Allu Arjun: `ദൗർഭാ​ഗ്യകരം, കുട്ടിക്ക് ആവശ്യമായതെല്ലാം ചെയ്തുകൊടുക്കും`; വിമർശനങ്ങൾക്ക് മറുപടിയുമായി അല്ലു അർജുൻ

പുഷ്പ 2 പ്രിമീയ‍ർ ഷോക്കിടെ തിക്കിലും തിരക്കിലും പെട്ട് പരിക്കേറ്റ് ​ഗുരുതരാവസ്ഥയിൽ കഴിയുന്ന ഒമ്പത് വയസ്സുകാരൻ ശ്രീതേജിന് എല്ലാ സഹായവും ചെയ്ത് കൊടുക്കുമെന്ന് അല്ലു അ‍ർജുൻ.  ചികിത്സയിൽ കഴിയുന്ന കുട്ടിയെ കാണാൻ എത്താത്തതിൽ വലിയ വിമർശനങ്ങൾ ഉയർന്നതിന് പിന്നാലെയാണ് അല്ലു അ‍ജുന്റെ പ്രതികരണം.  

നിയമപരമായ നടപടി ക്രമങ്ങളുള്ളത് കൊണ്ടാണ് കുട്ടിയേയോ കുടുംബത്തെയോ സന്ദർശിക്കാത്തതെന്ന് അല്ലു അ‍ർജുൻ പറഞ്ഞു. കേസ് നിലനിൽക്കുന്നതിനാൽ കുട്ടിയെ സന്ദർശിക്കുന്നത് സാക്ഷികളെ സ്വാധീനിക്കുന്ന തരത്തിൽ വ്യാഖ്യാനം ചെയ്യപ്പെടും. കുട്ടിയുടെ ആരോഗ്യത്തിനായി പ്രാർത്ഥിക്കുന്നു. അവരുടെ കുടുംബത്തിനും ചികിത്സയ്ക്കുമുള്ള എല്ലാ സഹായവു ചെയ്തു കൊടുക്കും. എത്രയും പെട്ടെന്ന് കുട്ടിയെ കാണാൻ എത്തുമെന്നും അല്ലു അർജുൻ വ്യക്തമാക്കി.

പുഷ്പ 2 റിലീസിന് തലേന്ന്, ഡിസംബർ നാലാം തീയതിയാണ് പ്രീമിയർ ഷോക്കിടെ അപകടമുണ്ടായത്. സംഭവത്തിൽ ദിൽസുഖ്ന​ഗർ സ്വദേശി രേവതി മരണപ്പെടുകയും അവരുടെ ഒമ്പത് വയസ്സുകാരനായ മകൻ ശ്രീതേജ് ബോധരഹിതനാവുകയും ചെയ്തു. ശ്രീതേജ് ഇപ്പോഴും തീവ്രപരിചരണവിഭാഗത്തിൽ ചികിത്സയിലാണ്.

അപകടവുമായി ബന്ധപ്പെട്ട് അല്ലു അ‍ർജുനെ ഹൈദരാബാദ് പൊലീസ് അറസ്റ്റ് ചെയ്തിരുന്നു. നമ്പള്ളി മജിസ്ട്രേറ്റ് കോടതി 14 ദിവസത്തേക്ക് റിമാൻഡ് ചെയ്ത് ഉത്തവിട്ടതിന് പിന്നാലെ തെലങ്കാന ഹൈക്കോടതി ഇടക്കാല ജാമ്യം അനുവദിച്ചു. എന്നിരുന്നാലും ഉത്തരവ് വൈകിയതിന്റെ പശ്ചാതലത്തിൽ ചഞ്ചൽഗുഡ ജയിലിൽ ഒരു രാത്രി കഴിയേണ്ടി വന്നു.  മനപ്പൂർവ്വമല്ലാത്ത നരഹത്യ, മനപൂർവ്വം ദ്രോഹിക്കാൻ ശ്രമിച്ചു എന്നീ വകുപ്പുകളാണ് അല്ലു അർജുനെതിരെ ചുമത്തിയിരിക്കുന്നത്. ജാമ്യം ലഭിച്ച് പുറത്തിറങ്ങിയശേഷം അല്ലു അർജുൻ നടത്തിയ ആഘോഷവും വലിയ വിമർശനങ്ങൾക്ക് ഇടയാക്കിയിരുന്നു.