Suhani Bhatnagar : ദംഗലിൽ ആമീർ ഖാന്റെ മകളായി എത്തിയ ബാലതാരം സുഹാനി ഭട്നഗർ അന്തരിച്ചു

ന്യൂ ഡൽഹി : ആമീർ ഖാൻ ചിത്രം ദംഗലിൽ ബാലതാരമായി അഭിനയിച്ച നടി സുഹാനി ഭട്നഗർ അന്തരിച്ചു. ഡൽഹി എൻസിആറിൽ ഫരീദബാദിൽ വെച്ചാണ് 19കാരിയായ സുഹാനി ഭട്നഗർ മരിച്ചത്. അതേമസമയം മരണകാരണം വ്യക്തമല്ലെയെന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്. ദംഗലിൽ ഗുസ്തി താരം ബബിയ ഫോഗട്ടിന്റെ കുട്ടിക്കാലത്തെ കഥാപാത്രത്തെയാണ് സുഹാനി അവതരിപ്പിച്ചത്. അമീർ ഖാൻ മകളായിട്ടാണ് താരം ചിത്രത്തിൽ എത്തിയത്. മൃതദേഹം ഫരീദബാദ് സെക്ടർ 15ൽ സംസ്കരിക്കും.

സന്യ മൽഹോത്രയാണ് ബബിത ഫോഗട്ടിനെ അവതരിപ്പിച്ചത്. ഈ കഥാപാത്രത്തിന്റെ കുട്ടിക്കാലത്തെ വേഷത്തിലാണ് സുഹാനി ചിത്രത്തിൽ എത്തിയത്. ആമീർ ഖാൻ അവതരിപ്പിച്ച മഹാവീർ സിങ് ഫോഗട്ട് എന്ന കഥാപാത്രത്തിന്റെ മകളാണ് ബബിത ഫോഗട്ട്. ചിത്രത്തിലെ സുഹാനിയുടെ പ്രകടനം ഏറെ ശ്രദ്ധ നേടിയെടുത്തിരുന്നു.

ദംഗലിന് ശേഷം സുഹാനി തന്റെ പഠനത്തിന് വേണ്ടി സിനിമയിൽ നിന്നും വിട്ടു നിന്നിരുന്നു. സോഷ്യൽ മീഡിയയിലും താരം അത്രകണ്ട് സജീവമല്ലയാരുന്നു. 2021 നവംബറിലാണ് സുഹാനി ഏറ്റവും അവസാനമായി ഇൻസ്റ്റഗ്രാമിൽ ഒരു ചിത്രം പങ്കുവെച്ചിട്ടുള്ളത്. ഏതാനും പരസ്യ ചിത്രങ്ങളിൽ സുഹാനി ഭാഗമായിട്ടുണ്ട്. 

നിതീഷ് തിവാരി ഒരുക്കിയ ചിത്രം ആമീർ ഖാൻ പ്രൊഡക്ഷൻസിന്റെ ബാനറിൽ അമീർ ഖാനും കിരൺ റാവും ചേർന്നാണ് നിർമിച്ചിരുന്നത്. സുഹാനിയുടെ മരണത്തിൽ അമീർ ഖാൻ പ്രൊഡക്ഷൻസ് ആദരാഞ്ജലി അർപ്പിക്കുകയും ചെയ്തു. നടിയുടെ വിടവാങ്ങലിലുള്ള കുടംബത്തിന്റെ വിഷമത്തോടൊപ്പം ചേരുന്നുയെന്ന് ആമീർ ഖാൻ പ്രൊഡക്ഷൻസ് എക്സിൽ കുറിച്ചു.