TIPS treatment: നാല് ലക്ഷത്തോളം രൂപ ചിലവ് വരുന്ന ചികിത്സ, കോട്ടയം മെഡിക്കൽ കോളേജ് ആശുപത്രിയിൽ ടിപ്സ് ചികിത്സ സൗജന്യം; എന്താണ് ടിപ്സ്?

കോട്ടയം: ലിവർ സിറോസിസ് ​ഗുരുതരമായ അവസ്ഥയിൽ എത്തുമ്പോൾ വയറിലുണ്ടാകുന്ന അനിയന്ത്രിതമായി വെള്ളക്കെട്ട്, രക്തം ചർദ്ദിക്കൽ എന്നിവയ്ക്കുള്ള അതിനൂതന ചികിത്സയായ ടിപ്സ് കോട്ടയം മെഡിക്കൽ കോളേജിൽ സൗജന്യമായി ചെയ്യുന്നു. രണ്ട് പേർക്ക് വിജയകരമായി ചികിത്സ നടത്തി. സ്വകാര്യ ആശുപത്രികളിൽ ഈ ചികിത്സയക്ക് നാല് ലക്ഷത്തോളം രൂപ ചിലവ് വരും.

കരൾ ചികിത്സാരം​ഗത്ത് ലോകോത്തര നിലവാരത്തിലുള്ള മുന്നേറ്റത്തിന് തുടക്കം കുറിച്ചിരിക്കുകയാണ് കോട്ടയം മെഡിക്കൽ കോളേജ്. ട്രാൻസ്​ജു​ഗുലാർ ഇൻട്രാഹെപ്പാറ്റിക് പോർട്ടോസിസ്റ്റമിക് ഷണ്ട് എന്നാണ് ടിപ്സിന്റെ പൂർണരൂപം.

ഇന്റർവെൻഷണൽ റേഡിയോളജി വിഭാ​ഗത്തിന്റെ നേതൃത്വത്തിൽ ഇന്റേണൽ മെഡിസിൻ, സർജിക്കൽ ​ഗ്യാസ്ട്രോ, മെഡിക്കൽ ​ഗ്യാസ്ട്രോ എന്നീ ഡിപ്പാർട്ട്മെന്റുകളുടെ സഹകരണത്തോടെയാണ് ടിപ്സ് ചികിത്സ നടത്തിയത്. ടിപ്സ് ചികിത്സയുടെ പരിശീലനം നൽകിയത് വെല്ലൂർ സിഎംസി ഇന്റർവെൻഷണൽ റേഡിയോളജി വിഭാ​ഗമാണ്.

എന്താണ് ടിപ്സ് ചികിത്സ?

ട്രാൻസ്​ജു​ഗുലാർ ഇൻട്രാഹെപ്പാറ്റിക് പോർട്ടോസിസ്റ്റമിക് ഷണ്ട് അഥവാ ടിപ്സ് കരളിലെ രണ്ട് വലിയ സിരകളായ പോർട്ടൽ സിരയെയും ഹൈപ്പാറ്റിക് സിരയെയും തമ്മിൽ ഇമേജിങ് ​ഗൈഡ്ലൈൻസ് ഉപയോ​ഗിച്ച് ബന്ധിപ്പിക്കുന്ന ഒരു പ്രക്രിയയാണ്.

ലിവർ സിറോസിസ് മൂലം രക്തസമ്മർദ്ദം ഉയർന്ന് പോർട്ടൽ വെയിൻ അടയുന്നു. ഇതിന് പ്രതിവിധിയായി ചെറിയ ഞരമ്പിലൂടെ സ്റ്റെൻഡ് കടത്തിവിട്ട് ബൈപ്പാസ് ചെയ്യുന്നു. ഇത് രക്തസമ്മർദ്ദം കുറച്ച് രക്തത്തിന്റെ ഒഴുക്ക് വർധിപ്പിക്കുന്നു.

ലിവർ സിറോസിസ് ​ഗുരുതരാവസ്ഥയിൽ ആകുന്ന പലർക്കും വയറ്റിൽ അനിയന്ത്രിതമായ വെള്ളക്കെട്ടും രക്തം ചർദ്ദിക്കൽ, മൂക്കിലൂടെ രക്തസ്രാവം എന്നിവ ഉണ്ടാകാം. ടിപ്സ് ചികിത്സയിലൂടെ ഇത് നിയന്ത്രിക്കാൻ സാധിക്കുന്നു. ടിപ്സ് ചികിത്സ ആരോ​ഗ്യം പഴയ സ്ഥിതിയിലേക്ക് എത്തിക്കാൻ സഹായിക്കും.