Gopika Anil: ഇനി അഞ്ജലിയാകാനാവില്ല..; പൊട്ടിക്കരഞ്ഞ് ഗോപിക അനില്‍, വീഡിയോ

മലയാള ടെലിവിഷന്‍ പ്രേക്ഷകരുടെ ഇഷ്ടതാരമാണ് ഗോപിക അനില്‍. സാന്ത്വനം എന്ന ജനപ്രിയ സീരിയലിലൂടെയാണ് ഗോപിക മലയാളികളുടെ മനംകവര്‍ന്നത്. സീരിയലിലെ ശിവന്‍ - അഞ്ജലി ജോഡികള്‍ക്ക് കുടുംബ പ്രേക്ഷകര്‍ക്കിടയിലും യുവാക്കള്‍ക്കിടയിലുമെല്ലാം നിരവധി ആരാധകരുണ്ട്. ഇപ്പോള്‍ ഇതാ സാന്ത്വനം സീരിയലിന്റെ ഷൂട്ടിംഗ് പൂര്‍ത്തിയാക്കിയ ശേഷം വികാരാധീനയായി പൊട്ടിക്കരയുന്ന ഗോപികയുടെ വീഡിയോയും ഒപ്പം പങ്കുവെച്ച കുറിപ്പും വൈറലായിരിക്കുകയാണ്. 

'അവസാന ദിവസം അഞ്ജലിയായി അഭിനയിച്ച അവസാന ഷോട്ട് ഹൃദയഭേദകമായിരുന്നു. ഇനി അങ്ങോട്ട് ക്യാമറയ്ക്ക് മുന്നില്‍ അഞ്ജലിയായി അഭിനയിക്കാന്‍ കഴിയില്ല എന്നത് എന്റെ ഹൃദയത്തിന്റെ ഭാരം വര്‍ധിപ്പിക്കുകയാണ്. അഞ്ജലിയെ എനിക്ക് വല്ലാതെ മിസ് ചെയ്യുന്നു. അഞ്ജലിയ്ക്ക് വേണ്ടി ഞാന്‍ എന്റെ ഹൃദയം പൂര്‍ണമായി നല്‍കിയിരുന്നു. ആ കഥാപാത്രം എനിക്ക് വേണ്ടി മാത്രം സൃഷ്ടിക്കപ്പെട്ടതാണെന്ന് തോന്നിപ്പോകുന്നു. ഇത്രയേറെ മനോഹരമായ യാത്ര ഒരിക്കലും ഉണ്ടായിട്ടില്ല. അഭിനയിക്കുക എന്നതിലുപരി കഥാപാത്രമായി ഞാന്‍ ജീവിക്കുകയായിരുന്നു. എന്നെ വിശ്വസിച്ച് എനിക്ക് അഞ്ജലിയെ തന്നതിന് ഗംഭീരമായ ക്രൂവിന് ഏറെ നന്ദി. ഒപ്പം കഥാപാത്രത്തെ സ്വീകരിച്ചതിനും എന്നെ കുടുംബത്തിലെ ഒരു അംഗത്തെ പോലെ പരിഗണിച്ചതിനും പ്രേക്ഷകര്‍ക്കും ഒരുപാട് നന്ദി. അഞ്ജലി, നീ എന്നും എന്റെ ഹൃദയത്തിലുണ്ടാകും. ഒരുപാട് നന്ദിയുണ്ട്.' ഗോപിക കുറിച്ചു.

അണിയറ പ്രവർത്തകരോടെല്ലാം വികാരഭരിതയായി യാത്ര പറയുന്ന ഗോപികയുടെ വീഡിയോ പോസ്റ്റിന് താഴെ നിരവധി ആളുകളാണ് കമന്റുകളുമായി എത്തുന്നത്. ശിവാഞ്ജലി എന്നും മനസിലുണ്ടാകുമെന്നും മറക്കാന്‍ പറ്റില്ലെന്നുമാണ് കമന്റുകള്‍. കഥാപാത്രമായി അഭിനയിക്കാന്‍ പറഞ്ഞപ്പോള്‍ ജീവിച്ചു കാണിച്ചു തന്ന കലാ പ്രതിഭയാണ് ഗോപികയെന്നും ഇനിയും നല്ല അവസരങ്ങള്‍ ഉണ്ടാവട്ടെയെന്നുമെല്ലാം കമന്റുകളുണ്ട്. സീരിയലിന്റെ രണ്ടാം ഭാഗം വേണമെന്ന് ആവശ്യപ്പെടുന്നവരും കുറവല്ല.