Bougainvillea: `സ്തുതി` പാടി ദിവ്യ എസ് അയ്യർ; ഏറ്റെടുത്ത് ആരാധകർ

'ബോ​ഗയ്ൻവില്ല'യിലെ ട്രെൻഡിങ് ​ഗാനം 'സ്തുതി' പാടി ഡോ. ദിവ്യ എസ് അയ്യർ. ഇൻസ്റ്റ​ഗ്രാമിൽ പങ്കു വച്ച റീൽ ചുരുങ്ങിയ സമയം കൊണ്ടുതന്നെ ശ്രദ്ധേയമായി. വിഡിയോയ്ക്ക് താഴെ നിരവധി പേർ പ്രതികരണം അറിയിച്ചു. നടൻ കുഞ്ചാക്കോ ബോബൻ നന്ദി പറഞ്ഞ് വിഡിയോ ഷെയർ ചെയ്തു. 

സുഷിൻ ശ്യാം ഒരുക്കിയ സ്തുതി ​ഗാനത്തിന് പുറത്തിറങ്ങി നിമിഷങ്ങൾക്കുള്ളിൽ തന്നെ മികച്ച സ്വീകാര്യതയാണ് ലഭിച്ചത്. സുഷിനും കുഞ്ചാക്കോ ബോബനും ജ്യോതിർമയിയുമാണ് ​ഗാനരം​ഗത്തിൽ പ്രത്യക്ഷപ്പെടുന്നത്. വിനായക് ശശികുമാറിൻേതാണ് വരികൾ.

മേരി ആൻ അലക്സാണ്ടറും സുഷിൻ ശ്യാമും ചേർന്നാണ് ഈ ട്രെൻഡിങ് ഗാനം ആലപിച്ചത്. സോണി മ്യൂസികാണ് ചിത്രത്തിന്റെ മ്യൂസിക് പാർട്നർ. 

കുഞ്ചാക്കോ ബോബൻ, ഫഹദ് ഫാസിൽ, ജ്യോതിർമയി എന്നിവരെ കേന്ദ്രകഥാപാത്രങ്ങളാക്കി അമൽ നീരദ് സംവിധാനം ചെയ്യുന്ന പുതിയ ചിത്രമാണ് ബോ​ഗയ്ൻവില്ല. ചിത്രം ഒക്ടോബർ 17ന് തിയറ്ററുകളിലെത്തും. കുഞ്ചാക്കോ ബോബനും അമൽ നീരദും ആദ്യമായി ഒന്നിക്കുന്നുവെന്ന പ്രത്യേകതയും ഈ ചിത്രത്തിനുണ്ട്. ഏറെ നാളുകൾക്ക് ശേഷം നടി ജ്യോതിർമയി അഭിനയിക്കുന്ന ചിത്രമാണിത്.