ടത്ത് കാട്ടുപന്നി ഇടിച്ച് ഓട്ടോ മറിഞ്ഞ് രണ്ട് പേർക്ക് പരിക്ക്

ഇടുക്കി : നെടുംകണ്ടത്ത് കാട്ടുപന്നി ഓട്ടോയിൽ വന്നിടിച്ച് രണ്ട് പേർക്ക് പരിക്ക്. നെടുംകണ്ടം തേർഡ് ക്യാമ്പ് പാൽ സൊസൈറ്റി ജീവനക്കാരനും ഓട്ടോ ഡ്രൈവർക്കുമാണ് കാട്ടുപന്നിയുടെ ആക്രമണത്തിൽ പരിക്കേറ്റത്. നെടുംകണ്ടം സ്വദേശികളായ ഷാജി, റെജി എന്നിവർക്കാണ് പരിക്കേറ്റത്.

ഓട്ടോ ഡ്രൈവറായ റെജിയെ നെടുംകണ്ടത്തെ തൂക്കുപാലത്തെ സ്വകാര്യ ആശുപത്രിയിൽ പ്രവേശിപ്പിച്ചു. പാൽ സൊസൈറ്റി ജീവനക്കാരനായ ഷാജിക്ക് ഗുരുതരമായി പരിക്കേൽക്കുകയും ചെയ്തു. തൂക്കുപാലത്തെ സ്വകാര്യ ആശുപത്രിയിൽ പ്രാഥമിക ശുശ്രൂഷ നൽകിയതിന് ശേഷം ഷാജിയെ കട്ടപ്പനയിലെ മറ്റ് സ്വകാര്യ ആശുപത്രിയിലേക്ക് മാറ്റി.

പാൽ സൊസൈറ്റിയിൽ വിൽപന നടത്തുന്നതിനിടെയാണ് കാട്ടുപന്നിയുടെ ആക്രമണം ഉണ്ടായത്. പന്നി വന്ന് ഓട്ടോയിൽ വന്നിടിക്കുകയും തുടർന്ന് ഓട്ടോ മറിയുകയായിരുന്നു. തുടർന്ന് ഓട്ടോ റെജിയുടെയും ഷാജിയുടെയും ശരീരത്തിലേക്ക് വന്ന് വീഴുകയായിരുന്നു. ഷാജിയുടെ നെഞ്ചിന്റെ ഭാഗത്തേക്കാണ് ഓട്ടോ വീണത്. റെജിക്ക് കാലിന് മുഖത്തുമാണ് പരിക്കേറ്റത്.